داغ دہلوی

مے بوند بھر پلا کر کیا ہنس رہا ہے ساقی
بھر بھر کے پیتے آخر پیمانے آدمی ہیں

مصحفی غلام ہمدانی

خم جوشان عشق بے محابا ہوں میں تب ہی تو
نہ شیشے میں ٹھہرتا ہوں نہ پیمانے میں رہتا ہوں
اس مے کا ایک قطرہ سوراخ دل کرے ہے
بھر بھر جو ہم پییں ہیں پیمانے باؤلے ہیں

یگانہ چنگیزی

واہ کس ناز سے آتا ہے ترا دور شباب
جس طرح دور چلے بزم میں پیمانے کا
دل بے حوصلہ تکتا ہے خریدار کی راہ
کوئی گاہک نہیں ٹوٹے ہوئے پیمانے کا
کیفیت سے کبھی خالی نہیں دل مستوں کا
ہو بہ ہو ملتا ہے ساقی ترے پیمانے سے
ساقیا دل کی ہوس مٹ نہ سکی پیری میں
پیاس بجھتی نہیں ٹوٹے ہوئے پیمانے سے
دور سے دیکھنے کے یاسؔ گنہ گار ہیں بس
آشنا تک نہ ہوئے لب کبھی پیمانے سے
جام لبریز ہوا ہے کسی مہجور کا آج
بوئے خوں آتی ہے ساقی ترے پیمانے سے

باقی صدیقی

خون اخلاص کی بو آتی ہے پیمانے سے
رند گھبرا کے نکل آئے ہیں میخانے سے
بوئے خوں آتی ہے پیمانے سے
رند اٹھ جائیں نہ میخانے سے
کس کے ہنسنے کی صدا آئی ہے
دل میں چلنے لگے پیمانے سے

عبدالحمید عدم

ایک دل کش زہر سے لبریز پیمانے کا نام
زندگی کیا ہے خوشی سے جل کے مر جانے کا نام

قمر جلالوی

دیکھیے محفلِ ساقی کا نتیجہ کیا ہوا
بات شیشے کی پہنچنے لگی پیمانے تک
ہو گئی توبہ کو اک مدت کسے اب یاد ہے
اصطلاحاً ہم نے کیا رکھا تھا پیمانے کا نام
دیکھتے ہیں رقص میں دن رات پیمانے کو ہم
ساقیا راس آ گئے ہیں تیرے میخانے کو ہم
وہ مہتمم ہیں جہاں بھی گئے دیوانے
صراحی جھک گئی اٹھے ادب سے پیمانے
خدا آباد رکھے میکدہ یہ تو سمجھ ساقی
ہزاروں بادہ کش ہیں ایک پیمانے سے کیا ہو گا
نہ جانے ساغر و مینا پہ پیمانے پہ کیا گزری
جو ہم پی کر چلے آئے تو میخانے پہ کیا گزری

احمد راہی

قد و گیسو لب و رخسار کے افسانے چلے
آج محفل میں ترے نام پہ پیمانے چلے

جلیل مانک پوری

جامِ جم کی دھوم ہے سارے جہاں میں ساقیا
مانتا ہوں میں بھی لیکن تیرے پیمانے کے بعد

جوش ملیح آبادی

گردن میں ہیں وہ باہیں گردش میں ہیں پیمانے
کیا دین ہے کیا دنیا شاعر کی بلا جانے
مطرب وہ اٹھے پردے ساقی وہ کھلے عقدے
ہاں یوں ہی دمادم دے پیمانوں پہ پیمانے

سیماب اکبر آبادی

سبو پر جام پر شیشے پہ پیمانے پہ کیا گزری
نہ جانے میں نے توبہ کی تو مے خانے پہ کیا گزری

شاد عظیم آبادی

دیر تک میں ٹکٹکی باندھے ہوئے دیکھا کیا
چہرۂ ِ ساقی نمایاں صاف پیمانے میں تھا

شکیل بدایونی

مجھ کو ساقی نے جو رخصت کیا مے خانے سے
خود مئے ناب چھلکنے لگی پیمانے سے
محتسب اب تجھے توبہ کا یقیں ہو کہ نہ ہو
ہم تو ٹکرا چکے پیمانے کو پیمانے سے

فانی بدایونی

دل سے پہنچی تو ہیں آنکھوں میں لہو کی بوندیں
سلسلہ شیشے سے ملتا تو ہے پیمانے کا
چشمِ ساقی اثر مئے سے نہیں ہے گل رنگ
دل مرے خون سے لبریز ہے پیمانے کا
کس کی آنکھیں دمِ آخر مجھے یاد آئی ہیں
دل مرقع ہے چھلکتے ہوئے پیمانے کا

قتیل شفائی

تمہاری بے رخی نے لاج رکھ لی بادہ خانے کی
تم آنکھوں سے پلا دیتے تو پیمانے کہاں جاتے

کلیم عاجز

مری مستی کے افسانے رہیں گے
جہاں گردش میں پیمانے رہیں گے
یہی انداز مے نوشی رہے گا
تو یہ شیشے نہ پیمانے رہیں گے

کیفی اعظمی

جہاں سے پچھلے پہر کوئی تشنہ کام اٹھا
وہیں پہ توڑے ہیں یاروں نے آج پیمانے

مجروح سلطان پوری

نگاہ ساقی نامہرباں یہ کیا جانے
کہ ٹوٹ جاتے ہیں خود دل کے ساتھ پیمانے
فریب ساقی محفل نہ پوچھئے مجروحؔ
شراب ایک ہے بدلے ہوئے ہیں پیمانے

میرا جی

چاند ستارے قید ہیں سارے وقت کے بندی خانے میں
لیکن میں آزاد ہوں ساقی چھوٹے سے پیمانے میں

ناصر کاظمی

بقدرِ تشنہ لبی پرشسِ وفا نہ ہوئی
چھلک کے رہ گئے تیری نظر کے پیمانے
میخواروں کی صف سے پرے کچھ ایسے عالی ظرف بھی تھے
بھر نہ سکے جن کے پیمانے انٹر کانٹی نینٹل میں

نوح ناروی

بطور یادگار زہد مے خانے میں رکھ دینا
مری ٹوٹی ہوئی توبہ کو پیمانے میں رکھ دینا
دو بارا پھر کسی دن میرے کام آئے گی اے ساقی
جو مے پینے سے بچ جائے وہ پیمانے میں رکھ دینا
کہاں ہم ڈھونڈتے تجھ کو پھریں گے اس گھڑی ساقی
صبوحی کے لیے تھوڑی سی پیمانے میں رکھ دینا