داغ دہلوی

ستم ہی کرنا جفا ہی کرنا نگاہِ الفت کبھی نہ کرنا
تمہیں قسم ہے ہمارے سر کی ہمارے حق میں کمی نہ کرنا

فیض احمد فیض

زہر سے دھو لیے ہیں ہونٹ اپنے
لطفِ ساقی نے جب کمی کی ہے

جون ایلیا

نہیں رشتہ سموچہ زندگی سے
نہ جانے ہم میں ہے اپنی کمی کیا
سوچ کر اس کی خلوت انجمنی
واں میں اپنی کمی کو بھول گیا
ہے کچھ ایسا کہ اس کی جلوت میں
ہمیں اپنی کمی سے خطرہ ہے
تو ہی حریم جلوہ ہے ہنگام رنگ ہے
جاناں بہت اداس ہوں اپنی کمی سے میں
حریم شوق کا عالم بتائیں کیا تم کو
حریم شوق میں بس شوق کی کمی ہی رہی
سناؤں میں کسے افسانۂ خیال ملال
تری کمی ہی رہی اور مری کمی ہی رہی

جگر مراد آبادی

تری نگاہِ کرم کو بھی آزما دیکھا
اذیتوں میں نہ ہونی تھی کچھ کمی نہ ہوئی

بہزاد لکھنوی

رکھنا پڑے گی تم کو تہی دامنی کی لاج
مجھ کو کمی ضرور ہے تم کو کمی نہیں

بشیر بدر

دیا جو بجھ چکا ہے پھر جلانا
بہت محسوس جب میری کمی ہو

بیخود بدایونی

درد دل میں کمی نہ ہو جائے
دوستی دشمنی نہ ہو جائے

علی سردار جعفری

مقتولوں کا قحط پڑ نہ جائے
قاتل کی کہیں کمی نہیں ہے

فارغ بخاری

ابھی تو ہم نفسوں کو ہے وہم چارہ گری
ہوئی نہ درد میں پھر بھی کمی تو کیا ہو گا

حفیظ جالندھری

یہ ہوا یہ ابر یہ سبزہ حفیظؔ
آج پینے میں کمی اچھی نہیں

سید ضمیر جعفری

زندگی تیری سہولت کے لیے
کچھ ارادوں میں کمی کرتے ہیں ہم

شان الحق حقی

جدائیوں سے شکایت تو ہو بھی جاتی ہے
رفاقتوں سے وفا میں کمی نہیں آتی
خدا رکھے تری محفل کی رونقیں آباد
نظارگی سے نظر میں کمی نہیں آتی

اختر ہوشیارپوری

یہ سرگزشت زمانہ یہ داستان حیات
ادھوری بات میں بھی رہ گئی کمی میری

احمد فراز

دوست بھی ملتے ہیں محفل بھی جمی رہتی ہے
تو نہیں ہوتا تو ہر شے میں کمی رہتی ہے

شاذ تمکنت

میں ڈر رہا ہوں کہاں تیرا سامنا ہو گا
ترا وجود ہی میری کمی نہ بن جائے

فراق گورکھپوری

آج انجمن عشق نہیں انجمن عشق
کس درجہ کمی بزم میں ہے تیری کمی سے
خطرۂ بسیار دانی کی قسم
علم میں بھی کچھ کمی درکار ہے

ناصر کاظمی

کتنے بیتے دنوں کی یاد آئی
آج تیری کمی میں کیا کچھ تھا
بھری دنیا میں جی نہیں لگتا
جانے کس چیز کی کمی ہے ابھی
میری ساری عمر میں
ایک ہی کمی ہے تو