داغ دہلوی

مہرباں ہو کے جب ملیں گے آپ
جو نہ ملتے تھے سب ملیں گے آپ
داغ اک آدمی ہے گرما گرم
خوش بہت ہوں گے جب ملیں گے آپ

مصحفی غلام ہمدانی

بن گیا ہوں میں صورتِ دیوار
سامنے آ گیا ہے جب کوئی
نخل لالے جا جب زمیں سے اٹھا
شعلہ اک دو وجب زمیں سے اٹھا
پرستش ہی میں شب آخر ہوئی ہے
ہمارے پاس وہ بت جب رہا ہے

مصطفٰی خان شیفتہ

کہتے ہیں بے وفا مجھے میں نے جو یہ کہا
مرتے رہیں گے آپ پہ، جیتے ہیں جب تلک
ہم سے اسے معاملہ تھا جان و جسم کا
ہرگز ملا نہ گاہ، ہوا ہائے جب سے دور

فیض احمد فیض

تری امید ترا انتظار جب سے ہے
نہ شب کو دن سے شکایت، نہ دن کو شب سے ہے

باقی صدیقی

روٹھ گیا دل سب سے
آپ گئے ہیں جب سے
غم ہی غم دیکا ہے
آنکھ کھلی ہے جب سے
کیا کیا تھے اصول زندگی کے
مشکل نہ پڑی تھی کوئی جب تک
دل کی حالت عجیب ہوتی ہے
کوئی امید جب نہیں ہوتی

قمر جلالوی

پروانہ میری طرح مصیبت میں کب رہا
بس رات بھر جلا تری محفل میں جب رہا

شکیب جلالی

وہ دن نہیں ‘ کرن سے کرن میں لگے جو آگ
وہ شب کہاں ‘ چراغ سے جلتے تھے جب چراغ

رئیس فروغؔ

مرے چراغ کہ جن کا کوئی شمار نہیں
سب ایک ساتھ ہی جل جائیں بات جب ہے میاں

بشیر بدر

ہمارا دل سویرے کا سنہرا جام ہو جائے
چراغوں کی طرح آنکھیں جلیں جب شام ہو جائے

عبید اللہ علیم

تو پھر چراغ تھے ہم بے چراغ راتوں کے
پلٹ کے گزری ہوئی رات جب نہیں آئی

شاد عظیم آبادی

جیے جائیں گے ہم بھی لب پہ دم جب تک نہیں آتا
ہمیں بھی دیکھنا ہے نامہ بر کب تک نہیں آتا

احمد فراز

نظر بجھی تو کرشمے بھی روز و شب کے گئے
کہ اب تلک نہیں آئے ہیں لوگ جب کے گئے

فراق گورکھپوری

کیا حسن کے انداز تغافل کی شکایت
پیمانِ وفا عشق کا جب اور ہی کچھ ہے

محسن احسان

فصیلِ شب سے کوئی اب پکارتا ہے تو کیا
ملا نہ ایک بھی اس دن تلاش جب تھی مجھے

ناصر کاظمی

یاد آتی ہیں دور کی باتیں
پیار سے دیکھتا ہے جب کوئی
بیٹھ کر سایۂ گل میں ناصر
ہم بہت روئے وہ جب یاد آیا