داغ دہلوی

نارِ نمرود کو کیا گلزار
دوست کو یوں بچا دیا تو نے

مصحفی غلام ہمدانی

شمشاد برابر اس کے قد کے
دہشت سے بچا ہوا کھڑا ہے
میت سے میری گزرے ہے جس دم وہ بعدِ قتل
لاشہ کہے ہے خون سے دامن بچا سرک

فیض احمد فیض

آج ان کی نظر میں کچھ ہم نے
سب کی نظریں بچا کے دیکھ لیا

میر انیس

کسی کا دل نہ کیا ہم نے پائمال کبھی
چلے جو راہ تو چیونٹی کو بھی بچا کے چلے

جگر مراد آبادی

ناصح فسانہ اپنا ہنسی میں اڑا گیا
خوش فکر تھا کہ صاف یہ پہلو بچا گیا

عرفان صدیقی

ایک ضد تھی مرا پندارِ وفا کچھ بھی نہ تھا
ورنہ ٹوٹے ہوئے رشتوں میں بچا کچھ بھی نہ تھا
اس شہر میں غارت گرِ ایماں تو بہت تھے
کچھ گھر کی شرافت ہی بچا لے گئی ہم کو

مجید امجد

اور اب یہ کہتا ہوں، یہ جرم تو روا رکھتا
میں عمر اپنے لیے بھی تو کچھ بچا رکھتا

جمال احسانی

آسمانوں نے گواہی کے لیے
اک ستارے کو بچا رکھا ہے

رئیس فروغؔ

آنکھوں کی چنگاریوں سے
اس کا بازو بچا نہیں

ادا جعفری

آندھیاں ہار گئیں جب تو خیال آیا ہے
پھول کو تند ہواؤں سے بچا کر رکھوں

بشیر بدر

دو چار دن کی بات ہے دل خاک میں مل جائے گا
جب آگ پر کاغذ رکھا باقی بچا کچھ بھی نہیں

ضیا جالندھری

لفظ تیروں کی طرح وعظ سناں کے مانند
دلِ وحشی کو کہاں کوئی بچا کر لے جائے

جلیل مانک پوری

ادا سے کھینچ رہا ہے کماں وہ تیر انداز
قضا پکار رہی ہے ذرا بچا کے مجھے

شکیل بدایونی

ہائے وہ عالم کہ جب ہر شے سے گھبراتا ہوں میں
آپ ہی اپنی نگاہوں سے بچا کرتا ہوں میں

احمد فراز

ندامتیں ہوں تو سر بار دوش ہوتا ہے
فراز، جاں کے عوض آبرو بچا لے جا
ان کے دامن بھی جلتے دیکھے ہیں
وہ جو دامن بچا کے رکھتے ہیں

شاذ تمکنت

درد دولت ہی سہی پہلوئے راحت ہی سہی
کچھ دنوں عشق نے بھی خود کو بچا رکھا ہے

کیفی اعظمی

اتنی لاشیں میں کیسے اٹھا پاؤں گا
آپ اینٹوں کی حرمت بچا تو چلے