داغ دہلوی

اٹھائی کیوں نہ قیامت عدو کے کوچے میں
لحاظ آپ کو وقت خرام کس کا تھا
اب دیکھیے مشق پائمالی
تعریف خرام ہو گئی ہے

شیخ ابراہیم ذوق

ترے خرام کے پیرو ہیں جتنے فتنے ہیں
قدم سب آن کے وقت خرام لیتے ہیں

مصحفی غلام ہمدانی

ہے قیامت بپا کہ جلوے میں
قامت خوش خرام ہے تیرا

مومن خان مومن

اب شور ہے مثال جو دی اس خرام کو
یوں کون جانتا تھا قیامت کے نام کو

فیض احمد فیض

ہر کوئی شہر میں پھرتا ہے سلامت دامن
رند میخانے سے شائستہ خرام آتا ہے

جون ایلیا

نہ اٹھے آہ کا دھواں بھی کہ وہ
کوئے دل میں خرام کر رہے ہیں
پیک قضا ہے دم بہ دم جونؔ قدم قدم شمار
لغزش گام رنج ہے حسنِ خرام رنج ہے

جگر مراد آبادی

اسے حال و قال سے واسطہ نہ غرض مقام و قیام سے
جسے کوئی نسبت خاص ہو ترے حسن برق خرام سے
یہ کتاب دل کی ہیں آیتیں میں بتاؤں کیا جو ہیں نسبتیں
مرے سجدہ ہائے دوام کو ترے نقش ہائے خرام سے

شکیب جلالی

چہرے سے اجنبی تھا وہ میرے لیے مگر
سب راز اس کے ‘ کہہ دیے طرزِ خرام نے

مجید امجد

دیکھیے تنکے کی ناؤ کب کنارے جا لگے
موج ہے دہشت خروش اور سیل ہے وحشت خرام
قاصدِ مست گام، موجِ صبا
کوئی رمزِ خرام، موجِ صبا

جمال احسانی

جب اس نے جا کے پہلوئے گل میں نشست کی
بادِ صبا بچھڑ گئی اپنے خرام سے

اسرار الحق مجاز

جھوم جھوم اٹھے شجر کلیوں نے آنکھیں کھول دیں
جانب گلشن کوئی مست خرام آ ہی گیا

جوش ملیح آبادی

یہ کون شاہد مستی فروش و نغمہ نواز
نفس کے تار پہ گرم خرام ہے ساقی

احمد فراز

اب کے بہار نے بھی کیں ایسی شرارتیں کہ بس
کبکِ دری کی چال میں تیرا خرام رکھ دیا

قتیل شفائی

زندگی بن کے وہ چلتے ہیں مری سانس کے ساتھ
ان کو ایسے کئی اندازِ خرام آتے ہیں