کوچہء یار سے بے نیل مرام آتا ہے
فیض احمد فیض
یوں بہار آئی ہے اس بار کہ جیسے قاصد
کوچہء یار سے بے نیل مرام آتا ہے
ہر کوئی شہر میں پھرتا ہے سلامت دامن
رند میخانے سے شائستہ خرام آتا ہے
ہوس مطرب و ساقی میںپریشاں اکثر
ابر آتا ہے کبھی ماہِ تمام آتا ہے
شوق والوں کی حزیں محفلِ شب میں اب بھی
آمدِ صبح کی صورت ترا نام آتا ہے
اب بھی اعلانِ سحر کرتا ہوا مست کوئی
داغِ دل کر کے فروزاں سرِ شام آتا ہے
فاعِلاتن فَعِلاتن فَعِلاتن فِعْلن
رمل مثمن مخبون محذوف مقطوع