مرزا غالب

بہ رہن شرم ہے با وصفِ شوخی اہتمام اس کا
نگیں میں جوں شرارِ سنگ نا پیدا ہے نام اس کا
خط لکھیں گے گرچہ مطلب کچھ نہ ہو
ہم تو عاشق ہیں تمہارے نام کے

امام بخش ناسخ

ایسا کوئی گم نام زمانے میں نہ ہو گا
گم ہو وہ نگیں جس پہ کھدے نام ہمارا
ہم گو کہ ہیں دیوانے مگر غرق یم اشک
یونان کے مانند ہوا نام ہمارا

انشاء اللہ خان انشا

ٹک آنکھ ملاتے ہی کیا کام ہمارا
تس پر یہ غضب پوچھتے ہو نام ہمارا
ٹک دیکھ ادھر غور کر انصاف یہ ہے واہ
ہو جرم و گنہ غیر سے اور نام ہمارا
اچھا مجھے ستاؤ جتنا کہ چاہو میں بھی
سمجھوں گا گر ہے انشا اللہ نام میرا
انہیں باتوں پہ لوٹتا ہوں میں
گالی پھر دے کے میرا نام تو لو
فقط اس لفافہ پر ہے کہ خط آشنا کو پہنچے
تو لکھا ہے اس نے انشاؔ یہ ترا ہی نام الٹا
ترک کر اپنے ننگ و نام کو ہم
جاتے ہیں واں فقط سلام کو ہم
کیا نام لے کے اس کا پکارا کروں کہ یاں
رکھتا ہے ہر زبان میں اک نام اور عشق

حیدر علی آتش

فتنہ انگیزی بھی چھپتی ہے کہیں پردے میں
سنتے ہیں گبر و مسلماں سے ترے نام کو ہم
کیا کیا جپے گی کیسا رٹے گی زباں اسے
تسبیح ہم نے لی ہے ترے نام کے لیے
نامرد اور مرد میں اتنا ہی فرق ہے
وہ نان کے لیے مرے یہ نام کے لیے

داغ دہلوی

آ گیا ہے بھول کر خط اس طرف
وہ تو عاشق ہیں مرے ہم نام کے
داغؔ کے سب حرف لکھتے ہیں جدا
ٹکڑے کر ڈالے ہمارے نام کے
داغؔ کا نام سن کے وہ بولے
آدمی کا یہ نام ہوتا ہے
جب تک ہے دل بغل میں ہر دم ہو یاد تیری
جب تک زباں ہے منہ میں‌جاری ہو نام تیرا
دلِ ناکام کے ہیں کام خراب
کر لیا عاشقی میں نام خراب
تمہارے خط میں نیا اک سلام کس کا تھا
نہ تھا رقیب تو آخر وہ نام کس کا تھا
انہیں صفات سے ہوتا ہے آدمی مشہور
جو لطفِ عام وہ کرتے یہ نام کس کا تھا
جاگیر جنوں کی قیس کے بعد
اب داغؔ کے نام ہو گئی ہے

شیخ ابراہیم ذوق

قتیل ناز بتاتے نہیں تجھے قاتل
جب ان سے پوچھو اجل ہی کا نام لیتے ہیں

مصحفی غلام ہمدانی

اس کے خط میں جو لکھا غیر کا میں نام الٹا
لایا قاصد بھی مجھے واں سے تو پیغام الٹا
جب تک یہ محبت میں بد نام نہیں ہوتا
اس دل کے تئیں ہرگز آرام نہیں ہوتا
دل چرانا یہ کام ہے تیرا
لے گیا ہے تو نام ہے تیرا

مصطفٰیٰ خان شیفتہ

لطف سمجھوں تو بجا، جور بھی سمجھوں تو درست
تم نے بھیجا ہے مرے پاس جو ہم نام اپنا
ہم طالبِ شہرت ہیں، ہمیں ننگ سے کیا کام
بدنام اگر ہوں گے تو کیا نام نہ ہو گا

مومن خان مومن

اعجاز جاں دہی ہے ہمارے کلام کو
زندہ کیا ہے ہم نے مسیحا کے نام کو
اب شور ہے مثال جو دی اس خرام کو
یوں کون جانتا تھا قیامت کے نام کو
ہر ایک سے اس بزم میں شب پوچھتے تھے نام
تھا لطف جو کوئی مرا ہم نام نکلتا
تو نے رسوا کیا مجھے اب تک
کوئی بھی جانتا تھا نام مرا

فیض احمد فیض

وہیں ہے دل کے قرائن تمام کہتے ہیں
وہ اک خلش کہ جسے تیرا نام کہتے ہیں
دل مدعی کے حرفِ ملامت سے شاد ہے
اے جانِ جاں یہ حرف ترا نام ہی تو ہے
شوق والوں‌ کی حزیں‌ محفلِ شب میں اب بھی
آمدِ صبح کی صورت ترا نام آتا ہے
قریب آ اے مہ شبِ غم، نظر پہ کھلتا نہیں کچھ اس دم
کہ دل پہ کس کس کا نقش باقی ہے ، کون سے نام بجھ گئے ہیں

باقی صدیقی

وہم تھا لوگ مرا راستہ تکتے ہوں گے
آ کے دیکھا تو کسی لب پہ مرا نام نہ تھا
لیا کس نے ابھی سے صبح کا نام
ستارے جھلملا اٹھے سرِ شام
چلے جائیں گے خالی ہاتھ بھی ہم۔۔
مگر آئے تھے سن کر آپ کا نام
اے محبت تجھے بھی دیکھ لیا
سنتے آتے تھے تیرا نام بہت
دل کے لیے حیات کا پیغام بن گئیں
بے تابیاں سمٹ کے ترا نام بن گئیں
نہ مے بدلی نہ مے کے جام بدلے
جہاں نے میکدوں کے نام بدلے
غمِ جہاں کا تصور بھی جرم ہے اب تو
غمِ جہاں کو نئے نام کی ضرورت ہے

جون ایلیا

دل کی کہانیاں بنیں کوچہ بہ کوچہ کو بہ کو
سہہ کے ملال شہر کو شہر میں نام ہو گیا
اپنے سب یار کام کر رہے ہیں
اور ہم ہیں کہ نام کر رہے ہیں
بابا الف مری نمود رنج ہے آپ کے بقول
کیا مرا نام بھی ہے رنج ہاں ترا نام رنج ہے
دل نے پڑھا سبق تمام بود تو ہے قلق تمام
ہاں مرا نام رنج ہے ہاں ترا نام رنج ہے

جگر مراد آبادی

نہ غرض کسی سے نہ واسطہ مجھے کام اپنے ہی کام سے
ترے ذکر سے تری فکر سے تری یاد سے ترے نام سے
مجھے یوں نہ خاک میں تو ملا میں اگرچہ ہوں ترا نقشِ پا
ترے جلوے کی ہے بقا مرے شوق نام بہ نام سے
جو اٹھا ہے درد اٹھا کرے کوئی خاک اس سے گلا کرے
جسے ضد ہو حسن کے ذکر سے جسے چڑھ ہو عشق کے نام سے
مسرت زندگی کا دوسرا نام
مسرت کی تمنا مستقل غم
جب کوئی ذکر گردش آیام آ گیا
بے اختیار لب پہ ترا نام آ گیا
حسن کے احترام نے مارا
عشق بے ننگ و نام نے مارا

عبدالحمید عدم

بھولے سے کبھی لے جو کوئی نام ہمارا
مر جائے خوشی سے دلِ ناکام ہمارا
بدنامی سے کیوں ڈرتے ہو
باقی کس کا نام رہے گا
اے زندگی تو آپ ہی چپکے سے دیکھ لے
جام عدمؔ پہ لکھا ہوا کس کا نام ہے
بے جنبشِ ابرو تو نہیں کام چلے گا
آ کر مرے قصے میں ترا نام چلے گا
زباں پر آپ کا نام آ رہا تھا
غمِ ہستی کو آرام آ رہا تھا
مے مرے ہونٹ چوم لیتی ہے
لے کے جب تیرا نام پیتا ہوں
پہلے بڑی رغبت تھی ترے نام سے مجھ کو
اب سن کے ترا نام میں کچھ سوچ رہا ہوں
خفا نہ ہو کہ ہمارا قصور کوئی نہیں
بلا ارادہ ترا نام لیتے رہتے ہیں
ہجومِ غم میں ترا نام بھول بھی جائے
تو پھر بھی جیسے ترا نام لیتے رہتے ہیں

قمر جلالوی

سن مآلِ سوزِ الفت جب یہ نام آ ہی گیا
شمع آخر جل بجھی پروانہ کام آ ہی گیا
رازِ الفت مرنے والے نے چھپایا تو بہت
دم نکلتے وقت لب پر ان کا نام آ ہی گیا
دیر تک بابِ حرم پر رک کے اک مجبورِ عشق
سوئے بت خانہ خدا کا لے کے نام آ ہی گیا
کس سے شکوہ کر رہے ہیں آ دامن تھام کے
بندہ پرور سینکڑون ہوتے ہیں اک اک نام کے
ہیں ہمارے قتل میں بدنام کتنے نام کے
جو کہ قاتل ہے وہ بیٹھا ہے ہے کلیجا تھام کے
شامِ فرقت وہ قیامت ہے کہ اللہ بچائے
صبح کو آدمی کا نام بدل جاتا ہے
تم جواں ہے کے وہی غنچہ دہن ہو یہ کیا
جب کلی کھلتی ہے تو نام بدل جاتا ہے

شکیب جلالی

مثال ایسی ہے اس دورِ خرد کے ہوش مندوں کی
نہ ہو دامن میں ذرہ اور صحرا نام ہو جائے

عرفان صدیقی

اگر وہ تشنگی لازوال یاد رہے
کبھی نہ آئے زبانوں پہ نام پانی کا
رکھنا یا فہرست میں تم مرا نام نہ رکھنا
مجھ کو اس الجھن سے کوئی کام نہ رکھنا
سخن میں موسمِ گل ان کے نام سے آئے
پڑھوں سلام تو خوشبو کلام سے آئے

مجید امجد

رت بدلی کہ صدیاں لوٹ آئیں، اف یاد، کسی کی یاد
پھر سیلِ زماں میں تیر گیا اک نام، کسی کا نام
ہم فکر میں ہیں اس عالم کا دستور ہے کیا دستور
یہ کس کو خبر اس فکر کا ہے دستورِ دو عالم نام
شمع کے دامن میں شعلہ، شمع کے قدموں میں راکھ
اور ہو جاتا ہے ہر منزل پہ پروانے کا نام
وادیِ برف کا کوئی سندیس
میرے اشکوں کے نام موجِ صبا
سو سمٹتی مسافتوں کا طلسم!
تیری کروٹ کا نام، موجِ صبا

مصطفیٰ زیدی

ہر اک نے کہا کیوں تجھے آرام نہ آیا
سنتے رہے ہم لب پہ ترا نام نہ آیا
دیوانے کو تکتی ہیں ترے شہر کی گلیاں
نکلا تو ادھر لوٹ کے بد نام نہ آیا

الطاف حسین حالی

کچھ کرتے ہیں جو یاں وہی انگشت نما ہیں
بدنام ہی دنیا میں نکو نام ہے گویا

جمال احسانی

شکل کا لاحقہ نہیں ہمراہ
جانا جاتا ہوں صرف نام سے میں
کہنی ہے ایک بات دلِ شاد کام سے
تنگ آ گیا ہوں یار محبت کے نام سے
قرار دل کو سدا جس کے نام سے آیا
وہ آیا بھی تو کسی اور کام سے آیا

رئیس فروغؔ

دشمن ہے ایک شخص بہت ایک شخص کا
ہاں عشق ایک نام کو ہے ایک نام سے

احسان دانش

دیجیے بیمار‌ الفت کی جگر داری کی داد
نزع کا عالم ہے ہونٹوں پر تمہارا نام ہے
مدد اے مرگ ناکامی نقاہت کا یہ عالم ہے
بڑی مشکل سے ہونٹوں تک کسی کا نام آتا ہے
معاذ اللہ مری آنکھوں کا اظہار تنگ ظرفی
ٹپک پڑتے ہیں آنسو جب تمہارا نام آتا ہے

ادا جعفری

ہونٹوں پہ کبھی ان کے مرا نام ہی آئے
آئے تو سہی بر سر الزام ہی آئے

اسرار الحق مجاز

خامشی کا تو نام ہوتا ہے
ورنہ یوں بھی کلام ہوتا ہے
بارہا ایسا ہوا ہے یاد تک دل میں نہ تھی
بارہا مستی میں لب پر ان کا نام آ ہی گیا
بہ ایں رندی مجازؔ اک شاعر مزدور و دہقاں ہے
اگر شہروں میں وہ بد نام ہے بد نام رہنے دے

آنس معین

ذرا سی عمر عداوت کی لمبی فہرستیں
عجیب قرض وراثت میں میرے نام ہوا

بشیر بدر

مرے فکر و فن تری انجمن نہ عروج تھا نہ زوال ہے
مرے لب پہ تیرا ہی نام تھا مرے لب پہ تیرا ہی نام ہے
کسے خبر کہ فرشتے غزل سمجھتے ہیں
خدا کے سامنے کافر کا نام لینا ہے

زہرا نگاہ

تیرا ستم ہم پہ عام دیکھیے کب تک رہے
تلخی دوراں پہ نام دیکھیے کب تک رہے

سدرشن فاکر

الفت کا جب کسی نے لیا نام رو پڑے
اپنی وفا کا سوچ کے انجام رو پڑے

غلام محمد قاصر

بغیر اس کے اب آرام بھی نہیں آتا
وہ شخص جس کا مجھے نام بھی نہیں آتا

احمد راہی

تو نہیں میرا مسیحا مرا قاتل ہی سہی
مجھ سے وابستہ کسی طور ترا نام تو ہے

تلوک چند محروم

میں اس کو نہ بیچوں عوض ملکِ سلیماں
ہے ثبت سر خاتم دل نام تمہارا

حفیظ ہوشیارپوری

کوئی شریکِ غم نہیں اب تری یاد کے بغیر
کوئی انیسِ دل نہیں اب ترے نام کے سوا

رسا چغتائی

جب تک دورِ جام چلے گا
ساقی تیرا نام چلے گا

سیف الدین سیف

سیفؔ ہر بار اشاروں میں کیا اس کو خطاب
لوگ اس بت کا مجھے نام تو لینے دیتے

سیماب اکبر آبادی

کوئے جاناں دیکھ کر جنت سے یوں مایوس ہوں
پوچھتا پھرتا ہوں کیا جنت اسی کا نام ہے
اس طرح دنیا ہے اک معمورۂ ناز و نیاز
ذرے ذرے پر مرا سجدہ تمہارا نام ہے
اگر ہے زندگی منظور بے سوچے فنا ہو جا
مذاق عاشقی میں نیستی کا نام ہستی ہے

شاد عظیم آبادی

اگر مرتے ہوئے لب پر نہ تیرا نام آئے گا
تو میں مرنے سے در گزرا مرے کس کام آئے گا
شبِ فرقت میں دردِ دل سے میں اس واسطے خوش ہوں
زباں پر رات بھر رہ رہ کے تیرا نام آئے گا
زہے عزت جو ہو اس بزم میں مذکور اے واعظ
بلا سے گر گنہ گاروں میں اپنا نام آئے گا
ہزار انکار یا قطع تعلق اس سے کر ناصح
مگر ہر پھر کے ہونٹوں پر اسی کا نام آئے گا
گلی میں یار کی اے شادؔ سب مشتاق بیٹھے ہیں
خدا جانے وہاں سے حکم کس کے نام آئے گا
الفت نے انہیں کی حق کی طرف پھیرا مرے دل کو شکرِ خدا
تعمیر کریں مسجد کوئی کیونکر نہ بتوں کے نام سے ہم
دنیا میں تخلص کوئی نہ تھا کیا نیل کا ٹیکا شادؔ ہی تھا
تم وجہ نہ پوچھو کچھ اس کی چڑھ جاتے ہیں کیوں اس نام سے ہم

شان الحق حقی

نہ دو داغوں کے بھید آہوں کو روکو
نہ لو نالوں کا نام آہستہ بولو
یہی ہوتے ہیں آداب محبت
کہ جب لو اس کا نام آہستہ بولو

شکیل بدایونی

اے محبت ترے انجام پہ رونا آیا
جانے کیوں آج ترے نام پہ رونا آیا
غم عاشقی سے کہہ دو رہِ عام تک نہ پہنچے
مجھے خوف ہے یہ تہمت ترے نام تک نہ پہنچے
میری عرض شوق پڑھ لیں یہ کہاں انہیں گوارا
وہیں چاک کر دیا خط جہاں میرا نام دیکھا
نہ پیمانے کھنکتے ہیں نہ دورِ جام چلتا ہے
نئی دنیا کے رندوں میں خدا کا نام چلتا ہے
چھپے ہیں لاکھ حق کے مرحلے گم نام ہونٹوں پر
اسی کی بات چل جاتی ہے جس کا نام چلتا ہے
لاکھ میں دیوانۂ رسوا سہی
پھر بھی اک نسبت ہے تیرے نام سے
بے خودی پر شاید اس کا بس نہیں
جوش آ جاتا ہے ان کے نام سے
ہائے یہ عالم کہ اب ترکِ وفا کے بعد بھی
دل میں ہوک اٹھی نہ اٹھی لب پہ نام آ ہی گیا
آخری وقت ہے آخری سانس ہے زندگی کی ہے شام آخری آخری
سنگ دل آ بھی جا اب خدا کے لیے لب پہ ہے تیرا نام آخری آخری
لوگ ان سے یہ کہتے ہیں کہ کتنے ہیں شکیلؔ آپ
اس حسن کے صدقے میں مرا نام تو آیا

عزیز حامد مدنی

جو نقش کتاب شاطر ہے اس چال سے آخر کیا چلیے
کھیلے تو ذرا دشوار چلے ہارے بھی تو کچھ دن نام چلے
کیا نام بتائیں ہم اس کا ناموں کی بہت رسوائی ہے
کچھ اب کے بہار تازہ نفس اک دور وفا بے نام چلے
افق تغیر کی تیز لو سے پگھل رہا ہے بدل رہا ہے
مگر اس احوال واقعی کو لکھیں نہ وہ میرے نام کہنا
ہم ایسے جادہ طراز صحرا نکل ہی آتے ہیں چند آخر
سخن کو اسلوب زندگی کا دیا ہے ہم نے ہی نام کہنا
خیال یاران کو بہ کو سے نظر ہے اک ماتم نظارہ
دم حریفان بے سبو سے نفس ہے بے ننگ و نام کہنا

فانی بدایونی

لطف و کرم کے پتلے ہو اب قہر و ستم کا نام نہیں
دل پہ خدا کی مار کہ پھر بھی چین نہیں آرام نہیں
جتنے منہ ہیں اتنی باتیں دل کا پتہ کیا خاک چلے
جس نے دل کی چوری کی ہے ایک اسی کا نام نہیں
رک کے جو سانسیں آئیں گئیں مانا کہ وہ آہیں تھیں لیکن
آپ نے تیور کیوں بدلے آہوں میں کسی کا نام نہیں
نزع میں فانیؔ تو نے یہ کس کا چپکے چپکے نام لیا
کیوں او کافر تیری زباں پر اب بھی خدا کا نام نہیں
مجھ پہ رکھتے ہیں حشر میں الزام
آ نہ جائے زباں پہ تیرا نام
کس سے اب درد کی دوا چاہوں
درد اٹھتا ہے لے کے تیرا نام
کچھ بس ہی نہ تھا ورنہ یہ الزام نہ لیتے
ہم تجھ سے چھپا کر بھی ترا نام نہ لیتے

احمد فراز

اور فرازؔ چاہییں کتنی محبتیں تجھے
ماؤں نے تیرے نام پر بچوں کا نام رکھ دیا
اب ترے ذکر پہ ہم بات بدل دیتے ہیں
کتنی رغبت تھی ترے نام سے پہلے پہلے
کتنا اچھا تھا کہ ہم بھی جیا کرتے تھے فرازؔ
غیر معروف سے گم نام سے پہلے پہلے

شاذ تمکنت

فضا کی آنکھ بھر آئی ہوا کا رنگ اڑا
سکوتِ شام نے چپکے سے تیرا نام لیا
قصۂ شوق کے عنوان دل آرام کئی
میں نے کس پیار سے رکھے ہیں ترے نام کئی

فراق گورکھپوری

شاق اہلِ شوق پر تھیں اس کی عصمت داریاں
سچ ہے لیکن حسن در پردہ بہت بد نام تھا

قابل اجمیری

وہی زباں وہی باتیں مگر ہے کتنا فرق
تمہارے نام سے پہلے تمہارے نام کے بعد

قتیل شفائی

سنے گا جب زمانہ میری بربادی کے افسانے
تمہارا نام بھی آئے گا میرے نام سے پہلے
آخر بری ہے کیا دلِ ناکام کی خلش
ساتھ اس کے ایک لذت بے نام بھی تو ہے
شمع جس آگ میں جلتی ہے نمائش کے لیے
ہم اسی آگ میں گم نام سے جل جاتے ہیں
جب بھی آتا ہے مرا نام ترے نام کے ساتھ
جانے کیوں لوگ مرے نام سے جل جاتے ہیں
دل پہ آئے ہوئے الزام سے پہچانتے ہیں
لوگ اب مجھ کو ترے نام سے پہچانتے ہیں
دور افق پار سہی پا تو لیا ہے تجھ کو
دیکھ ہم لے کے ترا نام کہاں تک پہنچے

کلیم عاجز

مری صبحِ غم بلا سے کبھی شام تک نہ پہنچے
مجھے ڈر یہ ہے برائی ترے نام تک نہ پہنچے
تری بے رخی پہ ظالم مرا جی یہ چاہتا ہے
کہ وفا کا میرے لب پر کبھی نام تک نہ پہنچے
جسے میں نے جگمگایا اسی انجمن میں ساقی
مرا ذکر تک نہ آئے مرا نام تک نہ پہنچے
تیرے ہی تبسم کا سحر نام ہے پیارے
تو کھول دے گیسو تو ابھی شام ہے پیارے
اس وقت ترا جانِ جہاں نام ہے پیارے
جو کام تو کر دے وہ بڑا کام ہے پیارے
گو میں نے کبھی اپنی زباں پر نہیں لایا
سب جان رہے ہیں ترا کیا نام ہے پیارے
موسم کے بدلتے ہی بدل جاتی ہیں آنکھیں
یاران چمن بھول گئے نام ہمارا

مجروح سلطان پوری

اب اہلِ درد یہ جینے کا اہتمام کریں
اسے بھلا کے غمِ زندگی کا نام کریں

محسن احسان

درشت کیوں تھا وہ اتنا کلام سے پہلے
کہ میرا نام نہ تھا اس کے نام سے پہلے
وہ مہرباں بھی ہوئے دشمنی پہ آمادہ
ہم آشنا بھی نہ تھے جن کے نام سے پہلے

ناصر کاظمی

رہِ طلب میں جو گم نام مر گئے ناصر
متاعِ درد انہی ساتھیوں کے نام کریں