کوئی رمزِ خرام، موجِ صبا
مجید امجد
قاصدِ مست گام، موجِ صبا
کوئی رمزِ خرام، موجِ صبا
وادیِ برف کا کوئی سندیس
میرے اشکوں کے نام موجِ صبا
کوئی موجِ خیال میں بہتی
منزلوں کا پیام، موجِ صبا
سو سمٹتی مسافتوں کا طلسم!
تیری کروٹ کا نام، موجِ صبا
تیرے دامن کی خوشبوؤں میں ہیں گم
سو سہانے مقام، موجِ صبا
آتی پت جھڑ کے ساتھ لوٹتے وقت
اک بہاریں پیام، موجِ صبا
اک نویدِ نگاہ، پیکِ حبیب
اک جوابِ سلام، موجِ صبا
فاعِلاتن مفاعِلن فِعْلن
خفیف مسدس مخبون محذوف مقطوع