مرزا غالب

مسی آلود ہے مہرنوازش نامہ ظاہر ہے
کہ داغ آرزوئے بوسہ دیتا ہے پیام اس کا
بے تاب ہوں بلا سے ، کن آنکھوں سے دیکھ لیں
اے خوش نصیب! کاش قضا کا پیام ہو

داغ دہلوی

جب وہ بت ہم کلام ہوتا ہے
دل و دیں کا پیام ہوتا ہے
ہمارے خط کے تو پرزے کیے پڑھا بھی نہیں
سنا جو تو نے بہ دل وہ پیام کس کا تھا
کیا طرز کلام ہو گئی ہے
ہر بات پیام ہو گئی ہے

مومن خان مومن

گو آپ نے جواب برا ہی دیا ولے
مجھ سے بیاں نہ کیجے عدو کے پیام کو
دیکھ لو شوق نا تمام مرا
غیر لے جائے ہے پیام مرا

باقی صدیقی

کچھ اس انداز سے اس فتنہ پرور کا پیام آیا
نہ دنیا میرے کام آئی نہ میں دنیا کے کام آیا

جگر مراد آبادی

مجھے دے رہے ہیں تسلیاں وہ ہر ایک تازہ پیام سے
کبھی آ کے منظرِ عام پر کبھی ہٹ کے منظرِ عام سے

قمر جلالوی

حسن کو بھی عشق کی ضد رکھنی پڑتی ہے کبھی
طور پر موسیٰ سے ملنے کا پیام آ ہی گیا
رات بھر مانگی دعا ان کے نہ جانے کی قمر
صبح کا تارہ مگر لے کر پیام آ ہی گیا

عرفان صدیقی

انہیں کے نام سے قائم رہے وجود مرا
نمو کی تاب انہیں کے پیام سے آئے

مجید امجد

کوئی موجِ خیال میں بہتی
منزلوں کا پیام، موجِ صبا
آتی پت جھڑ کے ساتھ لوٹتے وقت
اک بہاریں پیام، موجِ صبا

حفیظ ہوشیارپوری

اب کوئی آرزو نہیں ذوق پیام کے سوا
اب کوئی جستجو نہیں شوق سلام کے سوا

شکیل بدایونی

انہیں اپنے دل کی خبریں مرے دل سے مل رہی ہیں
میں جو ان سے روٹھ جاؤں تو پیام تک نہ پہنچے
کچھ تو آسان ہو گا عدم کا سفر ان سے کہنا تمہیں ڈھونڈتی ہے نظر
نامہ بر تو خدارا نہ اب دیر کر دے دے ان کو پیام آخری آخری
نامۂ شوق پڑھ کے وہ کھو گئے یک بیک شکیلؔ
منہ سے تو کچھ نہ کہہ سکے دل سے پیام لے لیا

عزیز حامد مدنی

اتر گیا دل میں زہر کاکل نثار اک سرو دل ستاں کے
فسون چارہ گری سے گزرا محبتوں کا پیام کہنا

فانی بدایونی

کب سے پڑی ہیں دل میں تیرے ذکر کی ساری راہیں بند
برسوں گزرے اس بستی میں رسم سلام و پیام نہیں

احمد فراز

اس نے سکوتِ شب میں بھی اپنا پیام رکھ دیا
ہجر کی رات بام پر ماہِ تمام رکھ دیا

قابل اجمیری

حیات گریۂ شبنم حیات رقصِ شرر
ترے پیام سے پہلے ترے پیام کے بعد

قتیل شفائی

چھن گئے ہم سے جو حالات کی راہوں میں قتیلؔ
ان حسینوں کے ہمیں اب بھی پیام آتے ہیں