جاتے ہیں واں فقط سلام کو ہم
انشاء اللہ خان انشا
ترک کر اپنے ننگ و نام کو ہم
جاتے ہیں واں فقط سلام کو ہم
خم کے خم تو لڑھائی یوں ساقی
اور یوں ترسیں ایک جام کو ہم
میں کہا میں غلام ہوں بولا
جانیں ہیں خوب اس غلام کو ہم
دیر و کعبہ کے بیچ ہیں ہنستے
خلق کے دیکھ اژدحام کو ہم
متکلم ہیں خاص لوگوں سے
کرتے ہیں کب خطاب عام سے ہم
روٹھنے میں بھی لطف ہے انشاؔ
صبح گر روٹھے وہ تو شام کو ہم
فاعِلاتن مفاعِلن فِعْلن
خفیف مسدس مخبون محذوف مقطوع