مرزا غالب

تا گردشِ فلک سے یوں ہی صبح و شام ہو
ساقی کی چشمِ مست ہو اور دورِ جام ہو
غیر لیں محفل میں بوسے جام کے
ہم رہیں یوں تشنہ لب پیغام کے
کہتے ہوئے ساقی سے ، حیا آتی ہے ورنہ
ہے یوں کہ مجھے درد تہ جام بہت ہے

امام بخش ناسخ

مے پائی نہ پینے کو تو ہم پی گئے آنسو
اشکوں سے بھی ساقی نہ بھرا جام ہمارا
مجھ کو اب ساقی گلفام سے کچھ کام نہیں
مے سے کچھ کام نہیں جام سے کچھ کام نہیں

انشاء اللہ خان انشا

میں غش ہوا کہا جوں ساقی نے مجھ سے ہنس کر
یہ سبز جام تیرا اور سرخ جام میرا
کون کہتا ہے بولو مت بولو
ہاتھ سے میرے ایک جام تو لو
مجھے چھیڑنے کو ساقی نے دیا جو جام الٹا
تو کیا بہک کے میں نے اسے اک سلام الٹا
خم کے خم تو لڑھائی یوں ساقی
اور یوں ترسیں ایک جام کو ہم
اسبابِ کائنات سے بس ہو کے بے نوا
انشاؔ نے انتخاب کیا جام اور عشق

بہادر شاہ ظفر

آج تشریف گلستاں میں وہ مے کش لایا
کف نرگس پہ دھرا کیوں کہ بھلا جام نہ ہو

حیدر علی آتش

شام سے صبح تلک دور شراب آخر ہے
روتے ہیں دیکھ کے خنداں دہن جام کو ہم
مئے گل رنگ سے لبریز رہیں جام سفید
چشم بدبیں کو کرے گردشِ ایام سفید
بس ہے اتنی ہی زمانہ کی دو رنگی آتشؔ
مئے گل رنگ سے لبریز رہیں جام سفید
کیا چشمِ مست یار سے تشبیہ دیجیے
کیفیت نگاہ نہیں جام کے لیے

داغ دہلوی

گھونٹ پی کر بادۂِ گلفام کے
بوسے لے لیتا ہوں خالی جام کے
چشمِ مست یار کی اک دھوم ہے
آج کل ہیں دور دورِ جام کے
ہے گدائے مے کدہ بھی کیا حریص
بھر لیے جھولی میں ٹکڑے جام کے
وہ بھی ساقی مجھے نہیں دیتا
وہ جو ٹوٹا پڑا ہے جام خراب

شیخ ابراہیم ذوق

ہمارے ہاتھ سے اے ذوقؔ وقت مے نوشی
ہزار ناز سے وہ ایک جام لیتے ہیں

مصحفی غلام ہمدانی

نہ وہ ساقی نہ وہ مے نوش ہیں مے خانے میں
اب تو رہتا ہے سر خم پہ دھرا جام الٹا
ساقی کے تلطف نے عالم کو چھکایا ہے
لبریز ہمارا ہی اک جام نہیں ہوتا

مصطفٰی خان شیفتہ

بادہ نوشی سے ہماری، جو لہو خشک ہوا
خونِ اغیار سے لبریز ہے کیا جام اپنا
قاصد ہے عبث منتظرِ وقت، کہاں وقت
کس وقت انہیں شغلِ مے و جام نہ ہو گا

مومن خان مومن

دیکھنا کثرت بلا نوشی
کاسۂِ آسماں ہے جام مرا

فیض احمد فیض

جمے گی کیسے بساط یاراں کہ شیشہ و جام بجھ گئے ہیں
سجے گی کیسے شبِ نگاراں کہ دل سرِ شام بجھ گئے ہیں

مرزا رفیع سودا

یک روز حلال اس کو بھی میں کر کے نہ کھایا
نوکر جو خرابات میں دو جام کا ہوں میں

باقی صدیقی

بہار میکدہ تقسیم ہونے کو ہوئی لیکن
مرے حصے میں تم آئے نہ مے آئی نہ جام آیا
زمانہ پس گیا دو حادثوں کے درمیاں آ کر
ادھر ان کی نظر اٹھی، ادھر گردش میں جام آیا
اٹھی نہ جب نگاہ کسی تشنہ کام کی
ساقی کو پڑ گئی خم و مینا و جام کی
سورج ڈوب رہا ہے آؤ طوف بادہ و جام کریں
تم بھی ذرا زلفوں کو سنوارو ہم بھی ذرا آرام کریں
باقیؔ جہاں کرے گا مری میکشی پہ رشک
ان کی حسیں نگاہیں اگر جام بن گئیں
نہ مے بدلی نہ مے کے جام بدلے
جہاں نے میکدوں کے نام بدلے
بدلنے کو ہیں میخواروں کی نظریں
بلا سے رخ نہ دورِ جام بدلے
نظامِ کہنے کی باتیں نہ کر کہ اب ساقی
نئی شراب، نئے جام کی ضرورت ہے

جون ایلیا

جونؔ کی تشنگی کا تھا خوب ہی ماجرا کہ جو
مینا بہ مینا مے بہ مے جام بہ جام ہو گیا
کیا بھلا ساغر سفال کہ ہم
ناف پیالے کو جام کر رہے ہیں
بابا الف نے شب کہا نشہ بہ نشہ کر گلے
جرعہ بہ جرعہ رنج ہے جام بہ جام رنج ہے

جگر مراد آبادی

کیوں مستِ شراب عیش و طرب تکلیف توجہ فرمائیں
آوازِ شکستِ دل ہی تو ہے آوازِ شکستِ جام نہیں
زاہد نے کچھ اس انداز سے پی ساقی کی نگاہیں پڑنے لگیں
مے کش یہی اب تک سمجھے تھے شائستہ دورِ جام نہیں
مرے ساقیا مرے ساقیا تجھے مرحبا تجھے مرحبا
تو پلائے جا تو پلائے جا اسی چشم جام بہ جام سے
تری چشمِ مست کو کیا کہوں کہ نظر نظر ہے فسوں فسوں
یہ تمام ہوش یہ سب جنوں اسی ایک گردش جام سے
مجھے چاہیے وہی ساقیا جو برس چلے جو چھلک چلے
ترے حسن شیشہ بدست سے تری چشم بادہ بہ جام سے
وہیں چشم حور پھڑک گئی ابھی پی نہ تھی کہ بہک گئی
کبھی یک بیک جو چھلک گئی کسی رند مست کے جام سے
کوئی مست ہے کوئی تشنہ لب تو کسی کے ہاتھ میں جام ہے
مگر اس پہ کوئی کرے بھی کیا یہ تو میکدے کا نظام ہے

سراج الدین ظفر

انتظار اے دل و دیدہ کہ ہزاروں اسرار
سائے کی طرح تہہ جام ابھی باقی ہیں

عبدالحمید عدم

اے گردشِ دوراں یہ کوئی سوچ کی رت ہے
کمبخت ابھی دور میں ہے جام ہمارا
صبح کا تارا پوچھ رہا ہے
کب تک دورِ جام رہے گا
مشکل یہ آ پڑی ہے کہ گردش میں جام ہے
اے ہوش ورنہ مجھ کو ترا احترام ہے
آتی بہت قریب سے خوشبو ہے یار کی
جاری ادھر ادھر ہی کہیں دورِ جام ہے
رقص کرتا ہوں جام پیتا ہوں
عام ملتی ہے عام پیتا ہوں
خالی ہے ابھی جام میں کچھ سوچ رہا ہوں
اے گردشِ ایام میں کچھ سوچ رہا ہوں
دعائیں دے کے جو دشنام لیتے رہتے ہیں
وہ جام دیتے ہیں اور جام لیتے رہتے ہیں

قمر جلالوی

جب اٹھا ساقی تو واعظ کی نہ کچھ بھی چل سکی
میری قسمت کی طرح گردش میں جام آ ہی گیا
یہ جو چھلکے ہیں، نہیں قطرے مئے گلفام کے
میری قسمت پر نکل آئے ہیں آنسو جام کے
بہار آ جائے گر وہ ساقی گلفام آ جائے
ہر اک شاخِ چمن پر پھول بن کر جام آ جائے
مرا دل ٹوٹ جانے کی صدا رسوا نہ ہو یا رب
کوئی ایسے میں شکستِ جام آ جائے
مے کدے میں جو کوئی جام بدل جاتا ہے
عالمِ گردشِ ایام بدل جاتا ہے

عرفان صدیقی

بھرا ہے اشکِ ندامت سے جام پانی کا
قبول تشنہ دلاں ہو سلام پانی کا

مجید امجد

زیست کی صہبا کی رو تھمتی نہیں، تھمتی نہیں!
ٹوٹتے رہتے ہیں نشے ، پھوٹتے رہتے ہیں جام
یہ کیسا دور ہے جس میں مجھے سننے پڑے ساقی
وبالِ ہوش کے طعنے ، شکستِ جام کے شکوے

احسان دانش

آنکھ کیا ہے حسن کی رنگینیوں کا آئنہ
دل ہے کیا خونِ تمنا کا چھلکتا جام ہے
کہاں محفل میں مجھ تک بادۂ گلفام آتا ہے
جو میرا نام آتا ہے تو خالی جام آتا ہے

اسرار الحق مجاز

ساقی گلفام باصد اہتمام آ ہی گیا
نغمہ بر لب خم بہ سر بادہ بہ جام آ ہی گیا
یہ جوانی تو ابھی مائل پیکار نہیں
یہ جوانی تو ہے رسوائے مے و جام ابھی
ابھی رہنے دے کچھ دن لطف نغمہ مستی صہبا
ابھی یہ ساز رہنے دے ابھی یہ جام رہنے دے

بشیر بدر

وہی تاج ہے وہی تخت ہے وہی زہر ہے وہی جام ہے
یہ وہی خدا کی زمین ہے یہ وہی بتوں کا نظام ہے
فلک سے چاند ستاروں سے جام لینا ہے
مجھے سحر سے نئی ایک شام لینا ہے

بیان میرٹھی

نرگس مخمور جاناں ڈال دیتی گر نگاہ
مردم چشم بتاں کی طرح کرتا جام رقص

زہرا نگاہ

گردش مینا و جام دیکھیے کب تک رہے
ہم پہ تقاضا حرام دیکھیے کب تک رہے

علی سردار جعفری

ہماری تشنگی بجھتی نہیں شبنم کے قطروں سے
جسے ساقی گری کی شرم ہو آتش بہ جام آئے

غلام محمد قاصر

بٹھا دیا مجھے دریا کے اس کنارے پر
جدھر حباب تہی جام بھی نہیں آتا

تلوک چند محروم

یاں ساغرِ دل خونِ تمنا سے بھرا ہے
پر بادۂ گلگوں سے وہاں جام تمہارا
سر مست مے کو دیکھ کے مت سوئے جام دیکھ
ساقی پلا اسی کو جسے تشنہ کام دیکھ

جلیل مانک پوری

پائے ساقی پہ توبہ لوٹ گئی
ہاتھ میں اس ادا سے جام لیا
دل جگر نذر کر دیے مے کے
دے کے دو شیشے ایک جام لیا

حسرت موہانی

سنا ہے برسر بخشش ہے آج پیرِ مغاں
ہمیں بھی کاش عطا کوئی جام ہو جائے

حفیظ ہوشیارپوری

تیری نگاہِ مست سے مجھ پہ یہ راز کھل گیا
اور بھی گردشیں ہیں کچھ گردش جام کے سوا

رسا چغتائی

جب تک دورِ جام چلے گا
ساقی تیرا نام چلے گا

شاد عظیم آبادی

اسی امید میں باندھے ہوئے ہیں ٹکٹکی میکش
کف نازک پہ ساقی رکھ کے اک دن جام آئے گا
کہاں سے لاؤں صبر حضرتِ ایوب اے ساقی
خم آئے گا صراحی آئے گی تب جام آئے گا
اسے بھی جلد اٹھا کر طاق نسیاں کے حوالے کر
نہیں پیشِ نظر جب ختم تو ساقی جام کیا ہو گا
جب قیس پہاڑ اس سر سے ٹلے عید آئی تب آئی جان میں جان
تا دیر عجب عالم میں رہے ہونٹوں کو ملائے جام سے ہم

شان الحق حقی

بکھر جائے گی شام آہستہ بولو
تڑک جائیں گے جام آہستہ بولو
ابھی تو بادۂ الفت کا حقیؔ
پیا ہے ایک جام آہستہ بولو

شکیل بدایونی

میں نظر سے پی رہا تھا تو یہ دل نے بد دعا دی
ترا ہاتھ زندگی بھر کبھی جام تک نہ پہنچے
اے شکیلؔ روح پرور تری بے خودی کے نغمے
مگر آج تک نہ ہم نے ترے لب پہ جام دیکھا
نہ پیمانے کھنکتے ہیں نہ دورِ جام چلتا ہے
نئی دنیا کے رندوں میں خدا کا نام چلتا ہے
ہائے میرا ماتم تشنہ لبی
شیشہ مل کر رو رہا ہے جام سے
وہ نگاہِ مست اٹھی گردش میں جام آ ہی گیا
یعنی وقت امتیاز خاص و عام آ ہی گیا
جو اٹھا کرتے تھے اظہار تقدس کے لیے
ان لرزتے کانپتے ہاتھوں میں جام آ ہی گیا
جانے کن نظروں سے دیکھا آج ساقی نے مجھے
میں تو یہ سمجھا کہ مجھ تک دورِ جام آ ہی گیا
ترک مے کو مدتیں گزری ہیں لیکن محتسب
ساقی مہوش اگر آتش بہ جام آ ہی گیا
توبہ کرتا ہوں کل سے پیوں گا نہیں مے کشی کے سہارے جیوں گا نہیں
میری توبہ سے پہلے مگر ساقیا صرف دے ایک جام آخری آخری
خوش ہوں کہ مرا حسنِ طلب کام تو آیا
خالی ہی سہی میری طرف جام تو آیا
رندِ خراب نوش کی بے ادبی تو دیکھیے
نیت مے کشی نہ کی ہاتھ میں جام لے لیا

عزیز حامد مدنی

یہ آپ کہاں مدنیؔ صاحب کچھ خیر تو ہے مے خانہ ہے
کیا کوئی کتاب مے دیکھی دو ایک تو دورِ جام چلے
حکایت حسنِ یار لکھنا حدیث مینا و جام کہنا
ابھی وہی کار عاشقاں ہے سکوت غم کا کلام کہنا

فانی بدایونی

اب مے میں نہ وہ کیف نہ اب جام میں وہ بات
اے کاش ترے ہاتھ سے ہم جام نہ لیتے

احمد فراز

شدت تشنگی میں بھی غیرت مے کشی رہی
اس نے جو پھیر لی نظر میں نے بھی جام رکھ دیا
جب تک ترے قدموں میں فروکش ہیں سبو کش
ساقی خط بادہ نہ لب جام سے اترے
ساقیا ایک نظر جام سے پہلے پہلے
ہم کو جانا ہے کہیں شام سے پہلے پہلے

قابل اجمیری

ہر انقلاب مبارک ہر انقلاب عذاب
شکستِ جام سے پہلے شکستِ جام کے بعد
یہ رات کچھ بھی نہیں تھی یہ رات سب کچھ ہے
طلوعِ جام سے پہلے طلوعِ جام کے بعد

قتیل شفائی

گرا ہے ٹوٹ کر شاید مری تقدیر کا تارا
کوئی آواز آئی تھی شکستِ جام سے پہلے
ان کی آنکھوں سے رکھے کیا کوئی امیدِ کرم
پیاس مٹ جائے تو گردش میں وہ جام آتے ہیں
اے تشنہ کام شوق اسے آزما کے دیکھ
وہ آنکھ صرف آنکھ نہیں جام بھی تو ہے
اک جام کھنکتا جام کہ ساقی رات گزرنے والی ہے
اک ہوش ربا انعام کہ ساقی رات گزرنے والی ہے

کلیم عاجز

ہوئے فیض مے کدہ سے سبھی فیضیاب لیکن
جو غریب تشنہ لب تھے وہی جام تک نہ پہنچے
کہتا ہوں غزل اور رہا کرتا ہوں سرشار
میرا یہی شیشہ ہے یہی جام ہے پیارے
قائم ہے سرور مئے گلفام ہمارا
کیا غم ہے اگر ٹوٹ گیا جام ہمارا
پئے بغیر کہو تو یہ تشنہ کام کہے
وہ راز مے جو صراحی کہے نہ جام کہے