عشق نا پختہ ابھی جذبِ دروں خام ابھی
اسرار الحق مجاز
دامنِ دل پہ نہیں بارش الہام ابھی
عشق نا پختہ ابھی جذبِ دروں خام ابھی
خود ہی جھکتا ہوں کہ دعوائے جنوں کیا کیجیے
کچھ گوارا بھی ہے یہ قید در و بام ابھی
یہ جوانی تو ابھی مائل پیکار نہیں
یہ جوانی تو ہے رسوائے مے و جام ابھی
واعظ و شیخ نے سر جوڑ کے بد نام کیا
ورنہ بد نام نہ ہوتی مے گلفام ابھی
میں بصد فخریہ زہاد سے کہتا ہوں مجازؔ
مجھ کو حاصل، شرف بیعت خیام ابھی
فاعِلاتن فَعِلاتن فَعِلاتن فِعْلن
رمل مثمن مخبون محذوف مقطوع