مرزا غالب

کیا زہد کو مانوں کہ نہ ہو گرچہ ریائی
پاداشِ عمل کی طمعِ خام بہت ہے

حیدر علی آتش

یہی تحصیل محبت کا ہے عالم تا حال
پختہ کرتے ہیں ہنوز آرزوئے خام کو ہم
وہ نونہال آئے الٰہی مراد پر
حاصل ہو پختگی ثمر خام کے لیے

داغ دہلوی

وہ کون تھا کہ تمہیں جس نے بے وفا جانا
خیالِ خام یہ سودائے خام کس کا تھا

مصطفٰی خان شیفتہ

ان سے نازک کو کہاں گرمیِ صحبت کی تاب
بس کلیجا نہ پکا اے طمعِ خام اپنا

مومن خان مومن

اس سے جلا کے غیر کو امید پختگی
لگ جائے آگ دل کے خیالات خام کو
آتشیں خو سے آرزوئے وصال
پک گیا اب خیالِ خام مرا

جون ایلیا

رشتۂ رنگ جاں مرا نکہت ناز سے تری
پختہ ہوا اور اس قدر یعنی کہ خام ہو گیا

جگر مراد آبادی

کاش وہ عمرِ خضر بن جائے
جن خیالات خام نے مارا

اسرار الحق مجاز

دامنِ دل پہ نہیں بارش الہام ابھی
عشق نا پختہ ابھی جذبِ دروں خام ابھی
ابھی رہنے دے دل میں شوق شوریدہ کے ہنگامے
ابھی سر میں محبت کا جنون خام رہنے دے

جوش ملیح آبادی

سبو اٹھا کہ فضا سیم خام ہے ساقی
فراز کوہ پہ ماہ تمام ہے ساقی

حسرت موہانی

عطا ہو سوز وہ یا رب جنون حسرتؔ کو
کہ جس سے پختہ یہ سودائے خام ہو جائے

سیف الدین سیف

وفا انجام ہوتی جا رہی ہے
محبت خام ہوتی جا رہی ہے

شان الحق حقی

فغانِ دل سے کس کا دل پسیجا
یہ ہے سودائے خام آہستہ بولو

فانی بدایونی

گزر گیا انتظار حد سے یہ وعدۂ ناتمام کب تک
نہ مرنے دے گی مجھے ستم گر تری تمنائے خام کب تک