مرزا غالب

بھولے سے کاش وہ ادھر آئیں تو شام ہو
کیا لطف ہو جو ابلقِ دوراں بھی رام ہو
تا گردشِ فلک سے یوں ہی صبح و شام ہو
ساقی کی چشمِ مست ہو اور دورِ جام ہو

امام بخش ناسخ

جی لیتی ہے وہ زلفِ سیہ فام ہمارا
بجھتا ہے چراغ آج سرِ شام ہمارا
طبع روشن کو نہیں خوف سیہ روزی کا
صبح محشر ہوں مجھے شام سے کچھ کام نہیں

انشاء اللہ خان انشا

گر وقتِ سحر جائیے ہوتا ہے یہ ارشاد
ہے وقت ملاقات سرِ شام ہمارا
سحر ایک ماش پھینکا مجھے جو دکھا کے ان نے
تو اشارا میں نے تاڑا کہ ہے لفظ شام الٹا
روٹھنے میں بھی لطف ہے انشاؔ
صبح گر روٹھے وہ تو شام کو ہم

بہادر شاہ ظفر

جس کو سمجھے لب پاں خوردہ وہ مالیدہ مسی
مردماں دیکھیو پھولی وہ کہیں شام نہ ہو

حیدر علی آتش

یاد رکھنے کی جگہ ہے یہ طلسم حیرت
صبح کو دیکھتے ہی بھول گئے شام کو ہم
بسکہ اس بت کی طبیعت ہے زمانے سے خلاف
صبح پوشاک سیہ ہے تو سرِ شام سفید
ہر چند اپنا نامۂِ عصیاں سیاہ ہو
ہو گا سفید صبح ہے ہر شام کے لیے
آتشؔ جو چاہے پائے توکل کے محکمے
جو صبح کو ملے نہ رہے شام کے لیے

داغ دہلوی

بن سنور کر کب بگڑتا ہے بناؤ
صبح تک رہتے ہیں جلوے شام کے
گزر گیا وہ زمانہ کہوں تو کس سے کہوں
خیالِ دل کو مرے صبح و شام کس کا تھا
جاتے جاتے پیام بر کو
ہر صبح سے شام ہو گئی ہے

مصحفی غلام ہمدانی

واژگونی جو طبیعت میں فلک کی ہے ہنوز
نظر آتا ہے زمانہ سحر و شام الٹا
کیوں تیرگی طالع کچھ تو بھی نہیں کرتی
یہ روز مصیبت کا کیوں شام نہیں ہوتا
ہو نہ ہو تو ہماری مجلس میں
تذکرہ صبح و شام ہے تیرا

مصطفٰی خان شیفتہ

دو قدم یاں سے وہ کوچہ ہے مگر
نامہ بر صبح گیا، شام آیا
یاں جیتے ہیں امیدِ شبِ وصل پر اور واں
ہر صبح توقع ہے کہ تا شام نہ ہو گا

مومن خان مومن

شاید کہ دن پھرے ہیں کسی تیرہ روز کے
اب غیر اس گلی میں نہیں پھرتے شام کو
کرتے جو مجھے یاد شبِ وصلِ عدو تم
کیا صبح کہ خورشید نہ تا شام نکلتا

فیض احمد فیض

دل ناامید تو نہیں، ناکام ہی تو ہے
لبمی ہے غم کی شام مگر شام ہی تو ہے
اب بھی اعلانِ سحر کرتا ہوا مست کوئی
داغِ دل کر کے فروزاں سرِ شام آتا ہے
جمے گی کیسے بساط یاراں کہ شیشہ و جام بجھ گئے ہیں
سجے گی کیسے شبِ نگاراں کہ دل سرِ شام بجھ گئے ہیں

مرزا رفیع سودا

مست سحر و توبہ کناں شام کا ہوں میں
قاضی کے گرفتار نت اعلام کا ہوں میں

باقی صدیقی

ہر آہِ پر نظر ہے عم صبح و شام کی
پہلی سی بات اب نہیں تیرے غلام کی
رکھ دو مرے غموں کو بھی دنیا کے سامنے
کڑیاں ہیں یہ بھی سلسلہ صبح و شام کی
لیا کس نے ابھی سے صبح کا نام
ستارے جھلملا اٹھے سرِ شام
یاد نہ آؤ صبح و شام
اور بھی ہیں دنیا کے کام
یاد آؤ نہ صبح و شام بہت
زندگی کو ہیں اور کام بہت
جو ہم بدلے و کوئی بھی نہ بدلا
جو تم بدلے تو صبح و شام بدلے

جون ایلیا

رنج ہے حالت سفر حال قیام رنج ہے
صبح بہ صبح رنج ہے شام بہ شام رنج ہے

جگر مراد آبادی

تری صبح عیش ہے کیا بلا تجھے اے فلک جو ہو حوصلہ
کبھی کر لے آ کے مقابلہ غم ہجرِ یار کی شام سے
وعدۂ ناتمام نے مارا
روز کی صبح و شام نے مارا

سراج الدین ظفر

اک سبو اور کہ لوحِ دل مے نوشاں پر
کچھ نقوش سحر و شام ابھی باقی ہیں
اک سبو اور کہ لوحِ دل مے نوشاں پر
کچھ نقوش سحر و شام ابھی باقی ہیں

عبدالحمید عدم

کر بیٹھے ہیں ہم بھول کے توبہ جو سحر کو
شیشے کو تعاقب ہے سرِ شام ہمارا
مے پینا عدمؔ اور قدم چومنا ان کے
ہے شغل یہی اب سحر و شام ہمارا
ساقی سیاہ خانۂ ہستی میں دیکھنا
روشن چراغ کس نے سرِ شام کر دیا
زہاد کی مالا نہیں جو رات کو نکلے
رندوں کا پیالہ ہے سرِ شام چلے گا
پھر آج عدمؔ شام سے غمگیں ہے طبیعت
پھر آج سرِ شام میں کچھ سوچ رہا ہوں
یہ نام ایسا ہے بالکل ہی گر نہ لیں اس کو
تو پھر بھی ہم سحر و شام لیتے رہتے ہیں

قمر جلالوی

ہم نہ کہتے تھے کہ صبح شام کے وعدے نہ کر
اک مریضِ غم قریبِ صبح شام آ ہی گیا
غفلت خوابِ جوانی عہدِ پیری میں کیا
صبح کو اٹھ بیٹھتے ہیں سونے والے شام کے
دیدہ میگوں نہ دکھلا روئے روشن کھول کر
صبح کو پیتے نہیں ہیں پینے والے شام کے
اے قمر بزمِ حسیناں کی وہ ختمِ شب نہ پوچھ
صبح کو چھپ جائیں جیسے چاند تارے شام کے
ان کے جاتے ہی مری آنکھوں میں دنیا ہے سیاہ
اب نہیں معلوم ہوتا صبح ہے یا شام ہے
قافلے سے چھوٹنے والے ابھی منزل کہاں
دور تک سنسان جنگل ہے پھر آگے شام ہے
دیدۂ بیمار میں ہے اشکِ آخر کی جھلک
اے قمر تارا نکل آنا دلیلِ شام ہے
قمر اس آبلہ پا راہ رو کی بے بسی توبہ
کہ منزل سامنے ہو اور سر پر شام آ جائے
خواب میں رخ پہ آ جاتے ہیں ان کے گیسو
انتظامِ سحر و شام بدل جاتا ہے
اے قمر ہجر کی شب کاٹ تو لیتا ہوں مگر
رنگ چہرے کا سرِ شام بدل جاتا ہے

شکیب جلالی

ستارے مشعلیں لے کر مجھے بھی ڈھونڈنے نکلیں
میں رستہ بھول جاؤں ‘ جنگلوں میں شام ہو جائے
منظر تھا اک اجاڑ نگاہوں کے سامنے
کیا کیا نہ رنگ بھر دیے افسونِ شام نے

عرفان صدیقی

شہر نے امید کی چادر اوڑھی دور اذان شام ہوئی
سوچ کی کہنہ سرائے میں روشن مشعل بام ہوئی
علم ہوا سر نیزہ جو ایک مشکیزہ
شجر لگا سرِ صحرائے شام پانی کا
شب کے مسافر اور پھر ایسی شب کے مسافر
دیکھ ہماری آس چراغِ شام نہ رکھنا
وہ جس کو نانِ جویں بخش دیں اسی کے لیے
خراج مملکت روم و شام سے آئے

مجید امجد

اے تیرگیوں کی گھومتی رو، کوئی تو رسیلی صبح
اے روشنیوں کی ڈولتی لو، اک شام، نشیلی شام
کیا گریباں چاک صبح اور کیا پریشاں زلف شام
وقت کی لامنتہی زنجیر کی کڑیاں تمام

مصطفی زیدی

کیا جانیے کیا بیت گئی دن کے سفر میں
وہ منتظرِ شام سرِ شام نہ آیا

الطاف حسین حالی

ہے وقت راحیل اور وہی عشرت کے ہیں ساماں
آخر ہوئی رات اور ابھی شام ہے گویا
گو صبح بھی تھی روز مصیبت کی قیامت
پر صبح تو جوں توں کٹی اب شام ہے درپیش

جمال احسانی

کیا کہوں اوبنے لگا ہوں جمالؔ
ایک ہی جیسے صبح و شام سے میں
گھر سے جاتا ہوں روز شام سے میں
رات بھر کے پروگرام سے میں
کسی نے پوچھا نہیں لوٹتے ہوئے مجھ سے
میں آج کیسے بھلا گھر میں شام سے آیا

رئیس فروغؔ

سڑکوں پہ گھومنے کو نکلتے ہیں شام سے
آسیب اپنے کام سے ہم اپنے کام سے
خوف کو میں نے ہنر بنایا دیکھ ایسا چالاک ہوں میں
تیرا نام نہیں لیتا ہوں برکھا رت کی شام کہوں

ادا جعفری

تاروں سے سجا لیں گے رہ شہرِ تمنا
مقدور نہیں صبح چلو شام ہی آئے

آنس معین

تھا انتظار منائیں گے مل کے دیوالی
نہ تم ہی لوٹ کے آئے نہ وقت شام ہوا

بہزاد لکھنوی

وہی خلش وہی سوزش وہی تپش وہی درد
ہمیں سحر بھی بہ انداز شام ہوتی ہے

بشیر بدر

ہے عجیب شہر کی زندگی نہ سفر رہا نہ قیام ہے
کہیں کاروبار سی دوپہر کہیں بد مزاج سی شام ہے
نہ اداس ہو نہ ملال کر کسی بات کا نہ خیال کر
کئی سال بعد ملے ہیں ہم ترے نام آج کی شام ہے
فلک سے چاند ستاروں سے جام لینا ہے
مجھے سحر سے نئی ایک شام لینا ہے

بیان میرٹھی

ابلق چشم بتاں کی شوخیاں چکرا گئیں
آسماں پر مہر و مہ کرتے ہیں صبح و شام رقص
عیش جاوید ان کو حاصل ہے جو ہیں تیری طرف
طائر قبلہ نما کرتا ہے صبح و شام رقص

زہرا نگاہ

صبح کے سورج کی ضو دیکھیے کب تک نہ آئے
دہر پہ یہ رنگ شام دیکھیے کب تک رہے

سدرشن فاکر

ہر شام یہ سوال محبت سے کیا ملا
ہر شام یہ جواب کہ ہر شام رو پڑے

ظہیر کاشمیری

دن ڈھلنے لگا دل زدگاں دل کی خبر لو
اک سلسلۂ حجاز بھی ہے شام کے آگے

علی سردار جعفری

یہ عالم لذت تخلیق کا ہے رقص لافانی
تصور خانۂ حیرت میں لاکھوں صبح و شام آئے

احمد راہی

تنگ‌ دستو تہی دامانو کرو شکر خدا
مئے گلفام نہیں ہے شفق شام تو ہے

تلوک چند محروم

جچتے نہیں نظروں میں مہ و مہر کے جلوے
رہتا ہے تصور سحر و شام تمہارا
کچھ کہہ رہی ہیں تجھ سے ستاروں کی چشمکیں
چشم یقیں سے جلوۂ نیرنگ شام دیکھ

جلیل مانک پوری

ترک مے کی ہوئی تلافی یوں
نام ساقی کا صبح و شام لیا

حفیظ ہوشیارپوری

آہ کوئی نہ کر سکا چارۂ تلخی فراق
نالۂ صبح کے بغیر گریۂ شام کے سوا

رسا چغتائی

کوئی نرم ہوا کا جھونکا
صبح نہیں تو شام چلے گا

سیف الدین سیف

ذرا چہرے سے زلفوں کو ہٹا لو
یہ کیسی شام ہوتی جا رہی ہے

سیماب اکبر آبادی

شامِ فرقت انتہائے گردشِ ایام ہے
جتنی صبحیں ہو چکی ہیں آج سب کی شام ہے

شاد عظیم آبادی

کسی کو کیا خبر اے صبح وقتِ شام کیا ہو گا
خدا جانے ترے آغاز کا انجام کیا ہو گا
سحر فرقت کی ہے اور غش پہ غش آتے ہیں عاشق کو
ابھی سے جب یہ حالت ہو گئی تا شام کیا ہو گا
یہ رات بھیانک ہجر کی ہے کاٹیں گے بڑے آلام سے ہم
ٹلنے کی نہیں یہ کالی بلا سمجھے ہوئے تھے شام سے ہم

شان الحق حقی

بکھر جائے گی شام آہستہ بولو
تڑک جائیں گے جام آہستہ بولو
نہ جانے کون بیٹھا ہو کمیں میں
اندھیری ہے یہ شام آہستہ بولو

شکیل بدایونی

یوں تو ہر شام امیدوں میں گزر جاتی ہے
آج کچھ بات ہے جو شام پہ رونا آیا
نئی صبح پر نظر ہے مگر آہ یہ بھی ڈر ہے
یہ سحر بھی رفتہ رفتہ کہیں شام تک نہ پہنچے
جنون رہروی وقت کی رفتار سے پوچھو
کوئی منزل نہیں لیکن یہ صبح و شام چلتا ہے
صبح کا افسانہ کہہ کر شام سے
کھیلتا ہوں گردشِ ایام سے
صبح‌ گلشن دیکھیے کیا گل کھلائے
کچھ ہوا بدلی ہوئی ہے شام سے
اب اسی کو زندگی کہہ لیجیے یا صبح مرگ
آنکھ کھولی تھی کہ سر پر وقتِ شام آ ہی گیا
آخری وقت ہے آخری سانس ہے زندگی کی ہے شام آخری آخری
سنگ دل آ بھی جا اب خدا کے لیے لب پہ ہے تیرا نام آخری آخری
بادہ کشانِ عشق کو کچھ تو ملا پئے سکوں
حسن سحر نہ لے سکے جلوۂ شام لے لیا

عزیز حامد مدنی

اے وادی غم یہ موجِ ہوا اک ساز راہ سپاراں ہے
رکتی ہوئی رو خوابوں کی کوئی یا صبح چلے یا شام چلے
تجھ کو تو ہواؤں کی زد میں کچھ رات گئے تک جلنا ہے
اک ہم کہ ترے جلتے جلتے بستی سے چراغِ شام چلے
ہزار ہاتھوں سے میں نے جس کو سنبھال رکھا تھا زندگی میں
چراغ بر کف بساطِ دل پر کھڑی ہوئی ہے وہ شام کہنا

فانی بدایونی

حد تھی یہ بیتابی دل کی جانیے اب کیا ہونا ہے
صبر کی حد بھی ہونے آئی صبح نہیں یا شام نہیں
اس نے دیکھا ہے شام کا منظر
جس نے دیکھی ہے بیکسوں کی شام
وہ آئے یا وعدے پر نہ آئے بلا سے قسمت جو کچھ دکھا دے
مگر ہمیں دیکھنا تو یہ ہے کہ آج ہوتی ہے شام کب تک

احمد فراز

آمد دوست کی نوید کوئے وفا میں عام تھی
میں نے بھی اک چراغ سا دل سرِ شام رکھ دیا
آنکھوں میں ستارے تو کئی شام سے اترے
پر دل کی اداسی نہ در و بام سے اترے
ساقیا ایک نظر جام سے پہلے پہلے
ہم کو جانا ہے کہیں شام سے پہلے پہلے
سامنے عمر پڑی ہے شبِ تنہائی کی
وہ مجھے چھوڑ گیا شام سے پہلے پہلے

فراق گورکھپوری

غم کدے میں دہر کے یوں تو اندھیرا تھا مگر
عشق کا داغ سیہ بختی چراغِ شام تھا
محو تھے گلزار رنگا رنگ کے نقش و نگار
وحشتیں تھی دل کے سناٹے تھے دشت شام تھا

قابل اجمیری

وہ ہر مقام سے پہلے وہ ہر مقام کے بعد
سحر تھی شام سے پہلے سحر ہے شام کے بعد
چراغ بزم ستم ہیں ہمارا حال نہ پوچھ
جلے تھے شام سے پہلے بجھے ہیں شام کے بعد

قتیل شفائی

نہ جانے کیوں ہمیں اس دم تمہاری یاد آتی ہے
جب آنکھوں میں چمکتے ہیں ستارے شام سے پہلے
ہم پہ ہو جائیں نہ کچھ اور بھی راتیں بھاری
یاد اکثر وہ ہمیں اب سرِ شام آتے ہیں
کر تو لیا ہے قصد عبادت کی رات کا
رستے میں جھومتی ہوئی اک شام بھی تو ہے
گرمی حسرت ناکام سے جل جاتے ہیں
ہم چراغوں کی طرح شام سے جل جاتے ہیں
پو پھٹے کیوں مری پلکوں پہ سجاتے ہو انہیں
یہ ستارے تو مجھے شام سے پہچانتے ہیں
سایۂ زلفِ سیہ فام کہاں تک پہنچے
جانے یہ سلسلۂ شام کہاں تک پہنچے

کلیم عاجز

مری صبحِ غم بلا سے کبھی شام تک نہ پہنچے
مجھے ڈر یہ ہے برائی ترے نام تک نہ پہنچے
ہو کسی کا مجھ پہ احساں یہ نہیں پسند مجھ کو
تری صبح کی تجلی مری شام تک نہ پہنچے
تیرے ہی تبسم کا سحر نام ہے پیارے
تو کھول دے گیسو تو ابھی شام ہے پیارے
تجھے کلیمؔ کوئی کیسے خوش کلام کہے
جو دن کو رات بتائے سحر کو شام کہے

مجروح سلطان پوری

غمِ حیات نے آوارہ کر دیا ورنہ
تھی آرزو کہ ترے در پہ صبح و شام کریں

محسن احسان

وہ سب چراغ کہ تھی جن میں روشنی کی رمق
بجھا دیے گئے بستی میں شام سے پہلے

ناصر کاظمی

تم آ گئے ہو تو کیوں انتظارِ شام کریں
کہو تو کیوں نہ ابھی سے کچھ اہتمام کریں