داغ دہلوی

گلے شکوے جھوٹے بھی تھے کس مزے کے
ہم الزام دانستہ کھائے گئے ہیں

شیخ ابراہیم ذوق

سنگ پر سنگ ہر اک کوچہ میں کھائے تو سہی
پر بلا سے ترے دیوانے کھائے تو سہی

مصحفی غلام ہمدانی

نگاہِ غور سے ٹک مصحفیؔ کی جانب دیکھ
جگر پہ اس نے ترے زخم کھائے ہیں کیا کیا

مصطفٰی خان شیفتہ

مرتی ہیں گل کے نام پہ ہی بلبلیں کہ اب
پھرتی ہیں ساتھ ساتھ مرے جب سے کھائے گل

میر مہدی مجروح

غم ہمیں کھا رہا ہے تو کیا غم
ہم بھی تو غم کو کھائے بیٹھے ہیں

یگانہ چنگیزی

گزر کے آپ سے ہم آپ تک پہنچ تو گئے
مگر خبر بھی ہے کچھ پھیر کھائے ہیں کیا کیا

باقی صدیقی

ہر طرف بکھرے ہیں رنگیں سائے
راہرو کوئی نہ ٹھوکر کھائے

قمر جلالوی

انہیں کیوں پھول دشمن عید میں پہنائے جاتے ہیں
وہ شاخِ گل کی صورت ناز سے بل کھائے جاتے ہیں

الطاف حسین حالی

عیب سے خالی نہ واعظ ہے نہ ہم
ہم پہ منہ آئے گا منہ کی کھائے گا

احسان دانش

یہی ہے لطف محبت یہی ہے کیف حیات
حقیقتوں کی بنا پر فریب کھائے جا

حفیظ جالندھری

خضر کا ساتھ دیے جا قدم بڑھائے جا
فریب کھائے ہوئے کا فریب کھائے جا
اناڑیوں سے تجھے کھیلنا پڑا اے دوست
سجھا سجھا کے نئی چال مات کھائے جا

حفیظ ہوشیارپوری

حفیظؔ اپنا مقدر حفیظؔ اپنا نصیب
گرے تھے پھول مگر ہم نے زخم ہی کھائے

سیف الدین سیف

دیکھ بھال کر زہر پیا ہے
سوچ سمجھ کر دھوکے کھائے

اختر ہوشیارپوری

وہ ایک شعلۂ جوالہ جو چھوئے جل جائے
مگر خود اپنے ہی سائے سے خوف کھائے وہ

فراق گورکھپوری

دو چار برقِ تجلی سے رہنے والوں نے
فریب نرم نگاہی کے کھائے ہیں کیا کیا

قتیل شفائی

اعتبار اس کا ہمیشہ کرنا
وہ تو جھوٹی بھی قسم کھائے گا
اتنے اونچے مرتبے تک تجھ کو پہنچائے گا کون
میں ہوا منکر تو پھر تیری قسم کھائے گا کون

کلیم عاجز

دیوانہ گل قیدی زنجیر ہیں اور تم
کیا ٹھاٹ سے گلشن کی ہوا کھائے چلو ہو
زلفوں کی تو فطرت ہی ہے لیکن مرے پیارے
زلفوں سے زیادہ تمہیں بل کھائے چلو ہو

کیف بھوپالی

اعتکاف میں زاہد منہ چھپائے بیٹھا ہے
غالباً زمانے سے مات کھائے بیٹھا ہے
دور باش اے گلچیں وا ہے دیدۂ نرگس
آج ہر گل نازک خار کھائے بیٹھا ہے

مجروح سلطان پوری

ہوں جو سارے دست و پا ہیں خوں میں نہلائے ہوئے
ہم بھی ہیں اے دل بہاراں کی قسم کھائے ہوئے

ناصر کاظمی

رنگ پیلا ہے تیرا کیوں ناصر
تجھے کیا رنج کھائے جاتا ہے