مصحفی غلام ہمدانی

بوسہ نہ لے سکے کف پا کا ادب سے ہم
کاٹیں ہیں اس لیے کفِ افسوس شب سے ہم
طرز خرامِ ناز کی بے اعتدالیاں
دیکھیں ہیں اور کچھ نہیں کہتے ادب سے ہم
گل نہیں مصحفیؔ کا دل ہے یہ
اس کو اے بے ادب زمیں سے اٹھا

مصطفٰیٰ خان شیفتہ

میں وصل میں بھی شیفتہ حسرت طلب رہا
گستاخیوں میں بھی مجھے پاسِ ادب رہا
تمکینِ حسن ہے کہ نہ بے تاب ہو سکا
خلوت میں بھی کوئی قلقِ بے ادب تلک
دیوانہ میں نہیں کہ انا لیلیٰ لب پہ آئے
باتیں خلافِ وضع ہیں اہلِ ادب سے دور

فیض احمد فیض

ہوا ہے جب سے دلِ ناصبور بے قابو
کلام تجھ سے نظر کو بڑے ادب سے ہے

باقی صدیقی

دل جھکا جاتا ہے سرسے پہلے
اس سے بڑھ کر بھی ادب کیا ہو گا

قمر جلالوی

ساقی کی بزم میں یہ نظامِ ادب رہا
جس نے اٹھائی آنکھ وہی تشنہ لب رہا
سرکار پوچھتے ہیں کہ خفا ہو کے حالِ دل
بندہ نواز میں تو بتانے سے ادب رہا

رئیس فروغؔ

ذرا بھی تیز ہوا شعلۂ نوا تو یہ لوگ
یہی کہیں گے کہ درویش بے ادب ہے میاں

احسان دانش

خول ہی خول ہے نوخیز دبستان خیال
شور ہی شور ہے تخلیق ادب کچھ بھی نہیں
میری تخریب سے یاروں کا بھلا کیا ہو گا
میری پونجی تو بجز ذوق ادب کچھ بھی نہیں

ضیا جالندھری

برا نہ مان ضیاؔ اس کی صاف گوئی کا
جو درد مند بھی ہے اور بے ادب بھی نہیں

عبید اللہ علیم

عجب تھے حرف کی لذت میں جلنے والے لوگ
کہ خاک ہو گئے خوئے ادب نہیں آئی

خاطر غزنوی

فریاد بھی ہے سوئے ادب اپنے شہر میں
ہم پھر رہے ہیں مہر بلب اپنے شہر میں

عزیز حامد مدنی

کاذب صحافتوں کی بجھی راکھ کے تلے
جھلسا ہوا ملے گا ورق در ورق ادب

فراق گورکھپوری

بے ہودہ سری سجدے میں ہے جان کھپانا
آئین محبت میں ادب اور ہی کچھ ہے

کلیم عاجز

رکھا کہاں ہے عشق نے عاجزؔ کو ہوش میں
مت چھیڑیو اگر کہیں وہ بے ادب ملے

محسن نقوی

جو تری زلف سے اترے ہوں مرے آنگن میں
چاندنی ایسے اندھیروں کا ادب کرتی ہے