مصحفی غلام ہمدانی

آغوش میں ہے وہ اور پہلو مرا خالی ہے
معشوق مرا گویا تصویرِ خیالی ہے
ہر چند کہ بات اپنی کب لطف سے خالی ہے
پر یار نہ سمجھیں تو یہ بات نرالی ہے

یگانہ چنگیزی

اور امڈے گا دلِ زار جہاں تک چھیڑو
یہ بھی کیا کوئی خزانہ ہے کہ خالی ہو گا
دل دھڑکنے لگا پھر صبحِ جدائی آئی
پھر وہی درد وہی پہلوئے خالی ہو گا
یہ تو فرمائیے کیا ہم میں رہے گا باقی
دل اگر دردِ محبت سے بھی خالی ہو گا

باقی صدیقی

دل دھڑکتا ہے جام خالی ہے
کوئی تو بات ہونے والی ہے
سب کو احساس سے خالی نہ سمجھ
دردمندوں کو سوالی نہ سمجھ

عرفان صدیقی

مال کیا پاس ترے ہمتِ عالی بھی نہیں
اتنا خالی تو مرا کاسۂ خالی بھی نہیں
میری دھرتی جس پہ برسوں سے گھٹا برسی نہیں
آسماں کو تک رہی ہے کاسۂ خالی لیے
دل کی زمیں تک روشنیاں ہیں، پانی ہے ، ہریالی ہے
اس کے آگے کچھ بھی نہیں ہے سارا منظر خالی ہے

ماجد صدیقی

ہم نے تو درد سے بھی آنکھ لڑا لی یارو
پھر بھی امید کی آغوش ہے خالی یارو

جلیل مانک پوری

دل لیا پہلی نظر میں آپ نے
اب ادا کوئی نہ خالی جائے گی

ثروت حسین

کسی ان داتا پر گر جاتا
اک سکہ کاسۂ خالی پر

شبلی نعمانی

اور پھر کس کو پسند آئے گا ویرانۂ دل
غم سے مانا بھی کہ اس گھر کو میں خالی کر لوں

احمد فراز

وہ مروت سے ملا ہے تو جھکادوں گردن
میرے دشمن کا کوئی وار نہ خالی جائے
دل گرفتہ ہی سہی بزم سجالی جائے
یاد جاناں سے کوئی شام نہ خالی جائے

اقبال ساجد

اک طبیعت تھی سو وہ بھی لاابالی ہو گئی
ہائے یہ تصویر بھی رنگوں سے خالی ہو گئی
کھینچ ڈالا آنکھ نے سب آسمانوں پر حصار
بن چکے جب دائرے پرکار خالی ہو گئی
صبح کو دیکھا تو ساجدؔ دل کے اندر کچھ نہ تھا
یاد کی بستی بھی راتوں رات خالی ہو گئی
غار سے سنگ ہٹایا تو وہ خالی نکلا
کسی قیدی کا نہ کردار مثالی نکلا

محسن احسان

لباس تن پہ سلامت ہیں ہاتھ خالی ہیں
ہم ایک ملکِ خدا داد کے سوالی ہیں
آنکھ تشنہ بھی نہیں ہونٹ سوالی بھی نہیں
یہ صراحی کہ بھری بھی نہیں خالی بھی نہیں

نوح ناروی

لوٹتا ہے دل تڑپتا ہے جگر
کوئی اپنے کام سے خالی نہیں
میں تردد سے کبھی خالی نہیں
عاشقی میں فارغِ البالی نہیں