مصحفی غلام ہمدانی

بالیں پہ جب آیا ہے بیمار کی تو اپنے
تب روح کے قابض نے جان اس کی نکالی ہے

عرفان صدیقی

نقشِ پا ڈھونڈنے والوں پہ ہنسی آتی ہے
ہم نے ایسی تو کوئی راہ نکالی بھی نہیں
دستِ خالی پہ کیا حوصلہ کیجیے کیسے جینے کی قیمت ادا کیجیے
اب کے دربار میں نذرِ سر بھیج کر بچ نکلنے کی صورت نکالی گئی
قیس گیا فرہاد گیا اب جو چاہو اعلان کرو
یارو کس نے جنگل دیکھا، کس نے نہر نکالی ہے

ماجد صدیقی

عظمت رفتۂ فن لوٹ کے آتی دیکھو
طرز اب کے ہے وہ ماجدؔ نے نکالی یارو

جلیل مانک پوری

وہ سنورتے ہیں مجھے اس کی ہے فکر
آرزو کس کی نکالی جائے گی
کیا کہوں دل توڑتے ہیں کس لیے
آرزو شاید نکالی جائے گی
گرمیِ نظارہ بازی کا ہے شوق
باغ سے نرگس نکالی جائے گی
اے تمنا تجھ کو رو لوں شام وصل
آج تو دل سے نکالی جائے گی

احمد فراز

مصحفِ رخ ہے کسی کا کہ بیاضِ حافظ
ایسے چہرے سے کبھی فال نکالی جائے