مرزا غالب

رہا گر کوئی تا قیامت سلامت
پھر اک روز مرنا ہے حضرت سلامت
اس فتنہ خو کے در سے اب اٹھتے نہیں اسدؔ
اس میں ہمارے سر پہ قیامت ہی کیوں نہ ہو

انشاء اللہ خان انشا

کر دیا مجتہد وقت کو قاتل جھٹ پٹ
ہم نے مسجد میں کل ایسے ہی قیامت کی بحث

داغ دہلوی

ہوش آتے ہی حسینوں کو قیامت آئی
آنکھ میں فتنہ گری دل میں شرارت آئی
اس ادا سے دم رفتار قیامت آئی
ایسے ہم کیوں نہ ہوئے ان کو یہ حسرت آئی
روزِ محشر جو مری داد کی نوبت آئی
یہ گئی وہ گئی کب ہاتھ قیامت آئی
حشر کا وعدہ بھی کرتے نہیں وہ کہتے ہیں
فرض کر لو جو کئی بار قیامت آئی
کھیل سمجھے تھے لڑکپن کو تیرے
بیٹھتے اٹھتے قیامت ہو گئی
قدم قدم پہ تمہارے ہمارے دل کی طرح
بسی ہوئی ہے قیامت کسی کو کیا معلوم
ابھی تو فتنے ہی برپا کیے ہیں عالم میں
اٹھائیں گے وہ قیامت کسی کو کیا معلوم

شیخ ابراہیم ذوق

پھر چلا مقتل عشاق کی جانبِ قاتل
سر پہ برپا کہیں کشتوں کے قیامت نہ کرے

قمر جلالوی

مجھ کو شکوہ ہے ستم کا تم کو انکارِ ستم
فیصلہ یہ ہو نہیں سکتا قیامت کے بغیر
کسی نو گرفتارِ الفت کے دل پر یہ آفت نہیں ہے تو پھر اور کیا ہے
سرِ بزم پہلو میں بیٹھا ہے دشمن قیامت نہیں ہے تو پھر اور کیا ہے
صرف اک امیدِ وعدہ پہ قائم حیات ہے
محشر میں تم ملو گے قیامت کی بات ہے

عرفان صدیقی

موجِ خوں ہو کہ ترے شہر کی دلدار ہوا
یار، جو سر سے گزر جائے قیامت ہے وہی
مشکل تو یہی ہے کہ قیامت نہیں آتی
قاتل مرا میدان قیامت میں تو آئے

احسان دانش

محبت رفتہ رفتہ ڈھل رہی ہے وضع داری میں
یہ کس رفتار سے برپا قیامت ہوتی جاتی ہے
نہ ہو میرے نہ تم مجھ کو کسی کا ہونے دیتے ہو
قیامت کیا یہ بالائے قیامت ہوتی جاتی ہے

بیان میرٹھی

آئیں گے گر انہیں غیرت ہوگی
وہ نہ آئے تو قیامت ہوگی

رسا چغتائی

ایک تو جاں گسل ہے تنہائی
اس پہ ہم سائیگی قیامت ہے

شکیل بدایونی

تقدیر کی گردش کیا کم تھی اس پر یہ قیامت کر بیٹھے
بے تابی دل جب حد سے بڑھی گھبرا کے محبت کر بیٹھے
بیت گیا ہنگام قیامت روزِ قیامت آج بھی ہے
ترکِ تعلق کام نہ آیا ان سے محبت آج بھی ہے
تنہائی فراق سے گھبرا رہا ہوں میں
میرے لیے سکوں بھی قیامت ہے آج کل

فانی بدایونی

محشر میں بھی وہ عہدِ وفا سے مکر گئے
جس کی خوشی تھی اب وہ قیامت نہیں رہی

احمد فراز

ہر گھر کا دیا گل نہ کرو تم کہ نہ جانے
کس بام سے خورشیدِ قیامت نکل آئے

فراق گورکھپوری

زندگی کیا موت کیا دو کروٹیں ہیں عشق کی
سونے والے چونک اٹھیں گے قیامت بھی تو ہو
آئی ہے کچھ نہ پوچھ قیامت کہاں کہاں
اف لے گئی ہے مجھ کو محبت کہاں کہاں
شکل انسان کی ہو چال بھی انسان کی ہو
یوں بھی آتی ہے قیامت مجھے معلوم نہ تھا

کلیم عاجز

بیاں جب کلیمؔ اپنی حالت کرے ہے
غزل کیا پڑھے ہے قیامت کرے ہے

محسن احسان

میں نہ غم خوار شہنشہ نہ طلب گار کل
مجھ پہ کس واسطے آشوب قیامت اترا

محسن نقوی

وہ مجھ سے بڑھ کے ضبط کا عادی تھا جی گیا
ورنہ ہر ایک سانس قیامت اسے بھی تھی

ناصر کاظمی

تیرے قریب رہ کے بھی دل مطمئن نہ تھا
گذری ہے مجھ پہ یہ بھی قیامت کبھی کبھی