مصحفی غلام ہمدانی

جان دروازے پر اس کے ہی میں جا کر دوں گا
اضطرابِ دل اگر مجھ کو اماں دیتا ہے

باقی صدیقی

جو نہیں چاہتا اماں تیری
مانگ کر غیر سے اماں دیکھے

جون ایلیا

عمریں گزر گئی تھیں ہم کو یقیں سے بچھڑے
اور لمحہ اک گماں کا صدیوں میں بے اماں تھا
خود میں بھی بے اماں ہوں میں تجھ میں بھی بے اماں ہوں میں
کون سہے گا اس کا غم وہ جو مری اماں میں ہے
ہم تو جیسے وہاں کے تھے ہی نہیں
بے اماں تھے اماں کے تھے ہی نہیں
روشنی بھر گئی نگاہوں میں
ہو گئے خواب بے اماں جاناں
ہجر کی جاں کنی تمام ہوئی
دل ہوا جونؔ بے اماں چپ رہ
یار سکھ نیند ہو نصیب ان کو
دکھ یہ ہے دکھ ہیں بے اماں ان کے

قمر جلالوی

کہا تو ہے کہ قفس میں نہیں اماں صیاد
خدا کرے کے سمجھ لے مری زباں صیاد

عرفان صدیقی

انہیں کے سامنے اپنا مرافعہ لے جاؤ
انہیں کے پاس ہے اذنِ اماں علیؑ سے کہو

ادا جعفری

دل کی آبادیوں کو پوچھو ہو
روشنی برق بے اماں سے ہوئی

تلوک چند محروم

اجاڑی جائے گی کب تک زمیں از بہر آبادی
لڑی جائیں گی جنگیں از پئے امن و اماں کب تک
دور دنیا سے کہیں اے طبع مضموں آفریں
اک خیالی عالم‌‌ امن و اماں پیدا کریں
کاوشوں سے اماں ملے نہ ملے
پھر ترا آستاں ملے نہ ملے

سیماب اکبر آبادی

چمک جگنو کی برق بے اماں معلوم ہوتی ہے
قفس میں رہ کے قدر آشیاں معلوم ہوتی ہے

شان الحق حقی

دل ہے یوں بے دلی ہوش کے ہاتھوں لرزاں
کوئی قاتل سے طلب گار اماں ہو جیسے

فراق گورکھپوری

اچھے ہیں جہاں ہیں مگر اے دامن جاناں
پاتے ہیں جو تجھ میں وہ اماں اور ہی کچھ ہے

ناصر کاظمی

یوں نہ گھبرائے ہوے پھرتے تھے
دل عجب کنجِ اماں تھا پہلے