پھر ترا آستاں ملے نہ ملے
تلوک چند محروم
کاوشوں سے اماں ملے نہ ملے
پھر ترا آستاں ملے نہ ملے
اب قفس ہی کو آشیاں کہیے
راحت آشیاں ملے نہ ملے
دل سے رہتے ہیں مشورے دن رات
ہم سخن ہم زباں ملے نہ ملے
محوِ فریاد ہم ہیں آج کہ پھر
فرصتِ یک فغاں ملے نہ ملے
علم آہ سر بلند ہے آج
کل ہمارا نشاں ملے نہ ملے
تو تو بیتاب ہے مگر اے دل
ہو کے وہ مہرباں ملے نہ ملے
یہ غزل جوشؔ کو سنا محرومؔ
پھر کوئی نکتہ داں ملے نہ ملے
فاعِلاتن مفاعِلن فِعْلن
خفیف مسدس مخبون محذوف مقطوع