مرزا غالب

سب کے دل میں ہے جگہ تیری، جو تو راضی ہوا
مجھ پہ گویا، اک زمانہ مہرباں ہو جائے گا
ہم کو ستم عزیز، ستم گر کو ہم عزیز
نا مہرباں نہیں ہے اگر مہرباں نہیں
نکالا چاہتا ہے کام کیا طعنوں سے تو غالب
ترے بے مہر کہنے سے وہ تجھ پر مہرباں کیوں ہو

حیدر علی آتش

شبِ وصل تھی چاندنی کا سماں تھا
بغل میں صنم تھا خدا مہرباں تھا
غم و غصہ و رنج و اندوہ و حرماں
ہمارے بھی ہیں مہرباں کیسے کیسے

داغ دہلوی

نہ جانا کہ دنیا سے جاتا ہے کوئی
بہت دیر کی مہرباں آتے آتے

مصحفی غلام ہمدانی

کھڑے دیکھتے کیا ہو پھر آئیے
کرم کیجیے مہرباں بیٹھیے
یار ہیں چیں بر جبیں سب مہرباں کوئی نہیں
ہم سے ہنس کر بولنے والا یہاں کوئی نہیں

مصطفٰی خان شیفتہ

دل کا گلہ فلک کی شکایت یہاں نہیں
وہ مہرباں نہیں تو کوئی مہرباں نہیں
ہرگز ابھی شکایتِ دشمن نہ چاہیے
ہم پر بھی یار خوب نہیں مہرباں ہنوز

میر مہدی مجروح

کوئی اس عہد میں نہیں ہے شفیق
آپ اپنے پہ مہرباں ہوں میں
دشمنی ہم کریں تو کس کس سے
ایک عالم پہ مہرباں ہو تم

فیض احمد فیض

اب جہاں مہرباں نہیں کوئی
کوچہء یار مہرباں ہے وہی

یگانہ چنگیزی

شکوۂ‌ دردِ جگر اے مہرباں کیوں کر کریں
آپ سن کیوں کر سکیں اور ہم بیاں کیوں کر کریں
پھاندنا دیوار جنت کا تو آساں ہے مگر
آپ کے دل میں جگہ اے مہرباں کیوں کر کریں

باقی صدیقی

کوئی سمجھے تجھے نا مہرباں کیوں
مگر تجھ سے ہے دنیا بدگماں کیوں
کیا تم سے گلہ کہ مہرباں ہو
جیتے رہو، خوش رہو، جہاں ہو
غم اور خوشی کے راستے آ کر جہاں ملے
کچھ مہرباں جدا ہوئے کچھ مہرباں ملے
کس کس سے بچائے کوئی دل کو
ہر گام پہ ایک مہرباں ہے
آپ کی یا جہاں کی بات کریں
کون سے مہرباں کی بات کریں
یہی جہاں تھا، یہی گردش جہاں تھی کبھی
وہ مہرباں تھے تو ہر چیز مہرباں تھی کبھی
یہی جہاں تھا، یہی گردش جہاں تھی کبھی
تو مہرباں تھا تو دنیا بھی مہرباں تھی کبھی
رک گئے وہاں ہم بھی ایک دو گھڑی باقیؔ
جس جگہ نظر آئے چند مہرباں چہرے
نہ اپنے دل کے نہ اپنی زباں کے ساتھ چلے
فریب خوردہ تھے ہر مہرباں کے ساتھ چلے

جگر مراد آبادی

محبت دونوں جانب مہرباں ہے
کہ ہم اس سے وہ ہم سے بد گماں ہے

عبدالحمید عدم

فقیر کس درجہ شادماں تھے حضور کو کچھ تو یاد ہو گا
حضور کس درجہ مہرباں تھے حضور کو کچھ تو یاد ہو گا

قمر جلالوی

ابھی کیا ہے قمر ان ی ذرا نظریں تو پھرنے دو
زمیں نا مہرباں ہو گی فلکِ نا مہرباں ہو گا
یہ بچپن ہے جو پیش آتے ہو مجھ سے مہرباں ہو کر
نگاہیں کہہ رہیں ہیں آنکھ بدلو گے جواں ہو کر
قفس میں کانپ رہا ہوں کہیں فریب نہ ہو
بہارِ گل میں ہوا ہے جو مہرباں صیاد

عرفان صدیقی

وہ ہلالِ ماہِ وصال ہے دلِ مہرباں اسے دیکھنا
پسِ شامِ تن جو پکارنا سرِ بام جاں اسے دیکھنا
سواد قریۂ نامہرباں میں یاد آیا
کہ لکھنٔو میں ہے اک مہرباں ہمارا بھی