یہی خود چشم و دل لفظ و بیاں ہے
جگر مراد آبادی
محبت آپ اپنی ترجماں ہے
یہی خود چشم و دل لفظ و بیاں ہے
نگاہوں میں بہار جاؤداں ہے
جہاں میں ہوں وہیں اب آشیاں ہے
محبت دونوں جانب مہرباں ہے
کہ ہم اس سے وہ ہم سے بد گماں ہے
وہ کب سے مضطرب ہیں اے غمِ عشق
خدا جانے تیری غیرت کہاں ہے
ہماری رفعتوں کا پوچھنا کیا
جہاں ہم پاؤں رکھ دیں آسماں ہے
کوئی آواز ہی دے گم شدہ دل
کہاں ہے او مرے یوسف کہاں ہے
اگر تو ہے تو اے جان دو عالم
یہاں ہر شے جواں جاؤداں ہے
مزے سوزِ دروں کے مل رہے ہیں
بحمد للہ کہ دل آتش بجاں ہے
تماشا دیدنی ہے دیکھ جاؤ
زبان شوق و گلبانگ فغاں ہے
مبارک باد اے جذبِ محبت
انہیں اپنے پر اب میرا گماں ہے
کسی کو اک نظر ہی دیکھ تو لیں
اب اتنی بھی ہمیں جرأت کہاں ہے
ترے نقشِ قدم کا ذرہ ذرہ
عبادت گاہ جان عاشقاں ہے
الٰہی خیر کرنا دیر سے پھر
بہت مضطر نگاہ رازداں ہے
پھنکا جاتا ہے دل جس سوزِ غم سے
جہنم میں یہ چنگاری کہاں ہے
جو پڑھ سکتا ہے تو پڑھ اے غمِ دل
کہ ان نظروں میں آج اک داستاں ہے
مفاعیلن مفاعیلن فَعُولن
ہزج مسدس محذوف