فیض احمد فیض

چاند تارے ادھر نہیں آتے
ورنہ زنداں میں‌ آسماں ہے وہی

میر انیس

خاکساری نے دکھائیں رفعتوں پر رفعتیں
اس زمیں سے واہ کیا کیا آسماں پیدا ہوئے

یگانہ چنگیزی

دکھایا گور سکندر نے بڑھ کے آئینہ
جو سر اٹھا کے کوئی زیر آسماں نکلا
قفس کو جانتے ہیں یاسؔ آشیاں اپنا
مکان اپنا زمین اپنی آسماں اپنا
ہوائے تند میں ٹھہرا نہ آشیاں اپنا
چراغ جل نہ سکا زیر آسماں اپنا
بس ایک سایۂ دیوارِ یار کیا کم ہے
اٹھا لے سر سے مرے سایہ آسماں اپنا
کچھ زرد زرد پتے نشاں جو خزاں کے ہیں
نیرنگ دل فریب یہ سب آسماں کے ہیں

باقی صدیقی

مہر و مہ کو نہ یہ ضیا ملتی
آسماں بھی نہ آسماں ہوتے
ہر چند زمیں زمیں ہے لیکن
تم ساتھ چلو تو آسماں ہے
اب تو ہر اک مہرباں کی بات پر
ذکر دور آسماں کرنا پڑے
یہ حسیں سلسلہ ستاروں کا
کوئی تا حدِ آسماں دیکھے

جون ایلیا

جب ڈوبتا چلا میں تاریکیوں کی تہ میں
تہ میں تھا اک دریچہ اور اس میں آسماں تھا
شاخ سے اڑ گیا پرند ہے دل شام درد مند
صحن میں ہے ملال سا حزن سا آسماں میں ہے
ہم کس کو دیں بھلا در و دیوار کا حساب
یہ ہم جو ہیں زمیں کے نہ تھے آسماں کے تھے
وہ اک جمال جلوہ فشاں ہے زمیں زمیں
میں تا بہ آسماں نہ ہوا کچھ نہیں ہوا
اب بھی جھیلوں میں عکس پڑتے ہیں
اب بھی نیلا ہے آسماں جاناں
تو اب آیا ہے حال میں اپنے
جب زمیں ہے نہ آسماں چپ رہ
ہم میں سے کوئی تو کرے اصرار
کہ زمیں آسماں کا دفتر ہے
کتنی سرسبز تھی زمیں ان کی
کتنے نیلے تھے آسماں ان کے

جگر مراد آبادی

کبھی کبھی تو اسی ایک مشتِ خاک کے گرد
طواف کرتے ہوئے ہفت آسماں گزرے
ہماری رفعتوں کا پوچھنا کیا
جہاں ہم پاؤں رکھ دیں آسماں ہے

سراج الدین ظفر

نمود ان کی بھی دور سبو میں تھی کل رات
ابھی جو دور تہِ آسماں نہیں گزرے

عبدالحمید عدم

کہیں کہیں سلسبیل و کوثر کی جوت موجود تھی زمیں پر
کہیں کہیں عرش و آسماں تھے حضور کو کچھ تو یاد ہو گا

قمر جلالوی

قمر میں شاہِ شب ہوں فوق رکھتا ہوں ستاروں پر
زمانے بھر پہ روشن ہے کہ ہے تخت آسماں میرا
مجھ پر ہی اے قمر نہیں پابندیِ فلک
تارے بھی جا سکے نہ حدِ آسماں سے دور
لحد میں چین دم بھر کو کسی پہلو نہیں ملتا
قمر ہوتا ہے کیا زیر زمیں بھی آسماں کوئی
میری طرح وہ رات کو تارے گنا کریں
اب کے کچھ ایسی چال آسماں چلے
جفائے چرخ پہ چھوڑا تھا آشیاں میں نے
ترے قفس میں بھی سر پہ ہے آسماں صیاد
جہاں وہ چاہیں قمر شوق سے ہمیں رکھیں
زمیں سے ہم کو گریز اور نہ آسماں سے گریز
قمر حالاں کہ طعنے روز دیتا ہوں جفاؤں کے
جدا کرتا نہیں سینہ سے مجھ کو آسماں پھر بھی

عرفان صدیقی

وہ ستارہ ہے سرِ آسماں ابھی میری شامِ زوال میں
کبھی میرے دستِ کمال میں تہہ آسماں اسے دیکھنا
زمیں چھٹی تو بھٹک جاؤ گے خلاؤں میں
تم اڑتے اڑتے کہیں آسماں نہ چھوِ لینا
شہر کے ایوان اپنی مٹھیاں کھولیں ذرا
اس زمیں پر ایک ٹکڑا آسماں میرا بھی تھا
میں نے تو اپنے ہی بام جاں پہ ڈالی تھی کمند
اتفاقاً اس کی زد میں آسماں بھی آ گیا
زمیں پہ ہو گا کہیں آسماں ہمارا بھی
یہی خیال تھا آئندگاں ہمارا بھی
مجھے کمی نہیں رہتی کبھی محبت کی
یہ میرا رزق ہے اور آسماں سے آتا ہے
جو سر پہ کل تھا وہی آسماں ابھی تک ہے
یہ میرے ساتھ کا بچہ جواں ابھی تک ہے
زمیں سے اٹھ کے مری خاک جاں کہاں جائے
یہ نامراد ہنوز آسماں کہاں جائے
زمیں سے اٹھ کے مری خاک جاں کہاں جائے
یہ نامراد تہِ آسماں کہاں جائے

الطاف حسین حالی

ملتے ہی ان کے بھول گئیں کلفتیں تمام
گویا ہمارے سر پہ کبھی آسماں نہ تھا
اب بھاگتے ہیں سایۂ عشقِ بتاں سے ہم
کچھ دل سے ہیں ڈرے ہوئے کچھ آسماں سے ہم

اسرار الحق مجاز

اذن خرام لیتے ہوئے آسماں سے ہم
ہٹ کر چلے ہیں رہ گزر کارواں سے ہم
کیا پوچھتے ہو جھومتے آئے کہاں سے ہم
پی کر اٹھے ہیں خمکدۂ آسماں سے ہم
کیا کیا ہوا ہے ہم سے جنوں میں نہ پوچھئے
الجھے کبھی زمیں سے کبھی آسماں سے ہم
کب کیا تھا اس دل پر حسن نے کرم اتنا
مہرباں اور اس درجہ کب تھا آسماں اپنا

بشیر بدر

مرے ساتھ چلنے والے تجھے کیا ملا سفر میں
وہی دکھ بھری زمیں ہے وہی غم کا آسماں ہے

ظہیر کاشمیری

مضمحل ہونے پہ بھی خود کو جواں رکھتے ہیں ہم
ایک سر ہے جس پہ ساتوں آسماں رکھتے ہیں ہم

فارغ بخاری

بدل سکے گی نہ فطرت سرکشی کو یہ گردشِ زمانہ
ازل سے جو آسماں بنا ہے ابد تلک آسماں رہے گا

تلوک چند محروم

کیا ہے وار تو کام اب تمام کرتا جا
نہ چھوڑ مجھ کو ستم ہائے آسماں کے لیے
نہ پھر جہاں میں بلندی عزِ و شاں کے لیے
یہ کام چھوڑ سیہ بخت آسماں کے لیے

جلیل مانک پوری

بن ترے کیا کروں جہاں لے کر
یہ زمیں اور یہ آسماں لے کر

جوش ملیح آبادی

اگرچہ پامال ہیں یہ بحریں مگر سخن ہے بلند ہمدم
نہ دل میں لانا گمان پستی مری زمیں آسماں نہیں ہے
کس خلائے نظر کے بھرنے کو
یہ زمیں آسماں ہے کیا معلوم

حفیظ جالندھری

بشر کو اس قفس میں تنگ کر کے
زمیں و آسماں والے نے مارا

حفیظ ہوشیارپوری

کوئی زمیں سے بھی پہنچائے آسماں کو پیام
پیام اہلِ زمیں کو تو آسماں سے ملے
اپنی فریاد بازگشت نہ ہو
اک صدا آسماں سے آتی ہے

رسا چغتائی

نگاہیں ڈھونڈتی ہیں رفتگاں کو
ستارے ٹوٹتے ہیں آسماں سے
میں اپنے گھر کی چھت پر سو رہا ہوں
کہ باتیں کر رہا ہوں آسماں سے

سیف الدین سیف

اللہ رے خرامِ ناز ان کا
اک بار تو آسماں ٹھہر جائے
ہر اک چلن میں اسی مہرباں سے ملتی ہے
زمیں ضرور کہیں آسماں سے ملتی ہے

شکیل بدایونی

ازل سے شاید لکھے ہوئے تھے شکیلؔ قسمت میں جور پیہم
کھلی جو آنکھیں اس انجمن میں نظر ملی آسماں سے پہلے
وہ بھی میری گردشِ تقدیر کا اک دور تھا
جس کو اب تک انقلاب آسماں سمجھا تھا میں

فانی بدایونی

خوشی سے رنج کا بدلا یہاں نہیں ملتا
وہ مل گئے تو مجھے آسماں نہیں ملتا
جی ڈھونڈتا ہے گھر کوئی دونوں جہاں سے دور
اس آپ کی زمیں سے الگ آسماں سے دور
اب تک تری گلی میں یہ رسوائیاں نہ تھیں
اب تک تو اس زمیں پہ کوئی آسماں نہ تھا

اختر ہوشیارپوری

زمین پر ہی رہے آسماں کے ہوتے ہوئے
کہیں نہ گھر سے گئے کارواں کے ہوتے ہوئے
حریف داستاں کرنا پڑا ہے
زمیں کو آسماں کرنا پڑا ہے

اکبر حمیدی

ابھی زمین کو ہفت آسماں بنانا ہے
اسی جہاں کو مجھے دو جہاں بنانا ہے
رہ گماں سے عجب کارواں گزرتے ہیں
مری زمیں سے کئی آسماں گزرتے ہیں

فراق گورکھپوری

عشق کی آزمائشیں اور فضاؤں میں ہوئیں
پاؤں تلے زمیں نہ تھی سر پہ یہ آسماں نہ تھا
زیر و بم سے ساز خلقت کے جہاں بنتا گیا
یہ زمیں بنتی گئی یہ آسماں بنتا گیا

قتیل شفائی

قتیلؔ ارضِ وطن میں بھی ہوں میں خاک بسر
مرے نصیب کہیں آسماں میں رہتے ہیں

کیفی اعظمی

میں ڈھونڈتا ہوں جسے وہ جہاں نہیں ملتا
نئی زمین نیا آسماں نہیں ملتا

محسن احسان

جبیں بہ خاک نہم چشم بر ستارۂ صبح
کبھی زمین کبھی آسماں ہوا ہے یہ دل

محسن نقوی

اپنی آنکھیں دفن کرنا تھیں غبار خاک میں
یہ ستم بھی ہم پہ زیر آسماں ہونا ہی تھا

ناصر کاظمی

زمیں لوگوں سے خالی ہو رہی ہے
یہ رنگِ آسماں دیکھا نہ جائے
چیختی ہیں ڈراؤنی راتیں
چاند نکلا ہے آسماں سے دور
ہر گھڑی آسماں کو تکتا ہوں
جیسے کچھ آسماں نے چھین لیا