اس آپ کی زمیں سے الگ آسماں سے دور
فانی بدایونی
جی ڈھونڈتا ہے گھر کوئی دونوں جہاں سے دور
اس آپ کی زمیں سے الگ آسماں سے دور
شاید میں در خور نگہِ گرم بھی نہیں
بجلی تڑپ رہی ہے مرے آشیاں سے دور
آنکھیں چرا کے آپ نے افسانہ کر دیا
جو حال تھا زباں سے قریب اور بیاں سے دور
تا عرض شوق میں نہ رہے بندگی کی لاگ
اک سجدہ چاہتا ہوں ترے آستاں سے دور
ہے منع راہِ عشق میں دیر و حرم کا ہوش
یعنی کہاں سے پاس ہے منزل کہاں سے دور
مفعول فاعلات مفاعیل فاعِلن
مضارع مثمن اخرب مکفوف محذوف