انشاء اللہ خان انشا

اللہ ری فصاحت اللہ ری بلاغت
ایسا کہاں جھمکڑا ایسا کہاں تماشا
کدھر لوٹے کدھر پوٹے ہنسے بولے کدھر جا کر
کہاں لپٹے کہاں سوئے کہاں چمٹے کہاں لپٹے

حیدر علی آتش

تکلف سے بری ہے حسن ذاتی
قبائے گل میں گل بوٹا کہاں ہے
ناز و انداز و ادا سے تمہیں شرم آنے لگی
عارضی حسن کا عالم وہ کہاں ہے کہ جو تھا
بازار دہر میں تری منزل کہاں نہ تھی
یوسف نہ جس میں ہو کوئی ایسی دکاں نہ تھی
یہ اشتیاق شہادت میں محو تھا دمِ قتل
لگے ہیں زخمِ بدن پر کہاں نہیں معلوم
کنارِ آب چلے دورِ جام یا لب کشت
شکار ہووے بطِ مے کہاں نہیں معلوم

داغ دہلوی

پھرے راہ سے وہ یہاں آتے آتے
اجل مر رہی تو کہاں آتے آتے
جلوے مری نگاہ میں کون و مکاں کے ہیں
مجھ سے کہاں چھپیں گے وہ ایسے کہاں کے ہیں
کیا اضطراب شوق نے مجھ کو خجل کیا
وہ پوچھتے ہیں کہیے ارادے کہاں کے ہیں
عاشق ترے عدم کو گئے کس قدر تباہ
پوچھا ہر ایک نے یہ مسافر کہاں کے ہیں
کعبہ کی ہے ہوس کبھی کوئے بتاں کی ہے
مجھ کو خبر نہیں مری مٹی کہاں کی ہے
بگڑ گئی ہے یہاں بے طرح جہاں کی طرح
کہاں کی وضع کہاں کی ادا کہاں کی طرح

شیخ ابراہیم ذوق

بگولا گر نہ ہوتا وادی وحشت میں اے مجنوں
تو گنبد ہم سے سرگشتوں کی تربت پر کہاں ہوتا

مصحفی غلام ہمدانی

یادگار گزشتگاں ہیں ہم
خوب دیکھا تو پھر کہاں ہیں ہم
میں گیا بھیس بدل کر تو لگا یوں کہنے
چل بے لایا ہے مرے آگے کہاں کا بہروپ
ہے چار طرف ہمارا جلوہ
ڈھونڈے جو کوئی کہاں نہیں ہم
جمع رکھتے نہیں، نہیں معلوم
خرچ اپنا کہاں سے اٹھتا ہے
کدھر جائیے اور کہاں بیٹھیے
پرچتا نہیں دل جہاں بیٹھیے
ترے ہاتھوں سے اے جفائے فلک
بتا تو ہی چھپ کر کہاں بیٹھیے
او میاں بانکے ہے کہاں کی چال
تم جو چلتے ہو نت یہ بانکی چال
سو ٹکڑے ہے گریباں دامن لہو میں تر ہے
یہ رنگ تو نے ظالم اپنا کہاں بنایا
بوسہ دینے کو تو کہتا ہے وہ مجھ سے لیکن
میں جو چاہوں کہ ابھی دے سو کہاں دیتا ہے
ہے واں تو نیا رقیب ہر دم
ہونے پاتے ہیں ہم کہاں ایک
شعر دولت ہے کہاں کی دولت
میں غنی ہوں تو زباں کی دولت

مصطفٰی خان شیفتہ

شکایت کی بھی اب طاقت کہاں ہے
نگاہ حسرت آہ ناتواں ہے
تجھے بھی مل گیا ہے کوئی تجھ سا
اب آئینے سے وہ صحبت کہاں ہے
لڑنے میں آشتی نہ تغافل میں التفات
یہ جور کی نکالی ہے تم نے کہاں کی طرح

میر مہدی مجروح

ہے سوال اور اور جواب ہے اور
سچ کہو اس گھڑی کہاں ہو تم

فیض احمد فیض

وہ ہاتھ ڈھونڈ رہے ہیں بساطِ محفل میں
کہ دل کے داغ کہاں ہیں نشستِ درد کہاں
اب وہی حرفِ جنوں سب کی زباں ٹھہری ہے
جو بھی چل نکلی ہے وہ بات کہاں ٹھہری ہے

مرزا رفیع سودا

ہستی سے عدم تک نفس چند کی ہے راہ
دنیا سے گزرنا سفر ایسا ہے کہاں کا
جویندۂ ہر چیز ہے یابندہ جہاں میں
جز عمرِ گزشتہ کہ وہ ڈھونڈو تو کہاں ہے

یگانہ چنگیزی

لہو لگا کے شہیدوں میں ہو گئے داخل
ہوس تو نکلی مگر حوصلہ کہاں نکلا
یہ بھی تو ہیں خراب اسی چشمِ مست کے
پرہیزگار حضرت‌ واعظ کہاں کے ہیں

باقی صدیقی

کس سوچ میں پڑ گئے ہو باقیؔ
دنیا تو وہیں ہے تم کہاں ہو
بے نشاں رہتے بے نشاں ہوتے
تم نہ ہوتے تو ہم کہاں ہوتے
جن کے طفیل بزم تمنا میں رنگ تھا
وہ لوگ تجھ کو گردشِ دوراں کہاں ملے
کوئی ہنگامۂ روز و شب میں
یاد آ کر بھی کہاں یاد آیا
جہاں ہم سے فا ہے ہم جہاں سے
کسی نیبات کر دی ہے کہاں ختم
اگر ہم چپ بھی ہو جائیں تو باقیؔ
زمانہ بات کرتا ہے کہاں ختم
نقش نقش پر برہم، داغ داغ پر خنداں
زندگی کی راہوں میں رہ گئے کہاں چہرے
ہر قدم پر تھا اک صنم خانہ
کیا بتائیں کہاں کہاں ٹھہرے
ہر نظر سنگِ راہ تھی باقیؔ
کیا بتائیں کہاں کہاں ٹھہرے
ہوشیار اے جذبِ دل اب کیا خبر
تذکرہ کس کا کہاں کرنا پڑے
بدلتے جا رہے ہیں مبدم حالات دنیا کے
تمہارا غم بھی اب دیکھیں کہاں تک ساتھ دیتا ہے
آپ تک ہے نہ غمِ جہاں تک
جانے یہ سلسلہ کہاں تک ہے

جون ایلیا

زمانہ تھا وہ دل کی زندگی کا
تری فرقت کے دن لاؤں کہاں سے
جانے کہاں گیا ہے وہ وہ جو ابھی یہاں تھا
وہ جو ابھی یہاں تھا وہ کون تھا کہاں تھا
سمجھ میں زندگی آئے کہاں سے
پڑھی ہے یہ عبارت درمیاں سے
زمانہ تھا وہ دل کی زندگی کا
تری فرقت کے دن لاؤں کہاں سے
ہم آندھیوں کے بن میں کسی کارواں کے تھے
جانے کہاں سے آئے ہیں جانے کہاں کے تھے
ہم کہاں اور تم کہاں جاناں
ہیں کئی ہجر درمیاں جاناں
عالم بیکران رنگ ہے تو
تجھ میں ٹھہروں کہاں کہاں جاناں
ہے جو پرکھوں تمہارا عکس خیال
زخم آئے کہاں کہاں جاناں
ہے جو بود و نبود کا دفتر
آخرش یہ کہاں کا دفتر ہے
خود سے رشتے رہے کہاں ان کے
غم تو جانے تھے رائیگاں ان کے

جگر مراد آبادی

اگر نہ زہرہ جبینوں کے درمیاں گزرے
تو پھر یہ کیسے کٹے زندگی کہاں گزرے
جنہیں کہ دیدۂ شاعر ہی دیکھ سکتا ہے
وہ انقلاب ترے سامنے کہاں گزرے
سخت خوں ریز جب آشوب جہاں ہوتا ہے
نہیں معلوم یہ انسان کہاں ہوتا ہے
متزلزل ہے ادب گاہِ محبت کی زمیں
کوئی دیکھے تو یہ ہنگامہ کہاں ہوتا ہے
وہ کب سے مضطرب ہیں اے غمِ عشق
خدا جانے تیری غیرت کہاں ہے
کوئی آواز ہی دے گم شدہ دل
کہاں ہے او مرے یوسف کہاں ہے
کسی کو اک نظر ہی دیکھ تو لیں
اب اتنی بھی ہمیں جرأت کہاں ہے
پھنکا جاتا ہے دل جس سوزِ غم سے
جہنم میں یہ چنگاری کہاں ہے
جب ہر اک شورش غم ضبط فغاں تک پہنچے
پھر خدا جانے یہ ہنگامہ کہاں تک پہنچے
تو جہاں پر تھا بہت پہلے وہیں آج بھی ہے
دیکھ رندان خوش انفاس کہاں تک پہنچے
تو مرے حالِ پریشاں پہ بہت طنز نہ کر
اپنے گیسو بھی ذرا دیکھ کہاں تک پہنچے

خواجہ میر درد

مجھے در سے اپنے تو ٹالے ہے یہ بتا مجھے تو کہاں نہیں
کوئی اور بھی ہے ترے سوا تو اگر نہیں تو جہاں نہیں

عبدالحمید عدم

وہ مے کدہ تھا صنم کدہ تھا کہ باب جنت کھلے ہوئے تھے
تمام شب آپ ہم کہاں تھے حضور کو کچھ تو یاد ہو گا

قمر جلالوی

تو کہتا ہے قبضہ ہے یہاں میرا وہاں میرا
تو پھر انصاف ہو گا اے بتِ خودِ سر کہاں میرا
بہار آخر ہے پی لی بیٹھ کر اے شیخ رندوں میں
یہ محفل پھر کہاں ہو گی یہ جلسہ پھر کہاں ہو گا
تم اپنے در پہ دیتے ہو اجازت دفنِ دشمن کی
مری تربت کہاں ہو گی مرا مرقد کہاں ہو گا
یہ کہہ کر حشر میں وہ رو دیا کچھ بد گماں ہو کر
کہ ایسی بھیڑ میں جاؤ گے پیشِ حق کہاں ہو کر
پریشاں بال، آنسو آنکھ میں، اتری ہوئی صورت
نصیبِ دشمناں ایسے میں آئے ہو کہاں ہو کر
جب گھر سے چل کھڑے ہوئے پھر پوچھنا ہی کیا
منزل کہاں ہے پاس پڑے گی کہاں سے دور
جو پر کتر دیے دنیا میں ہو گی رسوائی
پر اڑ کے جائیں گے جانے کہاں کہاں صیاد
قمر کی روشنی میں کیسے پھول کھلتے ہیں
مگر وہ چاندنی راتیں یہاں کہاں صیاد

شکیب جلالی

اندازِ خموشی میں ہے گفتار کا پہلو
گویا نہ سہی، چپ بھی کہاں ہیں تری آنکھیں

عرفان صدیقی

یہ در و بام یہ چہرے یہ قبائیں یہ چراغ
دیکھئے بارِ دگر ان کو کہاں دیکھئے گا
تم جو لکھتے ہو وہ دنیا کہیں ملتی ہی نہیں
کون سے شہر میں رہتے ہو‘ کہاں لکھتے ہو
مرا چراغ تو جانے کہاں سے آتا ہے
مگر اجالا مرے سوز جاں سے آتا ہے
ہم سب آئینہ در آئینہ در آئینہ ہیں
کیا خبر کون‘ کہاں‘ کس کی طرف دیکھتا ہے
درد کے باب میں تمثال گری ہے خاموش
بن بھی جاتی ہے تو تصویر کہاں بولتی ہے

الطاف حسین حالی

مجھ میں وہ تابِ ضبط شکایت کہاں ہے اب
چھیڑو نہ تم کو میرے بھی منہ میں زباں ہے اب
حالیؔ تم اور ملازمت پیرے فروش
وہ علم و دیں کدھر ہے وہ تقویٰ کہاں ہے اب

جمال احسانی

دل میں یاد رفتگاں آباد ہے
ورنہ یہ دل بھی کہاں آباد ہے

اختر شیرانی

سما کر دل میں نظروں سے نہاں ہے
مجھے یاد آنے والے تو کہاں ہے
اندھیرے بادلوں سے پوچھ زاہد
مری کھوئی ہوئی توبہ کہاں ہے

ادا جعفری

خامشی سے ہوئی فغاں سے ہوئی
ابتدا رنج کی کہاں سے ہوئی

اسرار الحق مجاز

کیا پوچھتے ہو جھومتے آئے کہاں سے ہم
پی کر اٹھے ہیں خمکدۂ آسماں سے ہم
ایک دن آدم و حوا بھی کیے تھے پیدا
وہ اخوت تری محفل میں کہاں ہے ساقی

بشیر بدر

یہ چراغ بے نظر ہے یہ ستارہ بے زباں ہے
ابھی تجھ سے ملتا جلتا کوئی دوسرا کہاں ہے
انہیں راستوں نے جن پر کبھی تم تھے ساتھ میرے
مجھے روک روک پوچھا ترا ہم سفر کہاں ہے

بیخود بدایونی

غم مرے دل میں تم ہو پردے میں
سچ تو ہے تم اسے کہاں سے سنو

ظہیر کاشمیری

مہ وشوں کے عارضوں میں دیکھتے ہیں اپنا عکس
اللہ اللہ اپنا سایہ بھی کہاں رکھتے ہیں ہم

عبید اللہ علیم

خوب پایا ہے صلہ تیری پرستاری کا
دیکھ اے صبحِ طرب آج کہاں ہیں ہم لوگ

فارغ بخاری

اظہار عقیدت میں کہاں تک نکل آئے
ہم اہل یقیں وہم و گماں تک نکل آئے

احمد راہی

نہ جانے میں کس ادھیڑ بن میں الجھ گیا ہوں کہ مجھ کو راہیؔ
خبر نہیں کچھ وہ آرزوئے سکوں کہاں تھک کے سو گئی ہے

ماجد صدیقی

سونا سونا ہے نظر کا دامن
چھپ گیا ہے وہ مرا چاند کہاں
رات کٹتی ہے سلگتے، مری جاں آنکھوں میں
دیکھ تسکین کی صورت ہے کہاں آنکھوں میں
جسے ڈھونڈتے ہو وہ ماجدؔ بھلا
غمِ جاں سے فارغ کہاں دوستو
لکھو تم ہمیں چٹھیاں دوستو
تمہیں ایسی فرصت کہاں دوستو

تلوک چند محروم

مل جائیں کاش مجھ کو کہیں اور میں کہوں
ڈھونڈا کہاں کہاں تمہیں اور تم کہاں ملے
محرومؔ ہو گیا سفر زندگی تمام
اب دیکھیے قرار کی منزل کہاں ملے

جلیل مانک پوری

میری تقدیر کیا بتاؤں جلیلؔ
جا رہی ہے کہاں کہاں لے کر
اپنے گھر میں خیال میں دل میں
ایک ہو کر کہاں کہاں تو ہے

ثروت حسین

کس پر پوشیدہ اور کس پہ عیاں ہونا تھا
کون ہوں میں مجھ کو اس وقت کہاں ہونا تھا

جوش ملیح آبادی

ہر ایک کانٹے پہ سرخ کرنیں ہر اک کلی میں چراغ روشن
خیال میں مسکرانے والے ترا تبسم کہاں نہیں ہے

حسرت موہانی

اپنا سا شوق اوروں میں لائیں کہاں سے ہم
گھبرا گئے ہیں بے دلی ہم رہاں سے ہم

حفیظ ہوشیارپوری

راز سر بستہ محبت کے زباں تک پہنچے
بات بڑھ کر یہ خدا جانے کہاں تک پہنچے
حیرتِ عشق مری حسن کا آئینہ ہے
دیکھنے والے کہاں سے ہیں کہاں تک پہنچے
خود اپنی گم شدگی سے جنہیں شکایت ہے
تو ہی بتا انہیں تیرا نشاں کہاں سے ملے
سراغ عمرِ گزشتہ ملے کہیں سے حفیظؔ
سراغ عمرِ گزشتہ مگر کہاں سے ملے
دل سے آتی ہے بات لب پہ حفیظؔ
بات دل میں کہاں سے آتی ہے

رسا چغتائی

وہ ان آنکھوں کی محرابوں میں ہر شب
ستارے ٹانک جاتا ہے کہاں سے

خاطر غزنوی

شام ہنگامہ تھا خوشیاں تھیں حسیں چہرے تھے
کھو گئی محفل احباب کہاں راتوں رات
گفتگو تلخ حقائق سے بھی ہو
خواب ہی خواب کہاں تک سوچوں
سوچ بن جاتی ہے گرداب بلا
ایک ہی بات کہاں تک سوچوں
بصد یقیں بڑھے حد گماں سے لوٹ آئے
دل و نظر کے تقاضے کہاں سے لوٹ آئے

سید ضمیر جعفری

ہم زمانے سے فقط حسن گماں رکھتے ہیں
ہم زمانے سے توقع ہی کہاں رکھتے ہیں
ایک لمحہ بھی مسرت کا بہت ہوتا ہے
لوگ جینے کا سلیقہ ہی کہاں رکھتے ہیں

سیف الدین سیف

گرچہ سو بارِ غم ہجر سے جاں گزری ہے
پھر بھی جو دل پہ گزرتی تھی کہاں گزری ہے
ہوش میں آئے تو بتلائے ترا دیوانہ
دن گزارا ہے کہاں رات کہاں گزری ہے
حشر کے بعد بھی دیوانے ترے پوچھتے ہیں
وہ قیامت جو گزرنی تھی کہاں گزری ہے
کیا جانیے قافلہ وفا کا
لٹ جائے کہاں کہاں ٹھہر جائے
ہے موج میں سیفؔ کشتی دل
معلوم نہیں کہاں ٹھہر جائے

سیماب اکبر آبادی

میں اس دنیا میں اے سیمابؔ اک راز حقیقت تھا
سمجھنے کی طرح اہلِ جہاں مجھ کو کہاں سمجھے
ہر اک ذرہ ہے صحرا اور ہر صحرا ہے اک دنیا
مگر اس وسعتِ عالم میں گنجائش کہاں میری
مری حیرت پہ وہ تنقید کی تکلیف کرتے ہیں
جنہیں یہ بھی نہیں معلوم نظریں ہیں کہاں میری

شان الحق حقی

بات وہ ہے جو لبِ لعل نگاراں سے چلے
خوں بھی ہو دل تو یہ تاثیر کہاں آتی ہے

شکیل بدایونی

ہر ایک عنوان دردِ فرقت ہے ابتدا شرح مدعا کی
کوئی بتائے کہ یہ فسانہ سنائیں ان کو کہاں سے پہلے

فانی بدایونی

مجھے عزیز سہی قدر دل تمہیں کیوں ہو
کمی تو دل کی نہیں دل کہاں نہیں ملتا
ہے منع راہِ عشق میں دیر و حرم کا ہوش
یعنی کہاں سے پاس ہے منزل کہاں سے دور
اب چارہ سازی دلِ بیمار کیا کریں
اے مرگِ ناگہاں تجھے لائیں کہاں سے ہم
تیرا نگاہِ شوق کوئی راز داں نہ تھا
آنکھوں کو ورنہ جلوۂ جاناں کہاں نہ تھا

اختر ہوشیارپوری

میں اپنے سارے پتے فاش کرتا
مگر ایسا کہاں کرنا پڑا ہے

احمد فراز

جان سے عشق اور جہاں سے گریز
دوستوں نے کیا کہاں سے گریز
ابتدا کی تیرے قصیدے سے
اب یہ مشکل کروں کہاں سے گریز
میں وہاں ہوں جہاں جہاں تم ہو
تم کرو گے کہاں کہاں سے گریز
انتہا عشق کی کوئی نہ ہوس کی کوئی
دیکھنا یہ ہے کہ حد کون کہاں کھینچتا ہے

امیر مینائی

حسرتیں نزع میں ‌بولیں مجھ سے
چھوڑ کر ہم کو کہاں جائیے گا
درباں ہزار اس کے یہاں ایک نقدِ جاں
مال اس قدر کہاں ہے کسے دوں کسے نہ دوں

فراق گورکھپوری

قرب ہی کم ہے نہ دوری ہی زیادہ لیکن
آج وہ ربط کا احساس کہاں ہے کہ جو تھا
قرب ہی کم ہے نہ دوری ہی زیادہ لیکن
آج وہ ربط کا احساس کہاں ہے کہ جو تھا
حسن کو کھینچ تو لیتا ہے ابھی تک لیکن
وہ اثر جذبِ محبت میں کہاں ہے کہ جو تھا
ساز وہ قطرے قطرے میں سوز وہ ذرے ذرے میں
یاد تری کسے نہ تھی درد ترا کہاں نہ تھا
میں نے سونپا تھا تجھے اک کام ساری عمر میں
وہ بگڑتا ہی گیا اے دل کہاں بنتا گیا

قابل اجمیری

جمالِ دوست کو پیہم بکھرنا ہے سنورنا ہے
محبت نے اٹھایا ہے ابھی پردہ کہاں اپنا
ان کی پلکوں پر ستارے اپنے ہونٹوں پہ ہنسی
قصۂ غم کہتے کہتے ہم کہاں تک آ گئے

کلیم عاجز

ہم کو تو خیر پہنچنا تھا جہاں تک پہنچے
جو ہمیں روک رہے تھے وہ کہاں تک پہنچے
منزل دار و رسن بھی ہے رخ و زلف کے بعد
دیکھیے شوق ہمیں لے کے کہاں تک پہنچے

مجروح سلطان پوری

کام آئے بہت لوگ سر‌‌ مقتل ظلمات
اے روشنی کوچۂ‌ دلدار کہاں ہے

محسن نقوی

وہ نہیں ہے تو محسنؔ یہ مت سوچنا
اب بھٹکتا پھروں گا کہاں ایک میں

ناصر کاظمی

کسے دیکھیں کہاں دیکھا نہ جائے
وہ دیکھا ہے جہاں دیکھا نہ جائے
شہر میں شور، گھر میں تنہائی
دل کی باتیں کہاں کرے کوئی
کچھ توں احساسِ زیاں تھا پہلے
دل کا یہ حال کہاں تھا پہلے
اب بھی تو پاس نہیں ہے لیکن
اس قدر دور کہاں تھا پہلے
اب وہ دریا، نہ وہ بستی، نہ وہ لوگ
کیا خبر کون کہاں تھا پہلے
غم نے پھر دل کو جگایا ناصر
خانہ برباد کہاں تھا پہلے
ترے فیصلے وقت کی بارگاہوں میں دائم
ترے اسم ہر چار سو ہیں مگر تو کہاں ہے