سو ہم کو ہے دکھاتا عشقِ بتاں تماشا
انشاء اللہ خان انشا
لاہوت پر نہ دیکھیں جو قدسیاں تماشا
سو ہم کو ہے دکھاتا عشقِ بتاں تماشا
ٹک کیجے چشم دل سے یاں سیر میکدے کی
ہے گا عجب مزے کا پیرِ مغاں تماشا
جس نے سنے یہ میرے اشعار خوش ہو بولا
نامِ خدا ہے تو کچھ اے نوجواں تماشا
اللہ ری فصاحت اللہ ری بلاغت
ایسا کہاں جھمکڑا ایسا کہاں تماشا
شوخی ادا سو ایسی جوش و خروش اتنا
بندش دھواں سو یہ اور طرزِ بیاں تماشا
دیوان سینکڑوں ہیں ہم نے تو دیکھے لیکن
ان میں نظر پڑا کب پایا جو یاں تماشا
کیا خوب واہ ماشاء اللہ ہے عجب کچھ
دیوان میر انشاؔ اللہ خاں تماشا
مفعول فاعِلاتن مفعول فاعِلاتن
مضارع مثمن اخرب