فیض احمد فیض

برق سو بار گر کے خاک ہوئی
رونقِ خاکِ آشیاں ہے وہی

یگانہ چنگیزی

قفس کو جانتے ہیں یاسؔ آشیاں اپنا
مکان اپنا زمین اپنی آسماں اپنا
ہوائے تند میں ٹھہرا نہ آشیاں اپنا
چراغ جل نہ سکا زیر آسماں اپنا
خدا کسی کو بھی یہ خواب بد نہ دکھلائے
قفس کے سامنے جلتا ہے آشیاں اپنا
گزرے ہوئے زمانے کی اب یاد کیا ضرور
چرچے قفس نصیبوں میں کیوں آشیاں کے ہیں

باقی صدیقی

بار صیاد ہے کہ بار ثمر
جھک گئی شاخ آشیاں دیکھو
مجبوریوں کا نام ہی شاید ہے بیکسی
نظروں کے سامنے بھی کئی آشیاں جلے
ان کی پرواز کا ہے شور بہت
گرچہ اپنے ہی آشیاں تک ہے
اس کو کہتے ہیں تیرا لطف و کرم
خشک شاخوں پہ آشیاں دیکھے

جون ایلیا

ان کو آندھی میں ہی بکھرنا تھا
بال و پر آشیاں کے تھے ہی نہیں

جگر مراد آبادی

وہ جن کے سائے سے بھی بجلیاں لرزتی تھیں
مری نظر سے کچھ ایسے بھی آشیاں گزرے
نگاہوں میں بہار جاؤداں ہے
جہاں میں ہوں وہیں اب آشیاں ہے

قمر جلالوی

چمن میں توڑ ڈالی باغباں نے مجھ سے یہ کہہ کر
نہ شاخ آشیاں ہو گی نہ تیرا آشیاں ہو گا
فکریں تمام ہو گئیں برقِ تپاں سے دور
خس کم جہاں پاک غمِ آشیاں سے دور
صیاد یہ جلے ہوئے تنکے کہاں ہیں
بجلی اگر گری ہے میرے آشیاں سے دور
چاہوں تو میرے ساتھ تصور میں تا قفس
گلشن چلے ، بہار چلے ، آشیاں چلے
کیا کہا یہ تو نے اے صیاد تنکا تک نہیں
چھوڑ کر آیا ہوں اپنا آشیاں اچھی طرح
پھر خدا جانے رہائی ہو قفس سے یا نہ ہو
دیکھ لوں صیاد اپنا آشیاں اچھی طرح
کچھ اس میں سازشِ بادِ خلاف تھی ورنہ
مرے ریاض کے تنکے اور آشیاں سے گریز
نہ دے تسلیاں صیاد برق گرنے پر
یہ بے جلائے ہوئے آشیاں نہیں رہتی
اگر زندہ رہیں تو آئیں گے اے باغباں پھر بھی
اسی گلشن اسی ڈالی پہ ہو گا آشیاں پھر بھی

الطاف حسین حالی

قفس میں جی نہیں لگتا کسی طرح
لگا دو آگ کوئی آشیاں میں

اختر شیرانی

کسے معلوم کب کس وقت کس پر گر پڑے بجلی
ابھی سے میں چمن میں چل کر آباد آشیاں کر لوں

بہزاد لکھنوی

جس گلستاں میں روز تڑپتی ہیں بجلیاں
یا رب اسی چمن میں یہ پھر آشیاں ہیں کیوں

تلوک چند محروم

وطن کی یاد مٹتے مٹتے مٹ جاتی ہے غربت میں
قفس میں تابش داغِ فراق آشیاں کب تک
خلش نے دل کو مرے کچھ مزا دیا ایسا
کہ جمع کرتا ہوں میں خار آشیاں کے لیے
اب قفس ہی کو آشیاں کہیے
راحت آشیاں ملے نہ ملے

جلیل مانک پوری

اڑ گئے سب چمن کو رہ گئے ہم
چار تنکوں کا آشیاں لے کر
سب اڑے لے کے پھول گلشن سے
اور ہم اپنا آشیاں لے کر

خاطر غزنوی

قفس کے انس نے اس درجہ کر دیا مجبور
کہ اس کی یاد میں ہم آشیاں سے لوٹ آئے

سیماب اکبر آبادی

چمک جگنو کی برق بے اماں معلوم ہوتی ہے
قفس میں رہ کے قدر آشیاں معلوم ہوتی ہے
قفس کی تیلیوں میں جانے کیا ترکیب رکھی ہے
کہ ہر بجلی قریب آشیاں معلوم ہوتی ہے
اشاروں سے نگاہوں سے بہت کچھ منع کرتا ہوں
قفس ہی پر جھکی پڑتی ہے شاخ آشیاں پھر بھی
یہ کس نے شاخِ گل لا کر قریب آشیاں رکھ دی
کہ میں نے شوق گل بوسی میں کانٹوں پر زباں رکھ دی
یہ سازش کر رہے ہیں چند تنکے آشیانے کے
کہ بجلی کو کسی صورت اسیر آشیاں کر لیں

فانی بدایونی

بھڑک کے شعلۂ گل تو ہی اب لگا دے آگ
کہ بجلیوں کو مرا آشیاں نہیں ملتا
شاید میں در خور نگہِ گرم بھی نہیں
بجلی تڑپ رہی ہے مرے آشیاں سے دور
ہر شاخ ہر شجر سے نہ تھا بجلیوں کو لاگ
ہر شاخ ہر شجر پہ مرا آشیاں نہ تھا

قابل اجمیری

نسیمِ صبح سے کیا ٹوٹتا خوابِ گراں اپنا
کوئی نادان بجلی چھو گئی ہے آشیاں اپنا

قتیل شفائی

کہاں تلاش کرے گی ہمیں بہار کہ ہم
کبھی قفس میں کبھی آشیاں میں رہتے ہیں

کلیم عاجز

ہم جو گلشن میں تھے بہار نہ تھی
جب بہار آئی آشیاں نہ رہا
بجلیوں کو دعائیں دیتا ہوں
دوش پر بار آشیاں نہ رہا

ناصر کاظمی

فکرِ تعمیرِ آشیاں بھی ہے
خوفِ بے مہری خزاں بھی ہے
تیرے زندانیوں کی کون سنے
برق چمکی ہے آشیاں سے دور
کیا کہوں اب تمھیں خزاں والو!
جل گیا آشیاں میں کیا کیا کچھ