حیدر علی آتش

ہمت پس از فنا سبب ذکرِ خیر ہے
مردوں کا نام سنتے ہیں ہر داستاں میں ہم

داغ دہلوی

ادائے مطلب دل ہم سے سیکھ جائے کوئی
انہیں سنا ہی دیا حال داستاں کی طرح

مصحفی غلام ہمدانی

قصۂِ مصحفیؔ سنا کر یار
عشق اس داستاں سے اٹھتا ہے
جس سے کل مجھ کو آ گئی تھی غشی
پھر اسی داستاں کو کیوں چھیڑا
اس پر بھی اے مصحفیؔ ہمارا
قصہ ایک اور ہے داستاں ایک

مصطفٰی خان شیفتہ

فسانے یوں محبت کے سچ ہیں پر کچھ کچھ
بڑھا بھی دیتے ہیں ہم زیب داستاں کے لیے

فیض احمد فیض

آج کی شبِ وصال کی شب ہے
دل سے ہر روز داستاں ہے وہی

یگانہ چنگیزی

اپنی بیتی پھر سنائیں گے کبھی اے مہرباں
شب کی شب میں ختم ساری داستاں کیوں کر کریں

باقی صدیقی

منت کش داستاں سرا ہے
میری ہو کہ تیری داستاں ہو
کھل نہ سکتی کلی مسرت کی
غم ہی غم زیب داستاں ہوتے
وہیں سمجھو ہماری داستاں ختم
جہاں کر دے کوئی افسانہ خواں ختم
وہاں سے میرا افسانہ چلے گا
جہاں ہو گی تمہاری داستاں ختم
ترے تبسمِ رنگیں سے پھول کھلتے تھے
مری حیات بہاروں ی داستاں تھی کبھی
زیست کی مجبوریاں باقیؔ نہ پوچھ
ہر نفس کو داستاں کرنا پڑے
کتاب دورِ جہاں کے وہ لفظ ہیں ہم لوگ
ہر اک فسانے ہر اک داستاں کے ساتھ چلے

جون ایلیا

یہی انجام کیا تجھ کو ہوس تھا
کوئی پوچھے تو میر داستاں سے
ہم کہ ہیں تیری داستاں یکسر
ہم تری داستاں کے تھے ہی نہیں
اے جان داستاں تجھے آیا کبھی خیال
وہ لوگ کیا ہوئے جو تری داستاں کے تھے
ہو گیا قصۂ وجود تمام
ہے اب آغاز داستاں چپ رہ
جو حقیقت ہے دم بہ دم کی یاد
وہ تو اک داستاں کا دفتر ہے

جگر مراد آبادی

جو پڑھ سکتا ہے تو پڑھ اے غمِ دل
کہ ان نظروں میں آج اک داستاں ہے

عبدالحمید عدم

مراحل راحت و اماں تھے مسائل ماہ و کہکشاں تھے
مشاغل حرف و داستاں تھے حضور کو کچھ تو یاد ہو گا

قمر جلالوی

دیکھیے قسمت کہ ان کو شام سے نیند آ گئی
وہ نہ سننے پائیں میری داستاں اچھی طرح
سمجھتا ہوں انہیں نیند آ گئی ہے اب نہ چونکیں گے
مگر میں ہوں سنائے جا رہا ہوں داستاں پھر بھی
تجھ فوراً ہی میرا قصہ روک دینا تھا
ترا دکھتا تھا دل تو کیوں سنی تھی داستاں تو نے
ہرے پھر کر دیے زخمِ جگر صیاد بلبل کے
قفس کے سامنے کہہ کر گلوں کی داستاں تو نے

عرفان صدیقی

سوچتا ہوں کہ محفوظ کر لوں اسے اپنے سینے میں لفظ و بیاں کی طرح
تھوڑی ہی دیر میں یہ ملاقات بھی ختم ہو جائے گی داستاں کی طرح
اب ادھورا چھوڑنا ممکن نہیں اے قصہ گو
ساری دنیا سن رہی ہے داستاں میں ہی نہیں
انہیں خبر ہے کہ کیا ہے ورائے صوت وصدا
لبِ سکوت کی یہ داستاں علیؑ سے کہو

مجید امجد

قریبِ دل، خروشِ صد جہاں ہم
جو تم سن لو، تمہاری داستاں ہم

الطاف حسین حالی

نیا ہے لیجیے جب نام اس کا
بہت وسعت ہے میری داستاں میں

بشیر بدر

میں تم کو بھول بھی سکتا ہوں اس جہاں کے لئے
ذرا سا جھوٹ ضرور ہے داستاں کے لئے

سدرشن فاکر

مری زباں سے مری داستاں سنو تو سہی
یقیں کرو نہ کرو مہرباں سنو تو سہی

احمد راہی

طویل راتوں کی خامشی میں مری فغاں تھک کے سو گئی ہے
تمہاری آنکھوں نے جو کہی تھی وہ داستاں تھک کے سو گئی ہے

ماجد صدیقی

ردی کے بھاؤ بیچا گیا ہوں کسی کے ہاتھ
لے کو بکو بکھرتی مری داستاں بھی دیکھ

تلوک چند محروم

وہی اک حسرت ناکام ہے اور اس کا رونا ہے
کیے جاؤ گے محرومؔ اس کو زیب داستاں کب تک

جلیل مانک پوری

اشک چھلکائے بال بکھرائے
وہ گئے میری داستاں لے کر
سب گئے پوچھنے مزاج ان کا
میں گیا اپنی داستاں لے کر

جوش ملیح آبادی

کوئی دارائے جاں ہے کیا معلوم
یا فقط داستاں ہے کیا معلوم

حفیظ جالندھری

کسی کے روبرو بیٹھا رہا میں بے زباں ہو کر
مری آنکھوں سے حسرت پھوٹ نکلی داستاں ہو کر
کتاب دہر کا دلچسپ ٹکڑا ہے مری ہستی
مجھے دیکھو کہ بیٹھا ہوں مجسم داستاں ہو کر

سیف الدین سیف

سرود عشق میں نغمات سحر شامل ہیں
تری خبر بھی مری داستاں سے ملتی ہے

سیماب اکبر آبادی

کہانی میری روداد جہاں معلوم ہوتی ہے
جو سنتا ہے اسی کی داستاں معلوم ہوتی ہے
تصور میں وہ کچھ برہم سے ہیں کچھ مہرباں سے ہیں
انہیں شاید سنائی جا رہی ہے داستاں میری
سنا تھا قصہ خواں کوئی نیا قصہ سنائے گا
ہمارے منہ پہ ظالم نے ہماری داستاں رکھ دی
شبِ غم اے تصور ان کو مجبور تبسم کر
مرتب اس اجالے میں ہم اپنی داستاں کر لیں

شکیل بدایونی

سرگزشت دل کو روداد جہاں سمجھا تھا میں
مختصر سی بات کو اک داستاں سمجھا تھا میں

عزیز حامد مدنی

الگ الگ بھی بہت دل فریب نکلے گی
کہیں گے لوگ ابھی تیری داستاں کیا کیا

فانی بدایونی

کیا دن تھے جب مآل وفا کی خبر نہ تھی
وہ دن بھی تھے کہ حال وفا داستاں نہ تھا

اختر ہوشیارپوری

حریف داستاں کرنا پڑا ہے
زمیں کو آسماں کرنا پڑا ہے

فراق گورکھپوری

بات نکلے بات سے جیسے وہ تھا تیرا بیاں
نام تیرا داستاں در داستاں بنتا گیا
بس اسی کی ترجمانی ہے مرے اشعار میں
جو سکوت راز رنگیں داستاں بنتا گیا

مجروح سلطان پوری

شرحِ غم تو مختصر ہوتی گئی اس کے حضور
لفظ جو منہ سے نہ نکلا داستاں بنتا گیا

محسن نقوی

مجھ کو فارغ دنوں کی امانت سمجھ
بھولی بسری ہوئی داستاں ایک میں