مرزا غالب

ہے بس کہ ہر اک ان کے اشارے میں نشاں اور
کرتے ہیں محبت تو گزرتا ہے گماں اور
ہم پر جفا سے ترکِ وفا کا گماں نہیں
اک چھیڑ ہے وگرنہ مراد امتحاں نہیں

امام بخش ناسخ

تازگی ہے سخن کہنہ میں یہ بعد وفات
لوگ اکثر مرے جینے کا گماں رکھتے ہیں

حیدر علی آتش

معدوم وہ کمر ہے نہ موہوم وہ دہن
کہتے ہیں شاعر ان کے جو کچھ کچھ گماں میں ہے
نکالے تھے دو چاند اس نے مقابل
وہ شب صبح جنت کا جس پر گماں تھا
جاں کی تسکیں کے لیے حالتِ دل کہتے ہیں
بے یقینی کا تری ہم کو گماں ہے کہ جو تھا
دہن پر ہیں ان کے گماں کیسے کیسے
کلام آتے ہیں درمیاں کیسے کیسے

مصحفی غلام ہمدانی

واں تغافل نے اپنا کام کیا
یاں رہے مہر کے گماں میں ہم
ملتا ہے ہر اک سے مصحفیؔ یار
سمجھے ہے کہ بد گماں نہیں ہم
رخ اس کا میں اے مصحفیؔ کیوں کہ دیکھوں
نگاہیں مری بد گماں ہو گئی ہیں
دل میں مرغان چمن کے تو گماں اور ہی ہے
پر دلِ زار کا انداز فغاں اور ہی ہے

مومن خان مومن

اس طبع نازنیں کو کہاں تاب انفعال
جاسوس میرے واسطے اے بد گماں نہ چھوڑ

میر مہدی مجروح

دیکھ غمگیں مجھے بگڑتے ہو
پر لے درجے کے بد گماں ہو تم

فیض احمد فیض

صبا کے ہاتھ میں نرمی ہے ان کے ہاتھوں کی
ٹھہر ٹھہر کے یہ ہوتا ہے آج دل کو گماں

یگانہ چنگیزی

سنا ہے رنگ زمانہ کا اعتبار نہیں
بدل نہ جائے یقیں سے کہیں گماں اپنا

باقی صدیقی

خود پہ ہوتا ہے کسی کا دھوکا
کون سی ہے یہ گماں کی صورت
رنگ و بو کی تصویریں آئنے بدلتی ہیں
خار کی خلش چہرے ، پھول کا گماں چہرے
خیال سود احساسِ زیاں تک ساتھ دیتا ہے
یقیں کتنا ہی پختہ ہو گماں تک ساتھ دیتا ہے

جون ایلیا

تھی اک عجب فضا سی امکان خال و خد کی
تھا اک عجب مصور اور وہ مرا گماں تھا
ایک گماں کا حال ہے اور فقط گماں میں ہے
کس نے عذابِ جاں سہا کون عذابِ جاں میں ہے
ہم کو حقیقتوں نے کیا ہے خراب و خوار
ہم خواب خواب اور گمان گماں کے تھے
وہ رشتہ ہائے ذات جو برباد ہو گئے
میرے گماں کے تھے کہ تمہارے گماں کے تھے
کیا یقیں اور کیا گماں چپ رہ
شام کا وقت ہے میاں چپ رہ
کوئی سوچے تو سوز کرب جاں
سارا دفتر گماں کا دفتر ہے
مست ان کو گماں میں رہنے دے
خانہ برباد ہیں گماں ان کے

جگر مراد آبادی

خطا معاف زمانے سے بد گماں ہو کر
تری وفا پہ بھی کیا کیا ہمیں گماں گزرے
رہِ وفا میں اک ایسا مقام بھی آیا
کہ ہم خود اپنی طرف سے بھی بد گماں گزرے
کہیں ایسا تو نہیں وہ بھی ہو کوئی آزار
تجھ کو جس چیز پہ راحت کا گماں ہوتا ہے
ناز جس خاکِ وطن پر تھا مجھے آہِ جگر
اسی جنت پہ جہنم کا گماں ہوتا ہے
محبت دونوں جانب مہرباں ہے
کہ ہم اس سے وہ ہم سے بد گماں ہے
مبارک باد اے جذبِ محبت
انہیں اپنے پر اب میرا گماں ہے

سراج الدین ظفر

لا صراحی کہ کروں وہم و گماں غرق شراب
اس سے پہلے کہ میں خود وہم و گماں ہو جاؤں

قمر جلالوی

یہ کہہ کر حشر میں وہ رو دیا کچھ بد گماں ہو کر
کہ ایسی بھیڑ میں جاؤ گے پیشِ حق کہاں ہو کر

شکیب جلالی

کہتے ہیں ‘ حسن خدوخال کا پابند نہیں
ہر حسیں شے پہ مجھے تیرا گماں کیوں نہ ہوا

عرفان صدیقی

میں جب تازہ تر تھا تو اکثر تصور میں عکس رخِ دیگراں کھینچتا تھا
شبیہیں بناتا تھا اور ان کے اطراف نقش و نگار گماں کھینچتا تھا
مروتوں پہ وفا کا گماں بھی رکھتا تھا
وہ آدمی تھا غلط فہمیاں بھی رکھتا تھا
کیا عجب ہے میں اس آشوب میں زندہ رہ جاؤں
وہم ہو تیرا یقیں میرا گماں بھی شاید
تو جو بولے تو سنوں میں تری آواز کا سچ
ہر طرف خاموشی وہم و گماں ہے جاناں
یہ بھی دیکھوں ترے افلاک میں رکھا کیا ہے
آج میں بال و پر وہم و گماں کھولتا ہوں
سایۂ آسیب کوئی دوسرے گھر میں بھی ہے
ہاں گرفتار شبِ وہم و گماں میں ہی نہیں
اس آس پہ سچائی کے دن کاٹ رہے ہیں
آتی ہے شبِ وہم و گماں عیش کریں گے

الطاف حسین حالی

رات ان کو بات بات پہ سو سو دیے جواب
مجھ کو خود اپنی ذات سے ایسا گماں نہ تھا
کل مدعی کو آپ پر کیا کیا گماں رہے
بات اس کی کاٹتے رہے اور ہمزباں رہے

بہزاد لکھنوی

اس کا ہمیں ملال ہے ہم کیوں بدل گئے
اس کا نہیں ملال کہ وہ بد گماں ہیں کیوں

بشیر بدر

وہی شخص جس پہ اپنے دل و جاں نثار کر دوں
وہ اگر خفا نہیں ہے تو ضرور بد گماں ہے

ضیا جالندھری

خود کو سمجھا ہے فقط وہم و گماں بھی ہم نے
خود کو پایا ہے دل کون و مکاں بھی ہم نے

عالم تاب تشنہ

اب بھی ذروں پہ ستاروں کا گماں ہے کہ نہیں
زیرِ پا اب بھی ترے کاہکشاں ہے کہ نہیں

علی سردار جعفری

تخلیق پہ فطرت کی گزرتا ہے گماں اور
اس آدم خاکی نے بنایا ہے جہاں اور
صبح ہر اجالے پہ رات کا گماں کیوں ہے
جل رہی ہے کیا دھرتی عرش پہ دھواں کیوں ہے
چھوڑ کر وہم و گماں حسن یقیں تک پہنچو
پر یقیں سے بھی کبھی وہم و گماں تک آؤ

فارغ بخاری

ابھی سے میری نگاہیں اس دور کے تصور کو چھو رہی ہیں
بجھی بجھی بے کسوں کی آہوں پہ بجلیوں کا گماں رہے گا
اظہار عقیدت میں کہاں تک نکل آئے
ہم اہل یقیں وہم و گماں تک نکل آئے

جوش ملیح آبادی

حریم انوار سرمدی ہے ہر ایک ذرہ بہ رب کعبہ
مرا یہ عینی مشاہدہ ہے فریب وہم و گماں نہیں ہے
کب سے ہوں منکر گلبانگ ملائک پھر بھی
دل پہ جبریل کی دستک کا گماں ہے اب تک
کیا حدود یقیں میں ہے خلاق
یا سراسر گماں ہے کیا معلوم

خاطر غزنوی

ہر حقیقت کو گماں تک سوچوں
میں بہاروں کو خزاں تک سوچوں
بصد یقیں بڑھے حد گماں سے لوٹ آئے
دل و نظر کے تقاضے کہاں سے لوٹ آئے

سید ضمیر جعفری

ہم زمانے سے فقط حسن گماں رکھتے ہیں
ہم زمانے سے توقع ہی کہاں رکھتے ہیں

شان الحق حقی

یوں تری چشم مدارات پہ دل بھولا ہے
نشۂ مے پہ جوانی کا گماں ہو جیسے
اس نے یوں عرضِ محبت پہ سنبھل کر دیکھا
اس کے دل کو تو خبر ہو نہ گماں ہو جیسے
ہیں ابھی اہلِ ہوس سود و زیاں کے ہی اسیر
پھیرتے ہیں یوں ہی باتوں سے گماں اور طرف

فانی بدایونی

فانیؔ فسون موت کی تاثیر دیکھنا
ٹھہرا وہ دل کہ جس پہ سکوں کا گماں نہ تھا

اختر ہوشیارپوری

ہمیں خبر ہے کوئی ہم سفر نہ تھا پھر بھی
یقیں کی منزلیں طے کیں گماں کے ہوتے ہوئے
وہ شاید کوئی سچی بات کہہ دے
اسے پھر بد گماں کرنا پڑا ہے

اکبر حمیدی

کبھی جو دیکھتے ہیں مسکرا کے آپ ادھر
دل و نگاہ میں کیا کیا گماں گزرتے ہیں

فراق گورکھپوری

لاکھ کر جور و ستم لاکھ کر احسان و کرم
تجھ پہ اے دوست وہی وہم و گماں ہے کہ جو تھا
جو بھی کر جور و ستم جو بھی کر احسان و کرم
تجھ پہ اے دوست وہی وہم و گماں ہے کہ جو تھا
آنکھ جھپکی کہ ادھر ختم ہوا روز وصال
پھر بھی اس دن پہ قیامت کا گماں ہے کہ جو تھا
ہم کو ہے معلوم سب روداد علم و فلسفہ
ہاں ہر ایمان و یقیں وہم و گماں بنتا گیا
اتنا تو یقیں ہے کہ وہی ہیں تری آنکھیں
اس پر بھی مگر وہم و گماں اور ہی کچھ ہے

مجروح سلطان پوری

وہ جس پہ تمہیں شمع‌ سرِ رہ کا گماں ہے
وہ شعلۂ آوارہ ہماری ہی زباں ہے

محسن نقوی

میں نئے چہروں پہ کہتا تھا نئی غزلیں سدا
میری اس عادت سے اس کو بد گماں ہونا ہی تھا

ناصر کاظمی

کھٹکا ہے جدائی کا نہ ملنے کی تمنا
دل کو ہیں مرے وہم و گماں اور طرح کے