مرزا غالب

فراغت کس قدر رہتی مجھے تشویش مرہم سے
بہم گر صلح کرتے پارہ ہائے دل نمک داں پر
کیا غم خوار نے رسوا، لگے آگ اس محبت کو
نہ لاوے تاب جو غم کی، وہ میرا راز داں کیوں ہو
ادائے خاص سے غالب ہوا ہے نکتہ سرا
صلائے عام ہے یارانِ نکتہ داں کے لیے
پھر پرسشِ جراحتِ دل کو چلا ہے عشق
سامانِ صد ہزار نمک داں کیے ہوئے

حیدر علی آتش

بخت واژوں نے زباں کو یہ اثر بخشا ہے
تلخی مرگ مزا دے جو نمک داں مانگوں

داغ دہلوی

ہمیشہ آدمی کا آدمی غم خوار ہوتا ہے
یہی بے اعتباری ہو تو کوئی راز داں کیوں ہو

شیخ ابراہیم ذوق

جس نے ہو لذت اٹھائی زخمِ تیغ عشق کی
کب وہ مرہم دان کو ڈھونڈے نمک داں چھوڑ کر

مصحفی غلام ہمدانی

مجلس سے کرے ہے ہم کو باہر
گویا کہ مزاج داں نہیں ہم
پھر وہیں گر پڑے ہے پروانہ
گر ٹک اک شمع داں سے اٹھتا ہے
منہ اٹھائے جاتے ہیں یوں دشتِ غربت میں چلے
نابلد ہیں سب ہی ہم میں راہ داں کوئی نہیں

یگانہ چنگیزی

ہے فن عشق کا استاد بس دلِ وحشی
مریضِ غم کا یہی اک مزاج داں نکلا

عبدالحمید عدم

لطیف شامیں طبیعتوں کے ضمیر سے خوب آشنا تھیں
حسیں سویرے مزاج داں تھے حضور کو کچھ تو یاد ہو گا

قمر جلالوی

تری نظر پہ ترانے تری نظر پہ فغاں
ملے گا تجھ کو نہ مجھ سا مزاج داں صیاد

شکیب جلالی

ہر ایک بات ہے منت کشِ زباں لوگو
نہیں ہے کوئی بھی اپنا مزاج داں لوگو

الطاف حسین حالی

آگے بڑھے نہ قصۂ عشقِ بتاں سے ہم
سب کچھ کہا مگر نہ کھلے راز داں سے ہم
ہنستے ہیں اس کے گریۂ بے اختیار پر
بھولے ہیں بات کہہ کے کوئی راز داں سے ہم

اسرار الحق مجاز

کیوں کر ہوا ہے فاش زمانہ پہ کیا کہیں
وہ رازِ دل جو کہہ نہ سکے راز داں سے ہم

بیخود بدایونی

مجھ سے پوچھو تم اپنے جی کا حال
راز کی بات راز داں سے سنو

تلوک چند محروم

یہ غزل جوشؔ کو سنا محرومؔ
پھر کوئی نکتہ داں ملے نہ ملے

جلیل مانک پوری

آئینے پر نہیں یہ چشمِ کرم
اپنی صورت کا قدر داں تو ہے

جوش ملیح آبادی

نہ چھیڑ شاعر رباب رنگیں یہ بزم ابھی نکتہ داں نہیں ہے
تری نواسنجیوں کے شایاں فضائے ہندوستاں نہیں ہے
تری سماعت نگار فطرت کے لحن کی راز داں نہیں ہے
وگرنہ ذرہ ہے کون ایسا کہ جس کے منہ میں زباں نہیں ہے
اور کیوں امتحاں کے چکر میں
عالم و غیب داں ہے کیا معلوم

سیماب اکبر آبادی

خزاں کے وقت بھی خاموش رہتی ہے فضا ساری
چمن کی پتی پتی راز داں معلوم ہوتی ہے
بڑی مشکل سے ان کا رازِ الفت ہو سکا پنہاں
بڑی مدت میں جا کر ہم مزاج راز داں سمجھے

فانی بدایونی

کیا کیا دیے فریب غمِ عشق یار نے
دل ہم سے بدگمان ہے اور راز داں سے ہم
تیرا نگاہِ شوق کوئی راز داں نہ تھا
آنکھوں کو ورنہ جلوۂ جاناں کہاں نہ تھا

اختر ہوشیارپوری

کسے معلوم لمس ان انگلیوں کا
ہوا کو راز داں کرنا پڑا ہے

اکبر حمیدی

چراغ لے کے اسے شہر شہر ڈھونڈھتا ہوں
بس ایک شخص مجھے راز داں بنانا ہے