مرزا غالب

یارب وہ نہ سمجھے ہیں نہ سمجھیں گے مری بات
دے اور دل ان کو، جو نہ دے مجھ کو زباں اور
پاتا ہوں اس سے داد کچھ اپنے کلام کی
روحُ القدس اگرچہ مرا ہم زباں نہیں
کسی کو دے کے دل کوئی نوا سنجِ فغاں کیوں ہو
نہ ہو جب دل ہی سینے میں تو پھر منہ میں زباں کیوں ہو
رہیے اب ایسی جگہ چل کر جہاں کوئی نہ ہو
ہم سخن کوئی نہ ہو اور ہم زباں کوئی نہ ہو
زباں پہ بارِ خدایا! یہ کس کا نام آیا
کہ میرے نطق نے بوسے مر ی زباں کے لیے

امام بخش ناسخ

منعم کے شکر میں بھی ہلائیں کبھی کبھی
تنہا برائے لذت دنیا زباں نہیں
محفلِ یار میں کچھ بات نہ نکلی منہ سے
کہنے کو شمع کی مانند زباں رکھتے ہیں

انشاء اللہ خان انشا

وہ دیکھا خواب قاصر جس سے ہے اپنی زباں اور ہم
کہ گویا ایک جا ہے اس میں ہے وہ نوجواں اور ہم

بہادر شاہ ظفر

یہ قصہ وہ نہیں تم جس کو قصہ خواں سے سنو
مرے فسانۂِ غم کو مری زباں سے سنو

حیدر علی آتش

پڑھ سکتا سر نوشت کا مطلب کوئی نہیں
معلوم کچھ نہیں کہ یہ خط کس زباں میں ہے
نہ کہہ رندوں کو حرف سخت واعظ
درشت اہل جہنم کی زباں ہے
لکھا ہے کس کے خنجر مژگاں کا اس نے وصف
اک زخم دیکھتے ہیں قلم کی زباں میں ہم
آتشؔ سخن کی قدر زمانے سے اٹھ گئی
مقدور ہو تو قفل لگا دیں زباں میں ہم
رات کٹ جاتی ہے باتیں وہی سنتے سنتے
شمعِ محفل صنم چرب زباں ہے کہ جو تھا
ظاہر سے خوب رویوں کا باطن خلاف تھا
شیریں لبوں کی طرح سے ان کی زباں نہ تھی
نالوں سے ایک دن نہ کیے گرم گوش یار
آتشؔ مگر تمہارے دہن میں زباں نہ تھی
کرے جس قدر شکرِ نعمت وہ کم ہے
مزے لوٹتی ہے زباں کیسے کیسے
خموش ایسا ہوا ہوں میں کم دماغی سے
دہن میں ہے کہ نہیں ہے زباں نہیں معلوم

داغ دہلوی

نئی تاکید ہے ضبط محبت کی وہ کہتے ہیں
جگر ہو تو فغاں کیوں ہو دہن ہو تو زباں کیوں ہو
کس طرح جان دینے کے اقرار سے پھروں
میری زبان ہے یہ تمہاری زباں نہیں
یقیں ہے کہ ہو جائے آخر کو سچی
مرے منہ میں تیری زباں آتے آتے
نہیں کھیل اے داغؔ یاروں سے کہہ دو
کہ آتی ہے اردو زباں آتے آتے
کھلتے نہیں ہیں راز جو سوزِ نہاں کے ہیں
کیا پھوٹنے کے واسطے چھالے زباں کے ہیں
ناصح کے سامنے کبھی سچ بولتا نہیں
میری زباں میں رنگ تمہاری زباں کے ہیں
کیسا جواب حضرتِ دل دیکھیے ذرا
پیغام بر کے ہاتھ میں ٹکڑے زباں کے ہیں
پیغام بر کی بات پر آپس میں رنج کیا
میری زباں کی ہے نہ تمہاری زباں کی ہے
قاصد کی گفتگو سے تسلی ہو کس طرح
چھپتی نہیں وہ بات جو تیری زباں کی ہے
اردو ہے جس کا نام ہمیں جانتے ہیں داغؔ
ہندوستاں میں دھوم ہماری زباں کی ہے
پکارتی ہے خموشی مری فغاں کی طرح
نگاہیں کہتی ہیں سب رازِ دل زباں کی طرح
مزے ہیں اس دہن زخم کے لیے کیا کیا
جو چوسے تیر کے پیکان کو زباں کی طرح
شب اس کی بزم میں تھا شمع پر بھی رشک ہمیں
کہ منہ میں شعلے کو گلگیر لے زباں کی طرح

مصحفی غلام ہمدانی

مصحفیؔ سانگ سے کیا اکھڑے ہے پشم اس کی بھلا
سو طرح سے ہو جسے یاد زباں کا بہروپ
مصحفیؔ گرچہ یہ سب کہتے ہیں ہم سے بہتر
اپنی پر ریختہ گوئی کی زباں اور ہی ہے
مصحفیؔ گھر کے گھر جلا دے گا
ایسے آتش زباں کو کیوں چھیڑا
منہ میں جس کے تو شبِ وصل زباں دیتا ہے
صبح تک مارے مزے ہی کے وہ جاں دیتا ہے
ہم کرتے ہیں سو زباں سے باتیں
یوں کہنے کو منہ میں ہے زباں ایک
شعر دولت ہے کہاں کی دولت
میں غنی ہوں تو زباں کی دولت
میں جو پوچھوں ہوں ترے گھر میں بھی آتا ہے کوئی
یوں کہے ہے پھیر کر منہ میں زباں کوئی نہیں

مصطفٰی خان شیفتہ

ہر ہر قدم پہ رشک سے جلتی ہے شمعِ فند
چلتا ہے وہ بھی شیفتہ میری زباں کی طرح

مومن خان مومن

ناچار دیں گے اور کسی خوب رو کو دل
اچھا تو اپنی خوئے بد اے بد زباں نہ چھوڑ

میر مہدی مجروح

ہے وہی ٹھیک جو کہو مجروحؔ
کیوں نہ ہو صاحب زباں ہو تم

فیض احمد فیض

اب وہی حرفِ جنوں سب کی زباں ٹھہری ہے
جو بھی چل نکلی ہے وہ بات کہاں ٹھہری ہے
دستِ صیاد بھی عاجز، ہے کفِ گلچیں بھی
بوئے گل ٹھہری نہ بلبلِ کی زباں ٹھہری ہے
ہر صدا پر لگے ہیں کان یہاں
دل سنبھالے رہو زباں کی طرح

مرزا رفیع سودا

مقدور نہیں اس کی تجلی کے بیاں کا
جوں شمع سراپا ہو اگر صرف زباں کا
ہر ایک کے دکھ درد کا اب ذکر و بیاں ہے
مجھ کو بھی ہو رخصت مرے بھی منہ میں زباں ہے
صدمہ ہر چند ترے جور سے جاں پر آیا
تس پہ شکوہ نہ کبھی میری زباں پر آیا

میر انیس

ضبط دیکھو سب کی سن لی اور کچھ اپنی کہی
اس زباں دانی پر ایسے بے زباں پیدا ہوئے
شور بختی آئی حصے میں انہیں کے وا نصیب
تلخ کامی کے لیے شیریں زباں پیدا ہوئے

یگانہ چنگیزی

کلام یاسؔ سے دنیا میں پھر اک آگ لگی
یہ کون حضرت آتشؔ کا ہم زباں نکلا
ہمارا رنگِ سخن یاسؔ کوئی کیا جانے
سوائے آتشؔ ہوا کون ہم زباں اپنا
اک آگ سی لگی ہے زمانے میں ہر طرف
کیا جانے زمزمے یہ کس آتش‌ زباں کے ہیں

باقی صدیقی

ہے یہ کیسی غمِ جاں کی صورت
دل بھی اب چپ ہے زباں کی صورت
کوئی تو بات ہے اظہارِ غم میں
وگرنہ لڑکھڑاتی ہے زباں کیوں
روداد شوق تشنۂ اظہار ہی رہی
ملنے کو ہم خیال ملے ، ہم زباں ملے
موج صدائے دل پہ رواں ہے حصار زیست
جس وقت تک ہے منہ میں زباں بولتے رہو
تم بھی کہنے لگے خدا لگتی
لڑکھڑانے لگی زباں دیکھو
موسموں کی تلخی کا کچھ سراغ دیتے ہیں
شاخ جسم نازک پر برگ بے زباں چہرے
زندگی چاہتی ہے ہنگامہ
اور ہم لوگ بے زباں ٹھہرے
نہ اپنے دل کے نہ اپنی زباں کے ساتھ چلے
فریب خوردہ تھے ہر مہرباں کے ساتھ چلے

جون ایلیا

دریچہ باز ہے یادوں کا اور میں
ہوا سنتا ہوں پیڑوں کی زباں سے
دریچہ باز ہے یادوں کا اور میں
ہوا سنتا ہوں میں پیڑوں کی زباں سے
ہم نے رنجش میں یہ نہیں سوچا
کچھ سخن تو زباں کے تھے ہی نہیں
اب کوئی بات تیری بات نہیں
نہیں تیری تری زباں چپ رہ

جگر مراد آبادی

کیا تعجب کہ مری روحِ رواں تک پہنچے
پہلے کوئی مرے نغموں کی زباں تک پہنچے
آنکھ تک دل سے نہ آئے نہ زباں تک پہنچے
بات جس کی ہے اسی آفتِ جاں تک پہنچے

خواجہ میر درد

مجھے رات ساری ہی تیرے ہاں کٹے کیوں کے روتے نہ شمع ساں
کہ ہو سکے ہے کچھ اب بیاں نہ یہ بات ہے کہ زباں نہیں

سراج الدین ظفر

میں نے کہا کہ حد ادب میں نہیں ظفرؔ
اس نے کہا نہ بند کسی کی زباں کرو

قمر جلالوی

ہو جاؤ آج کل کے وعدے سے منحرف
یہ بھی نہیں حضور تمھاری زباں سے دور
شکایت وہ نہ کرنے دیں یہ سب کہنے کی باتیں ہیں
سرِ محشر کسی کی روک سکتا ہے زباں کوئی
کہا تو ہے کہ قفس میں نہیں اماں صیاد
خدا کرے کے سمجھ لے مری زباں صیاد
قفس سے ہٹ کے ذرا سن مری فغاں صیاد
لرز رہی ہے ترے سامنے زباں صیاد
سنے جو حشر میں شکوے نظر بدل کیے
کہیں بھی بند تمھاری زباں نہیں رہتی
خدا معلوم کیا سے کیا کیا ہو گا بیاں تو نے
لفافے میں نہ رکھ لی نامہ بر میری زباں تو نے
مٹا کر رکھ دیے ہیں یوں ہزاروں بے زباں تو نے
نہ رکھا اپنے عہدِ ظلم کا کوئی نشاں تو نے
عدو کہتے ہیں اب سہرا فصاحت کا ترے سر ہے
قمر بالکل بنا دی ہے تو نے دلھن اردو زباں تو نے

شکیب جلالی

کہنا ہے وہی جس کی توقع ہے تجھے بھی
مت پوچھ مرے دل کی زباں ہیں تری آنکھیں
ہر ایک بات ہے منت کشِ زباں لوگو
نہیں ہے کوئی بھی اپنا مزاج داں لوگو

عرفان صدیقی

پوچھنے والو، مرا رازِ نہاں کیسے کھلے
انگلیاں ہونٹوں پہ رکھی ہیں زباں کیسے کھلے
اب تری گرمی گفتار سے یاد آتا ہے
ہم نفس! ہم بھی کبھی شعلہ زباں تھے کتنے
ایک میں ہوں کہ اس آشوبِ نوا میں چپ ہوں
ورنہ دنیا مرے زخموں کی زباں بولتی ہے
اگر میں فرض نہ کر لوں کہ سن رہا ہے کوئی
تو پھر مرا سخنِ بے زباں کہاں جائے