مرزا غالب

ان آبلوں سے پاؤں کے گھبرا گیا تھا میں
جی خوش ہوا ہے راہ کو پر خار دیکھ کر
جگرِ تشنۂِ آزار ، تسلی نہ ہوا
جوئے خوں ہم نے بہائی بن ہر خار کے پاس
فروغِ حسن سے ہوتی ہے حل مشکلِ عاشق
نہ نکلے شمع کے پاسے ، نکالے گرنہ خار آتش
نہ ذوقِ گریباں، نہ پروائے داماں
نگاہ آشنائے گل و خار ہیں ہم
دل میں ہے یار کی صفِ مژگاں سے روکشی
حالاں کہ طاقت خلشِ خار بھی نہیں
کانٹوں کی زباں سوکھ گئی پیاس سے یا رب
اک آبلہ پا وادیِ پر خار میں آوے
کہوں کیا ، دل کی کیا حالت ہے ہجرِ یار میں ، غالب!
کہ بے تابی سے ہر یک تارِ بستر ، خارِ بستر ہے

امام بخش ناسخ

کمال صورت بے درد سے تنفر ہے
نہ دیکھیں ہم کبھی اس گل کو جس میں خار نہ ہو
داغ سر ہیں جوش سودا میں برنگ گل مجھے
مثل گلبن پاؤں میں کب ہے شکایت خار کی
آتی ہے او قیس لیلیٰ دشت میں
خونِ پا سے جلد اب پر خار رنگ
او وجود چمن آرائے ازل کے منکر
خود بخود گل ہوئے موجود نہ خار آپ سے آپ
دیے فلک نے مرے سر کو کٹتے ہی گل داغ
گلہ نہیں کوئی پاؤں تلے جو خار آیا

حیدر علی آتش

غم نہیں گو اے فلک رتبہ ہے مجھ کو خار کا
آفتاب اک زرد پتا ہے مرے گل زار کا
خانۂ زنجیر سے مثل صدا ڈرتا ہوں اب
یاد آتا ہے کف پا میں کھٹکنا خار کا
خط روئے یار سے ایذا اٹھائی ہے زبس
سبزہ سے ہوتا ہے صدمہ میرے دل کو خار کا
دشت عدم سے آتے ہیں باغ جہاں میں ہم
بے داغِ لالہ و گلِ بے خار کے لیے
گفت و شنید میں ہوں بسر دن بہار کے
گل کے لیے ہے گوش زباں خار کے لیے
گل سے جو سامنا ترے رخسار نے کیا
مژگاں نے وہ کیا کہ جو کچھ خار نے کیا
کاوش مژہ نے کی رخ دلبر کی دید میں
پائے نگاہ سے بھی خلشِ خار نے کیا
ہنستے ہیں دیکھ کے مجنوں کو گل صحرائی
پا برہنہ طلب خار لیے پھرتی ہے
تھکیں جو پاؤں تو چل سر کے بل نہ ٹھہر آتشؔ
گلِ مراد ہے منزل میں خار راہ میں ہے

شیخ ابراہیم ذوق

ہو پاک دامنوں کو خلش گر سے کیا خطر
کھٹکا نہیں نگاہ کو مژگاں کے خار کا

مصحفی غلام ہمدانی

یہ جنوں کی عقدہ کشائیاں کوئی بھولتا ہوں میں مصحفیؔ
کہ بہ روئے ہر سر آبلہ وہی ناخن سر خار تھا
دیکھیو پانو رکھ دیا کس نے
آج کیوں نوکِ خار پھر چمکی
اے مصحفیؔ اس شوق سے ٹک بچ کے تو چلنا
سنتا ہے میاں وہ بت خوں خار غضب ہے
جو سیر کرنی ہے کر لے کہ جب خزاں آئی
نہ گل رہے گا چمن میں نہ خار ٹھہرے گا
ہم کب کے چمن زار میں بے ہوش پڑے ہیں
معلوم نہیں گل کدھر اور خار کدھر ہے
بکتے ہیں شہر میں گلِ بے خار ہر طرف
ہے باغباں کی گرمیِ بازار ہر طرف

مصطفٰی خان شیفتہ

طالعِ خفتہ کی تعریف کہاں تک کیجے
پاؤں کو بھی خلشِ خار نے سونے نہ دیا

یگانہ چنگیزی

ہنوز دردِ جدائی یار باقی ہے
کھٹک رہا تھا جو دل میں وہ خار باقی ہے
خزاں کے دم سے مٹا خوب و زشت کا جھگڑا
چلو یہ خواب ہوا گل رہے نہ خار رہے

باقی صدیقی

سب ہوس کے ہیں تقاضے باقیؔ
ورنہ گلشن میں کوئی خار نہیں
خار کو کوئی کلی کہتا نہیں
نرم ہو، نازک ہو پھر بھی خار ہے
یہ گل نہیں یہ شگوفے نہیں یہ خار نہیں
ہے چیز کون سی جو تیرا شاہکار نہیں
کیوں صبا کی نہ ہو رفتار غلط
گل غلط غنچے غلط خار غلط

جون ایلیا

ذکر گل ہو خار کی باتیں کریں
لذت و آزار کی باتیں کریں

جگر مراد آبادی

کبھی شاخ و سبزہ و برگ پر کبھی غنچہ و گل و خار پر
میں چمن میں چاہے جہاں رہوں مرا حق ہے فصلِ بہار پر

خواجہ میر درد

باغ جہاں کے گل ہیں یا خار ہیں تو ہم ہیں
گر یار ہیں تو ہم ہیں اغیار ہیں تو ہم ہیں

مجید امجد

آ، ساز گلستاں کو بہ مضرابِ خار چھیڑ
مطرب، کوئی ترانہ بیادِ بہار چھیڑ