مرزا غالب

ابرو سے ہے کیا اس نگہِ ناز کو پیوند
ہے تیر مقرر مگر اس کی ہے کماں اور

حیدر علی آتش

پشت خمیدہ دیکھ کے ہوتا ہوں نعرہ زن
کرتا ہوں صرف تیر جو زور اس کماں میں ہے
نکلی لبوں سے آہ کہ گردوں نشانہ تھا
گویا کہ تیر جوڑے ہوئے تھے کماں میں ہم
پیری میں مجھ کو عشق حسین جواں ہوا
بارِ دگر کبادے میں زور کماں ہوا
قوسِ قزح سے ہم نے بھی تشبیہ دی اسے
چلہ نہ ہونے سے جو وہ ابرو کماں نہ تھی

داغ دہلوی

حیا نے روک لیا جذبِ دل نے کھینچ لیا
چلے وہ تیر کی صورت کھنچی کماں کی طرح
نہ چھوڑ صید محبت کو خاک پر صیاد
اسے بھی ڈال لے تو دوش پر کماں کی طرح

شیخ ابراہیم ذوق

کہے ہے مرغِ دل اے کاش میں زاغ کماں ہوتا
کہ تا شاخ کماں پر اس کی میرا آشیاں ہوتا

مصحفی غلام ہمدانی

آسماں کو نشانہ کرتے ہیں
تیر رکھتے ہیں جب کماں میں ہم
انہیں فرض ہے تیر کا کس کے سجدہ
جو میوے کی شاخیں کماں ہو گئی ہیں
مصحفیؔ میں ہدف ناز ہوں اور واں غمزہ
دم بدم دست تغافل میں کماں دیتا ہے

مصطفٰی خان شیفتہ

خمیازہ بند بند گسل ہے خمار سے
بدمست کر گئی یہ کس ابرو کماں کی طرح

فیض احمد فیض

صحنِ گلشن میں بہر مشتاقاں
ہر روش کھنچ گئی کماں کی طرح

قمر جلالوی

مژگاں کہاں ہیں ابروئے چشمِ بتاں سے دور
یہ تیر وہ ہیں جو نہیں ہوتے کماں سے دور

عرفان صدیقی

یہی شخص جو اب جہانِ مکافات میں قاتلوں سے اماں چاہتا ہے
کبھی پھینکتا تھا کمند آہوؤں پر کبھی طائروں پر کماں کھینچتا تھا
نشانہ باز کوئی اور ہے عدو کوئی اور
کسی کا تیر کسی کی کماں سے آتا ہے
اے مرے طائرِ جاں کس کی طرف دیکھتا ہے
ناوکِ کور کماں کس کی طرف دیکھتا ہے
لو سوالِ دہنِ بستہ کا آتا ہے جواب
تیر سرگوشیاں کرتے ہیں کماں بولتی ہے

مجید امجد

بجھی شمعوں کی اس نگری میں امجد
ابھرتے آفتابوں کی کماں ہم

علی سردار جعفری

ہم تو گھر سے نکلے تھے جیتنے کو دل سب کا
تیغ ہاتھ میں کیوں ہے دوش پر کماں کیوں ہے
تیغ کی طرح چلو چھوڑ کے آغوش نیام
تیر کی طرح سے آغوش کماں تک آؤ

ثروت حسین

ثروتؔ ہدف بہت ہیں جوانان شہر میں
رکھو ابھی نہ تیر و کماں اپنے ہاتھ سے

شان الحق حقی

یوں پلٹ جاتی ہیں ہر لحظہ وہ نظریں جیسے
جوڑ کر تیر کو کھنچتی ہے کماں اور طرف

اختر ہوشیارپوری

صف اعدا میں اپنے بازوؤں کو
مجھے اخترؔ کماں کرنا پڑا ہے

احمد فراز

کسی دشمن کا کوئی تیر نہ پہنچا مجھ تک
دیکھنا اب کے مرا دوست کماں کھینچتا ہے

فراق گورکھپوری

آج بھی صید گہ عشق میں حسن سفاک
لیے ابرو کی لچکتی سی کماں ہے کہ جو تھا
آج بھی صید گہ عشق میں حسن سفاک
لیے ابرو کی لچکتی سی کماں ہے کہ جو تھا

محسن احسان

اٹھا کے سر پہ پھروں بار آرزو محسنؔ
کمر کو خم میں کبھی صورت کماں نہ کروں