مصطفٰی خان شیفتہ

اس نے عاشق لکھا عدو کو لقب
ہائے لکھا مرے مقدر کا

جون ایلیا

مقدور اپنا کچھ بھی نہیں اس دیار میں
شاید وہ جبر ہے کہ مقدر بھی کچھ نہیں

شکیب جلالی

دستکیں دیتی ہیں شب کو درِ دل پر یادیں
کچھ نہیں ہے ‘ مگر اس گھر کا مقدر یادیں

عرفان صدیقی

رستہ بدل کے معرکۂ صبر و جور میں
کس نے بدل دیا ہے مقدر لکھا ہوا
جسم و جاں کی آگ سے منظر بہ منظر روشنی
اس کا پیکر روشنی، میرا مقدر روشنی

مصطفی زیدی

شرمندہ ہوا تھا یہیں پندار امارت
چمکا تھا فقیروں کا مقدر اسی گھر میں

عالم تاب تشنہ

خواہش کو یہاں حسبِ ضرورت نہیں پایا
حاصل کو یہاں حسب مقدر نہیں دیکھا

حفیظ ہوشیارپوری

وہ نہیں موت سہی موت نہیں نیند سہی
کوئی آ جائے شبِ غم کا مقدر بن کے
یاد پھر آ گئیں بھولی ہوئی باتیں کیا کیا
پھر ملاقات ہوئی ایسے مقدر بن کے

رسا چغتائی

وہ نظر خضرِ راہ مقتل تھی
اس سے آگے مرا مقدر تھا

احمد فراز

اے خدا آج اسے سب کا مقدر کر دے
وہ محبت کہ جو انساں کو پیمبر کر دے
میری قسمت کی لکیریں میرے ہاتھوں میں نہ تھیں
تیرے ماتھے پر کوئی میرا مقدر دیکھتا
تجھ سے بچھڑ کے ہم بھی مقدر کے ہو گئے
پھر جو بھی در ملا ہے اسی در کے ہو گئے

اقبال ساجد

خوشبو کی طرح پھول کے پنجرے میں نہیں بند
آزاد فضاؤں کا مقدر بھی نہیں ہم

شاذ تمکنت

جس کو ہوا کے رخ پہ نہ کھولا گیا کبھی
اک ایسے بادباں کا مقدر مجھے نہ دو