مومن خان مومن

سنگ سودا جنوں میں لیتے ہیں
اپنا ہم مقبرہ بنانے کو

میر مہدی مجروح

بات بنتی نظر نہیں آتی
اب وہ باتیں بہت بنانے لگے
ذرا دیکھیے ان کی صناعیاں
مجھے دیکھ کر منہ بنانے لگے

باقی صدیقی

درد ہوتا تو مسلسل ہوتا
دل کو ہم دل تو بنانے پاتے

قمر جلالوی

رخ دیکھ کہ خود بن گیا آئینے کی صورت
بیٹھا جو مصور تری تصویر بنانے
بہاروں کی آخر کوئی انتہا ہے کہ پھولوں سے شاخیں جھکی جا رہی ہیں
یہی وقت ہے بجلیاں ٹوٹنے کا، نشیمن بنانے کی کوشش نہ کرنا

الطاف حسین حالی

ڈر ہے میری زباں نہ کھل جائے
اب وہ باتیں بہت بنانے لگے

اکبر معصوم

یہ کھیل ہے تو خوب مگر تیرے ہاتھ سے
اس ٹوٹنے بگڑنے بنانے میں جاؤں گا

بشیر بدر

لوگ ٹوٹ جاتے ہیں ایک گھر بنانے میں
تم ترس نہیں کھاتے بستیاں جلانے میں
ہر دھڑکتے پتھر کو لوگ دل سمجھتے ہیں
عمریں بیت جاتی ہیں دل کو دل بنانے میں

حفیظ جالندھری

آنے والے جانے والے ہر زمانے کے لیے
آدمی مزدور ہے راہیں بنانے کے لیے

شکیل بدایونی

اگر وہ سامنے ہوتے تو ان سے یہ کہتا
ترے حضور میں بگڑی بنانے آیا ہوں

اکبر حمیدی

رات آئی ہے بچوں کو پڑھانے میں لگا ہوں
خود جو نہ بنا ان کو بنانے میں لگا ہوں

فراق گورکھپوری

سر میکدہ تشنگی کی وہ قسمیں
وہ ساقی سے باتیں بنانے کی راتیں
بات بنتی اور باتوں سے نظر آتی نہیں
اس نگاہِ ناز کی باتیں بنانے کی کہو

کلیم عاجز

مستی لیے آنکھوں میں بکھیرے ہوئے زلفیں
آ پھر مجھے دیوانہ بنانے کے لیے آ

کیف بھوپالی

داغ دنیا نے دیے زخم زمانے سے ملے
ہم کو تحفے یہ تمہیں دوست بنانے سے ملے
در و دیوار پہ شکلیں سی بنانے آئی
پھر یہ بارش میری تنہائی چرانے آئی

ناصر کاظمی

عمارتیں تو جل کے راکھ ہو گئیں
عمارتیں بنانے والے کیا ہوئے