فیض احمد فیض

سینے پہ ہاتھ ہے ، نہ نظر کو تلاشِ بام
دل ساتھ دے تو آج غمِ آرزو کریں
نہیں نگاہ میں منزل تو جستجو ہی سہی
نہیں وصال میسر تو آرزو ہی سہی

یگانہ چنگیزی

پناہ ملتی نہ امید بے وفا کو کہیں
ہوس نصیب اگر ترک آرزو کرتے
کبھی نہ پرورش نخل آرزو کرتے
نمو سے پہلے جو اندیشۂ نمو کرتے

جون ایلیا

کوئی حاصل نہ تھا آرزو کا مگر سانحہ یہ ہے اب آرزو بھی نہیں
وقت کی اس مسافت میں بے آرزو تم کہاں جاؤ گے ہم کہاں جائیں گے
بھٹکتا پھر رہا ہوں جستجو بن
سراپا آرزو ہوں آرزو بن

خواجہ میر درد

ہم تجھ سے کس ہوس کی فلک جستجو کریں
دل ہی نہیں رہا ہے کہ کچھ آرزو کریں
تمنا تری ہے اگر ہے تمنا
تری آرزو ہے اگر آرزو ہے

قمر جلالوی

لگا بیٹھے ہیں اپنے پاؤں میں وہ شام سے مہندی
انہیں معلوم کیا کس کس کا خونِ آرزو ہو گا
قفس کی راحتوں نے یادِ گلشن کی بھلا ڈالی
نہ کی صیاد کے گھر آشیاں کی آرزو برسوں
مآلِ گل کو جب تک آنکھ سے دیکھا نہیں ہو گا
کلی کو پھول بن جانے کی کیا کیا آرزو ہو گی
جنہیں اے راہبر لٹوا رہے ہیں راہِ منزل میں
خدا معلوم ان کے دل میں کیا کیا آرزو ہو گی
ہمارا کیا ہے ارمانِ وفا میں جان دے دیں گے
مگر تم کیا کرو گے جب تمھیں یہ آرزو ہو گی
بیاں جو حشر میں ہم وجہ آرزو کرتے
وہ کیا ہیں ان کے فرشتے بھی گفتگو کرتے
تری گلی میں بیاں کس سے آرزو کرتے
کسی کو جانتے ہوتے تو گفتگو کرتے
یہ کہہ رہ گیا ہو گا کوئی ستم ورنہ
حضور اور میری جینے کی آرزو کرتے

عرفان صدیقی

اسی کمال کی کرتے تھے آرزو ہم لوگ
بجھے چراغ تو ٹھہرے ستارہ جو ہم لوگ

مجید امجد

عزمِ نظر نہیں، ہوسِ جستجو نہیں
کوئی بھی اب شریکِ غمِ آرزو نہیں
چاندنی میں سایہ ہائے کاخ و کو میں گھومیے
پھر کسی کو چاہنے کی آرزو میں گھومیے
کیا خبر، کس موڑ پر مہجور یادیں آ ملیں
گھومتی راہوں پہ، گردِ آرزو میں گھومیے

مصطفی زیدی

زبانِ غیر سے کیا شرح آرزو کرتے
وہ خود اگر کہیں ملتا تو گفتگو کرتے
وہ اک طلسم تھا قربت میں اس کے عمر کٹی
گلے لگا کے اسے اس کی آرزو کرتے
حجاب اٹھا دیے خود ہی نگار خانوں نے
ہمیں دماغ کہاں تھا کہ آرزو کرتے

رئیس فروغؔ

سفر میں جب تلک رہنا گھروں کی آرزو کرنا
گھروں میں بیٹھ کر بیتے سفر کی گفتگو کرنا
تمھیں دیکھیں نہ دیکھیں ایک عادت ہے کہ ہر شب کو
تمہارے خواب کی سونے سے پہلے آرزو کرنا

اختر شیرانی

نہ بھول کر بھی تمنائے رنگ و بو کرتے
چمن کے پھول اگر تیری آرزو کرتے
غمِ زمانہ نے مجبور کر دیا ورنہ
یہ آرزو تھی کہ بس تیری آرزو کرتے
جنونِ عشق کی تاثیر تو یہ تھی اخترؔ
کہ ہم نہیں وہ خود اظہارِ آرزو کرتے

ادا جعفری

زندگی کی طرح خراج طلب
کوئی درماندہ آرزو ہے ابھی
یہی نہیں کہ زخم جاں کو چارہ جو ملا نہیں
یہ حال تھا کہ دل کو اسم آرزو ملا نہیں

بیان میرٹھی

لہو ٹپکا کسی کی آرزو سے
ہماری آرزو ٹپکی لہو سے

زہرا نگاہ

حرف حرف گوندھے تھے طرز مشکبو کی تھی
تم سے بات کرنے کی کیسی آرزو کی تھی

ضیا جالندھری

کیا سحر تھا کہ ہنستے ہوئے جان دے گئے
وہ بھی کہ جن کو تاب غمِ آرزو نہ تھی

علی سردار جعفری

شکست شوق کو تکمیلِ آرزو کہیے
جو تشنگی ہو تو پیمانہ و سبو کہیے
چراغِ انجمن حیرت نظارہ تھے
وہ لالہ رو جنہیں اب داغ آرزو کہیے

فارغ بخاری

بس اب تو یاد سے ہی زندگی عبارت ہے
کہاں کا وعدہ کہ ملنے کی آرزو بھی نہیں

تلوک چند محروم

نسیمِ صبح کا جھونکا نفس نفس تیرا
رہے گی سوختہ جانوں کو آرزو تیری
گدا نہیں ہیں کہ دست سوال پھیلائیں
کبھی نہ آپ نے پوچھا کہ آرزو کیا ہے
نہ میرے اشک میں شامل نہ ان کے دامن پر
میں کیا بتاؤں انہیں خونِ آرزو کیا ہے

جلیل مانک پوری

آج تک دل کی آرزو ہے وہی
پھول مرجھا گیا ہے بو ہے وہی
جو ہو پوری وہ آرزو ہی نہیں
جو نہ پوری ہو آرزو ہے وہی
تجھ سے سو بار مل چکے لیکن
تجھ سے ملنے کی آرزو ہے وہی

حسرت موہانی

نہ سمجھے دل فریب آرزو کو
نہ ہم چھوڑیں تمہاری جستجو کو
سمجھتا ہی نہیں ہے کچھ وہ بد خو
نہ خود مجھ کو نہ میری آرزو کو

شاد عظیم آبادی

فقط شور دل پر آرزو تھا
نہ اپنے جسم میں ہم تھے نہ تو تھا

فانی بدایونی

آپ سے شرح آرزو تو کریں
آپ تکلیف گفتگو تو کریں
تم سے ملنے کی آرزو ہی سہی
تم سے ملنے کی آرزو تو کریں

احمد فراز

اب تو یہ آرزو ہے کہ وہ زخم کھائیے
تا زندگی یہ دل نہ کوئی آرزو کرے

قابل اجمیری

طلب کی آگ کسی شعلہ رو سے روشن ہے
خیال ہو کہ نظر آرزو سے روشن ہے
وصالِ یار تو ممکن نہیں مگر ناصح
رخ حیات اسی آرزو سے روشن ہے

محسن احسان

ڈر ہے کہ شامِ ہجر میں دل کا دیا بجھا نہ دیں
اب کے ہوا کی سازشیں شعلۂ آرزو سے ہیں

محسن نقوی

کھنڈر کی تہ سے بریدہ بدن سروں کے سوا
ملا نہ کچھ بھی خزانوں کی آرزو کر کے