مرزا رفیع سودا

تجھ قید سے دل ہو کر آزاد بہت رویا
لذت کو اسیری کی کر یاد بہت رویا

یگانہ چنگیزی

نکہتِ گل کی ہے رفتار ہوا کی پابند
روح قالب سے نکلنے پہ بھی آزاد نہیں

جون ایلیا

میری بانہوں میں بہکنے کی سزا بھی سن لے
اب بہت دیر میں آزاد کروں گا تجھ کو
آج اس سوز تصور کی خوشی میں اے دوست
طائر صبر کو آزاد کیا ہے میں نے
ہیں اب ہم اور زد ہے حادثوں کی
ہمیں آزاد فرمایا گیا ہے

جگر مراد آبادی

یہی ہے راز آزادی جہاں تک یاد ہوتا ہے
کہ نظریں قید ہوتی ہیں تو دل آزاد ہوتا ہے
بڑی مشکل سے پیدا ایک وہ آدم زاد ہوتا ہے
جو خود آزاد جس کا ہر نفس آزاد ہوتا ہے
یہ مانا ننگ پابندی سے کیا آزاد کو مطلب
مگر وہ شرم آزادی سے بھی آزاد ہوتا ہے

قمر جلالوی

قید میں صیاد کی پھر بھی ہیں نغمے رات دن
اس قدر پابندیوں پر کس قدر آزاد ہوں

عرفان صدیقی

اب اس کے آگے جو کچھ فیصلہ ہو قسمت کا
ترے سمند بھی میرے غزال بھی آزاد

احسان دانش

عشق کو تقلید سے آزاد کر
دل سے گریہ آنکھ سے فریاد کر

علی سردار جعفری

قید چمن بھی بن جاتا ہے
مرغِ چمن آزاد نہیں ہے

تلوک چند محروم

اسیرِ زلف ہے محرومؔ ان کا
جنہیں آتا نہیں آزاد کرنا
حلقۂ دام علائق بند مذہب قید ننگ
کس قدر پابندیاں ہیں فطرتِ آزاد پر
نہ کر محرومؔ تو فکرِ سخن اب فکر عقبیٰ کر
نوا پرواز بزم شعر میں آزاد ہوتا ہے

جوش ملیح آبادی

سوز غم دے کے مجھے اس نے یہ ارشاد کیا
جا تجھے کشمکش دہر سے آزاد کیا

حفیظ جالندھری

اب ہے آواز کی وہ شان نہ بازو کی اڑان
اور صیاد کیے دیتا ہے آزاد مجھے
نہ کر دل جوئی اے صیاد میری
کہ فطرت ہے بہت آزاد میری
پھر خط کا جواب ایک وہی طنز کا مصرع
مجبور ہے کیوں فطرتِ آزاد کسی کی
تنگ آ کر اے بندہ پرور
بندے کو آزاد کرو گے
حفیظؔ اپنے افکار کی سادگی کو
تکلف کی الجھن سے آزاد رکھنا

سیماب اکبر آبادی

اسیران وفا گھبرائیں کیوں تجویز زنداں سے
یہیں تو امتحان فطرتِ آزاد ہوتا ہے
بہار آئی ہے استقبال کرنے باب زنداں تک
نہیں معلوم سیمابؔ آج کون آزاد ہوتا ہے

شکیل بدایونی

بھول کر عہدِ گزشتہ کی حکایات شکیلؔ
دل کو ہر فکر سے آزاد کیے جاتا ہوں

فانی بدایونی

پابندی رسم بر طرف کیوں اے موت
ان کے بھی کیے ہیں تو نے قیدی آزاد