پھر اپنی خاک سے پیدا دلِ برباد ہوتا ہے
سیماب اکبر آبادی
اب اے بے درد کیا اس کے لیے ارشاد ہوتا ہے
پھر اپنی خاک سے پیدا دلِ برباد ہوتا ہے
تصور جب انیس خاطر ناشاد ہوتا ہے
جہانِ دل تری تصویر سے آباد ہوتا ہے
اسیران وفا گھبرائیں کیوں تجویز زنداں سے
یہیں تو امتحان فطرتِ آزاد ہوتا ہے
جگہ ملتی نہیں جس کو شبِ غم محشر دل میں
وہ ہنگامہ لبِ خاموش میں آباد ہوتا ہے
بہار آئی ہے استقبال کرنے باب زنداں تک
نہیں معلوم سیمابؔ آج کون آزاد ہوتا ہے
مفاعیلن مفاعیلن مفاعیلن مفاعیلن
ہزج مثمن سالم