مرزا غالب

کچھ دردمند منتظرِ انقلاب ہیں
جو شاد ہو چکے انہیں ناشاد کیجیے

بہادر شاہ ظفر

شاد و خرم ایک عالم کو کیا اس نے ظفرؔ
پر سبب کیا ہے کہ ہے رنجیدہ و ناشاد تو

داغ دہلوی

میرے قابو میں نہ پہروں دلِ ناشاد آیا
وہ مرا بھولنے والا جو مجھے یاد آیا
چین کرتے ہیں وہاں رنج اٹھانے والے
کام عقبیٰ میں ہمارا دلِ ناشاد آیا
شادیانہ جو دیا نالہ و شیون نے دیا
جب ملاقات کو ناشاد کی ناشاد آیا
یہ سخت جاں تو قتل سے ناشاد رہ گیا
خنجر چلا تو بازوئے جلاد رہ گیا
ان کی تو بن پڑی کہ لگی جان مفت ہاتھ
تیری گرہ میں کیا دلِ ناشاد رہ گیا

مصحفی غلام ہمدانی

تو اے پیغام بر جھوٹی ہی کچھ کہہ
کہ خوش ہو خاطر ناشاد میری

مصطفٰی خان شیفتہ

تنگ تھی جا خاطر ناشاد میں
آپ کو بھولے ہم ان کی یاد میں

فیض احمد فیض

اک گل کے مرجھانے پر کیا گلشن میں کہرام مچا
اک چہرہ کمھلا جانے سے کتنے دلِ ناشاد ہوئے

جون ایلیا

تنگ آغوش میں آباد کروں گا تجھ کو
ہوں بہت شاد کہ ناشاد کروں گا تجھ کو

جگر مراد آبادی

پہروں سے دھڑکنے کی بھی آتی نہیں آواز
کیا جانیے کیا ہے دلِ ناشاد کا عالم
مرے ناشاد رہنے پر وہ جب ناشاد ہوتا ہے
بتاؤں کیا جو میرا عالم فریاد ہوتا ہے

قمر جلالوی

تم نے دیکھا تھا قمر کو بزم میں وقتِ سحر
جس کا منہ اترا ہوا تھا میں وہی ناشاد ہوں
شام کا ہے وقت قبروں کو نہ ٹھکرا کر چلو
جانے کس عالم میں ہے میت کسی ناشاد کی
داستاں اوراقِ گل پر تھی مجھی ناشاد کی
بلبلوں نے عمر بھر میری کہانی یاد کی
قبر ٹھوکر سے مٹا دی عاشقِ ناشاد کی
یہ بھی اک تاریخ تھی ظالم تری بیداد کی
جاؤ بس رہنے بھی دو آئے نہ تم تو کیا ہوا
کیا کوئی میت نہ اٹھی عاشقِ ناشاد کی

تلوک چند محروم

باغباں پر زور چلتا ہے نہ کچھ صیاد پر
سختیاں کرتا ہوں میں اپنے دلِ ناشاد پر
وہ بھی ہیں افسردہ مرگ عاشقِ ناشاد پر
کہنے والا کون ہے اب مرحبا بیداد پر
خوشی کے بعد اک تو ہی نہیں ہے مبتلائے غم
یوں ہی اکثر جہاں میں اے دلِ ناشاد، ہوتا ہے

جوش ملیح آبادی

کچھ نہیں اس کے سوا جوشؔ حریفوں کا کلام
وصل نے شاد کیا ہجر نے ناشاد کیا

حفیظ جالندھری

مجھے شاد رکھنا کہ ناشاد رکھنا
مرے دیدہ و دل کو آباد رکھنا

سیماب اکبر آبادی

عزم فریاد! انہیں اے دلِ ناشاد نہیں
مسلک اہلِ وفا ضبط ہے فریاد نہیں
حاصلِ عشق بجز خاطر ناشاد نہیں
یہ غنیمت ہے کہ محنت مری برباد نہیں
تصور جب انیس خاطر ناشاد ہوتا ہے
جہانِ دل تری تصویر سے آباد ہوتا ہے

شکیل بدایونی

دل وہی دل جسے ناشاد کیے جاتا ہوں
یعنی رہ رہ کے انہیں یاد کیے جاتا ہوں

فانی بدایونی

ستم ایجاد رہو گے ستم ایجاد رہے
اس میں اب شاد رہے یا کوئی ناشاد رہے

کلیم عاجز

بیکسی ہے اور دلِ ناشاد ہے
اب انہیں دونوں سے گھر آباد ہے