امام بخش ناسخ

گزرے ہیں کوچۂِ کاکل سے صبا کے جھونکے
نکہتِ گل کو جو برباد کیا کرتے ہیں

بہادر شاہ ظفر

دم بدم بھرتے ہیں ہم تیری ہوا خواہی کا دم
کر نہ بد خوؤں کے کہنے سے ہمیں برباد تو

داغ دہلوی

دلِ ویراں سے رقیبوں نے مرادیں پائیں
کام کس کس کے مرا خرمن برباد آیا
ہیں تیرے دل میں سب کے ٹھکانے برے بھلے
میں خانماں خراب ہی برباد رہ گیا

مومن خان مومن

کچھ قفس میں ان دنوں لگتا ہے جی
آشیاں اپنا ہوا برباد کیا

فیض احمد فیض

پہلے بھی خزاں میں باغ اجڑے پر یوں نہیں جیسے اب کے برس
سارے بوٹے پتہ پتہ روش روش برباد ہوئے

یگانہ چنگیزی

دشمن و دوست سے آباد ہیں دونوں پہلو
دل سلامت ہے تو گھر عشق کا برباد نہیں

جون ایلیا

دل کتنا آباد ہوا جب دید کے گھر برباد ہوئے
وہ بچھڑا اور دھیان میں اس کے سو موسم ایجاد ہوئے
تو نے کبھی سوچا تو ہو گا سوچا بھی اے مست ادا
تیری ادا کی آبادی پر کتنے گھر برباد ہوئے
شہروں میں ہی خاک اڑا لو شور مچا لو بے جا لو
جن دشتوں کی سوچ رہے ہو وہ کب کے برباد ہوئے
ذرا اس کی پر احوالی تو دیکھیں
جسے برباد فرمایا گیا ہے
عہد اس کوچۂ دل سے ہے سو اس کوچے میں
ہے کوئی اپنی جگہ ہم جسے برباد رکھیں
ایک خوشبو میں رہی مجھ کو تلاش خد و خال
رنگ فصلیں مری یارو ہوئیں برباد اس میں

جگر مراد آبادی

ارباب چمن سے نہیں پوچھو یہ چمن سے
کہتے ہیں کسے نکہتِ برباد کا عالم
بظاہر کچھ نہیں کہتے مگر ارشاد ہوتا ہے
ہم اس کے ہیں جو ہم پر ہر طرح برباد ہوتا ہے
تمہیں ہو طعنہ زن مجھ پر تمہیں انصاف سے کہہ دو
کوئی اپنی خوشی سے خانماں برباد ہوتا ہے
دلِ عاشق بھی کیا مجموعۂ اضداد ہوتا ہے
ادھر آباد ہوتا ہے ادھر برباد ہوتا ہے

قمر جلالوی

پاشکستہ، دل حزیں، شوریدہ سر، برباد ہوں
سر سے لے کر پاؤں تک فریاد ہی فریاد ہوں
فصلِ گل آنے کی کیا خوشیاں نشیمن جب نہ ہو
باغ کا مالک ہوں لیکن خانماں برباد ہوں
کیا مجھی کم بخت کی تربت تھی ٹھوکر کے لیے
تم نے جب دیکھا مجھے مٹی مری برباد کی
کھیل اس کمسنے کا دیکھو نام لے لے کر مرا
ہاتھ سے تربت بنائی پاؤں سے برباد کی
جس جگہ پہنچا وہیں آمد سنی صیاد کی
کیا بری تقدیر ہے مجھے خانماں برباد کی
اپنے رہنے کو مکاں لے لیے تم نے لیکن
یہ نہ سوچا کہ کوئی خانماں برباد بھی ہے

عرفان صدیقی

زندہ ہے ذہن میں گزرے ہوئے لمحوں کی مہک
دشت آباد بہت، نکہتِ برباد سے ہے

احسان دانش

باز آ اے بندۂ حسنِ مجاز
یوں نہ اپنی زندگی برباد کر

اختر شیرانی

یاد آؤ مجھے للہ نہ تم یاد کرو
اپنی اور میری جوانی کو نہ برباد کرو
شرم رونے بھی نہ دے بیکلی سونے بھی نہ دے
اس طرح تو مری راتوں کو نہ برباد کرو
حد ہے پینے کی کہ خود پیرِ مغاں کہتا ہے
اس بری طرح جوانی کو نہ برباد کرو
صدقے اس شوخ کے اخترؔ یہ لکھا ہے جس نے
عشق میں اپنی جوانی کو نہ برباد کرو

علی سردار جعفری

آخر روئیں کس کو کس کو
کون ہے جو برباد نہیں ہے
دعوت رنگ و نکہت ہے یہ
خندۂ گل برباد نہیں ہے

تلوک چند محروم

ان کا رو دینا مزار کشتۂ بیداد پر
ابرِ نیساں کی ہے بارش گلشن برباد پر
بعد مردن روح تیرے خانماں برباد کی
ہو گی آوارہ فضائے نکہتِ برباد پر
خزاں سے پیشتر سارا چمن برباد ہوتا ہے
غضب ہوتا ہے جب خود باغباں صیاد ہوتا ہے

جوش ملیح آبادی

وہ کریں بھی تو کن الفاظ میں تیرا شکوہ
جن کو تیری نگہ لطف نے برباد کیا
اس کا رونا نہیں کیوں تم نے کیا دل برباد
اس کا غم ہے کہ بہت دیر میں برباد کیا
مجھ کو تو ہوش نہیں تم کو خبر ہو شاید
لوگ کہتے ہیں کہ تم نے مجھے برباد کیا

حسرت موہانی

اک جہاں مست محبت ہے کہ ہر سو بوئے انس
چھائی ہے ان گیسوؤں کی نکہتِ برباد سے

حفیظ جالندھری

پھر خاک اڑاتے ہوئے پھرتے ہیں بگولے
پھر دشت میں مٹی ہوئی برباد کسی کی
ہجوم آرزو سے شہرِ دل آباد کرتے ہیں
ہم اپنی خاک اپنے ہاتھ سے برباد کرتے ہیں
ہمیں تو کار پردازان قدرت کھیل سمجھے ہیں
کبھی آباد کرتے ہیں کبھی برباد کرتے ہیں
بہہ چلا ہے اشکِ حسرت المدد اے برق یاس
یہ بھی اک دانہ ہے میرے خرمن برباد کا
کس دل سے آباد کیا تھا
کس دل سے برباد کرو گے
میرے دل میں بسنے والو
تم مجھ کو برباد کرو گے
تو نہیں کہتا مگر دیکھ او وفا نا آشنا
اپنی ہستی کس قدر برباد کر لیتا ہوں میں

سیماب اکبر آبادی

حاصلِ عشق بجز خاطر ناشاد نہیں
یہ غنیمت ہے کہ محنت مری برباد نہیں
اب اے بے درد کیا اس کے لیے ارشاد ہوتا ہے
پھر اپنی خاک سے پیدا دلِ برباد ہوتا ہے

شکیل بدایونی

دل کو وقف غم بیداد کیے جاتا ہوں
اپنا گھر آپ ہی برباد کیے جاتا ہوں

فانی بدایونی

آتی ہے صبا سوئے لحد ان کی گلی سے
شاید مری مٹی ابھی برباد نہیں ہے
اللہ یہ بجلیاں نہ کام آئیں گی
آندھی ہی سے کیوں ہو آشیانہ برباد
ظلم ہے تجھ سے بہ تقریب تکلف منسوب
ورنہ تقدیر وفا یہ ہے کہ برباد رہے
دل آباد کا فانیؔ کوئی مفہوم نہیں
ہاں مگر جس میں کوئی حسرت برباد رہے

قتیل شفائی

سامنے آئیں گے اپنی ہی وفا کے پہلو
جب کسی اور کو برباد کرے گی دنیا