یگانہ چنگیزی

خوشی میں اپنے قدم چوم لوں تو زیبا ہے
وہ لغزشوں پہ مری مسکرائے ہیں کیا کیا

باقی صدیقی

بولے منہ سے نہ مسکرائے
آئے مرے غمگسار آئے
ملاقات کی کونسی ہے یہ صورت
نہ ہم مسکرائے ، نہ تم مسکرائے

جگر مراد آبادی

یہ نازِ حسن تو دیکھو کہ دل کو تڑپا کر
نظر ملاتے نہیں مسکرائے جاتے ہیں

عرفان صدیقی

چراغِ خانۂ افسردگاں جلائے بھی
اگر وہ سنگ نہیں ہے تو مسکرائے بھی

احسان دانش

خودی عشق نے جس دن سے کھول دیں آنکھیں
ہے آنسوؤں کا تقاضا کہ مسکرائے جا
تھی ابتدا میں یہ تادیب مفلسی مجھ کو
غلام رہ کے غلامی پہ مسکرائے جا

حفیظ جالندھری

نہیں عتاب زمانہ خطاب کے قابل
ترا جواب یہی ہے کہ مسکرائے جا

سیماب اکبر آبادی

ہیں دل کے داغ بھی کیا دل کے داغ اے سیمابؔ
ٹپک رہے ہیں مگر مسکرائے جاتے ہیں

فانی بدایونی

مزاجِ دہر میں ان کا اشارہ پائے جا
جو ہو سکے تو بہرحال مسکرائے جا

اختر ہوشیارپوری

گئے زمانے کی صورت بدن چرائے وہ
نئی رتوں کی طرح سے بھی مسکرائے وہ

فراق گورکھپوری

وہ اک ذرا سی جھلک برق کم نگاہی کی
جگر کے زخمِ نہاں مسکرائے ہیں کیا کیا

کیفی اعظمی

آج سوچا تو آنسو بھر آئے
مدتیں ہو گئیں مسکرائے
جب اس نے ہار کے خنجر زمیں پہ پھینک دیا
تمام زخمِ جگر مسکرائے ہیں کیا کیا