یگانہ چنگیزی

کبھی نہ پرورش نخل آرزو کرتے
نمو سے پہلے جو اندیشۂ نمو کرتے

جون ایلیا

باغ جاں سے ملا نہ کوئی ثمر
جونؔ ہم تو نمو نمو ٹھہرے
معاش بے دلاں پوچھو نہ یارو
نمو پاتے رہے رزق نمو بن

عرفان صدیقی

خاک سے لہر سی اٹھتی ہے لہو کی صورت
اب کے شاید ہو یہی میرے نمو کی صورت
وہ ابر پھر کبھی آیا ادھر تو کیا حاصل
میں سبزہ ہوں مری تابِ نمو ہے کتنی دیر

ادا جعفری

زرد پتوں کو لے گئی ہے ہوا
شاخ میں شدت نمو ہے ابھی

شاد عظیم آبادی

تجھی سے منہ پھلا لیتے عجب کیا
صبا غنچوں کا بھی آخر نمو تھا
چلے ہم باغ سے اے شادؔ کس وقت
بہار آنے کو تھی گل کا نمو تھا

اکبر حمیدی

خزاں سے ہار نہ جانا کسی بھی حالت میں
نمو ملے نہ ملے خواہش نمو رکھنا

محسن احسان

ملا بھی کیا اسے توہین رنگ و بو کر کے
گیا چمن سے چمن کو جو بے نمو کر کے

محسن نقوی

کوئی تو حبس ہوا سے یہ پوچھتا محسنؔ
ملا ہے کیا اسے کلیوں کو بے نمو کر کے

ناصر کاظمی

یہ گناہگاروں کی سر زمیں ہے بہشت سے بھی سوا حسیں
مگر اس دیار کی خاک میں سببِ نمو کوئی اور ہے