کون لمحوں کے روبرو ٹھہرے
جون ایلیا
میں نہ ٹھہروں نہ جان تو ٹھہرے
کون لمحوں کے روبرو ٹھہرے
نہ گزرنے پہ زندگی گزری
نہ ٹھہرنے پہ چار سو ٹھہرے
ہے مری بزمِ بے دلی بھی عجیب
دل پہ رکھوں جہاں سبو ٹھہرے
میں یہاں مدتوں میں آیا ہوں
ایک ہنگامہ کو بہ کو ٹھہرے
محفل رخصت ہمیشہ ہے
آؤ اک حشر ہا و ہو ٹھہرے
اک توجہ عجب ہے سمتوں میں
کہ نہ بولوں تو گفتگو ٹھہرے
کج ادا تھی بہت امید مگر
ہم بھی جونؔ ایک حیلہ جو ٹھہرے
ایک چاک برہنگی ہے وجود
پیرہن ہو تو بے رفو ٹھہرے
میں جو ہوں کیا نہیں ہوں میں خود بھی
خود سے بات آج دو بدو ٹھہرے
باغ جاں سے ملا نہ کوئی ثمر
جونؔ ہم تو نمو نمو ٹھہرے
فاعِلاتن مفاعِلن فِعْلن
خفیف مسدس مخبون محذوف مقطوع