حیدر علی آتش

اس شش جہت میں خوب تری جستجو کریں
کعبے میں چل کے سجدہ تجھے چار سو کریں
موجود گو کہ تو ہے مگر چاہتا ہے شوق
آوارہ ہوں تلاش تری چار سو کریں

داغ دہلوی

خلوت میں تجھ کو چین نہیں کس کا خوف ہے
اندیشہ کچھ نہ ہو جو نظر چار سو نہ ہو

مصحفی غلام ہمدانی

شبِ ہجراں میں جو دل دم بہ دم فریاد کرتا ہے
خفا ہو کر کہوں میں کوئی ساعت تو تو سو کافر

مصطفٰیٰ خان شیفتہ

کیا جوشِ انتظار میں ہر سمت دوڑ ہے
بدنامیوں سے ہائے گزر ایک سو نہیں

مرزا رفیع سودا

تجھ حسن نے دیا نہ کبھو مفسدی کو چین
فتنہ نہ تیرے دور میں پھر نیند سو سکا

یگانہ چنگیزی

ازل سے جو کشش مرکزی کے تھے پابند
ہوا کی طرح وہ کیا سیر چار سو کرتے

باقی صدیقی

اسی غفلت نے باقیؔ مار ڈالا
کہ جب تقدیر جاگی سو گئے ہم

جون ایلیا

نہ گزرنے پہ زندگی گزری
نہ ٹھہرنے پہ چار سو ٹھہرے

عبدالحمید عدم

زندگی کا راستہ کاٹنا تو تھا عدمؔ
جاگ اٹھ تو چل دیے تھک گئے تو سو لیے

قمر جلالوی

حفاظتِ گل و غنچہ نہ چار سو کرتے
اگر یہ خار نہ احساسِ رنگ و بو کرتے

شکیب جلالی

ایک ہمیں ہی اے سحر‘ نیند نہ آئی رات بھر
زانوئے شب پہ رکھ کر سر‘ سارے چراغ سو گئے

عرفان صدیقی

میں اپنی کھوئی ہوئی لوح کی تلاش میں ہوں
کوئی طلسم مجھے چار سو پکارتا ہے

مجید امجد

میلی چادر تان کر اس چوکھٹ کے دوار
صدیوں کے کہرام میں سو گئے کیا کیا لوگ

جمال احسانی

کسی بیاباں میں دھوپ رستہ بھٹک گئی تھی
کسی بھلاوے میں آ کے سب پیڑ سو رہے تھے

ادا جعفری

بولتے ہیں دلوں کے سناٹے
شور سا یہ جو چار سو ہے ابھی
تمام عمر کی مسافتوں کے بعد ہی کھلا
کبھی کبھی وہ پاس تھا جو چار سو ملا نہیں

بشیر بدر

اگر سفر میں ہمارا بھی ہم سفر ہوتا
بڑی خوشی سے انہی پتھروں پہ سو لیتے
یہ کیا کہ روز وہی چاندنی کا بستر ہو
کبھی تو دھوپ کی چادر بچھا کے سو لیتے
روتے کیوں ہو دل والوں کی قسمت ایسی ہوتی ہے
ساری رات یوں ہی جاگو گے دن نکلے تو سو لینا

زہرا نگاہ

گھر کے سارے پھول ہنگاموں کی رونق ہو گئے
خالی گلدانوں سے باتیں کر کے سو جائیں گے ہم

جلیل مانک پوری

اجل بولی یہ تربت میں لٹا کر
بہت جاگا ہے اب جی بھر کے سو لے

شاد عظیم آبادی

تھا اجل کا میں اجل کا ہو گیا
بیچ میں چونکا تو تھا پھر سو گیا

شان الحق حقی

خود سے بچ کر جاؤں کہاں
ہوں گویا ہر سو بھی میں
اک تمنا کہ سحر سے کہیں کھو جاتی ہے
شب کو آ کر مرے آغوش میں سو جاتی ہے

احمد فراز

پلٹ کر چارہ گر کیوں آ گئے ہیں
شبِ فرقت کے مارے سو گئے کیا
آنکھ مجبور تماشا ہے فرازؔ
ایک صورت ہے کہ ہر سو چمکے

اقبال ساجد

یاد کے شعلوں پہ جلتا ہے اگر میرا بدن
اوڑھ کر پھولوں کی چادر تو بھی سو سکتا نہیں

امیر مینائی

ہم لوٹتے ہیں، وہ سو رہے ہیں
کیا ناز و نیاز ہو رہے ہیں
پیری میں بھی ہم ہزار افسوس
بچپن کی نیند سو رہے ہیں
آپ سنیے تو کہانی دل کی
نیند آ جائے گی سو جائیے گا

شاذ تمکنت

دن کے پہلو سے لگا رہتا ہے اندیشۂ شام
صبح کے خوف سے نیند آئے تو سو بھی نہ سکوں

قیوم نظر

شہر میں رنگ ہے نہ خوشبو ہے
پھر بھی چرچا اسی کا ہر سو ہے

محسن نقوی

میں کل تنہا تھا خلقت سو رہی تھی
مجھے خود سے بھی وحشت ہو رہی تھی
لبوں پر تھا سکوتِ مرگ لیکن
مرے دل میں قیامت سو رہی تھی

ناصر کاظمی

زلفوں کے دھیان میں لگی آنکھ
پرکیف ہوا میں سو گئے ہم
میں کیوں پھرتا ہوں تنہا مارا مارا
یہ بستی چین سے کیوں سو رہی ہے
ہمارے گھر کی دیواروں پہ ناصر
اداسی بال کھولے سو رہی ہے