مرزا غالب

جس زخم کی ہو سکتی ہو تدبیر رفو کی
لکھ دیجیو یا رب اسے قسمت میں عدو کی
چپک رہا ہے بدن پر لہو سے پیراہن
ہمارے جیب کو اب حاجتِ رفو کیا ہے

حیدر علی آتش

عاشق ہوں میں نفرت ہے مرے رنگ کو رو سے
پیوند نہیں چاکِ گریباں کو رفو سے
دیوانگی کا سلسلہ جاوے نہ ہاتھ سے
دامن کو پھاڑیے جو گریباں رفو کریں
ہمیشہ میں نے گریباں کو چاک چاک کیا
تمام عمر رفوگر رہے رفو کرتے

شیخ ابراہیم ذوق

دل کا یہ حال ہے پھٹ جائے ہے سو جائے سے اور
اگر اک جائے سے ہم اس کو رفو کرتے ہیں
سمجھ یہ دار و رسن تار و سوزن اے منصور
کہ چاک پردہ حقیقت کا ہیں رفو کرتے
ٹان کے کیا جیب کے پھر بعد رفو ٹوٹ گئے
ہو کے ناخن کبھی سینے میں فرو ٹوٹ گئے

مصحفی غلام ہمدانی

چرخ ہزار رخنہ کا پیوند کیوں کہ ہو
یہ شال وہ نہیں ہے کہ جس کو رفو کریں
کھلوا دو ان کی فصد کہ دیوانے ہیں وہ شخص
جو فصلِ گل میں میرا گریباں رفو کریں
سینہ ہے پرزے پرزے جائے رفو نہیں یاں
ٹان کے لگاویں کس کو دل کی تو بو نہیں یاں
مصحفیؔ ہم تو یہ سمجھے تھے کہ ہو گا کوئی زخم
تیرے دل میں تو بہت کام رفو کا نکلا

مصطفٰی خان شیفتہ

دستِ جنوں نے جامہ ہستی قبا کیا
اب ہائے چارہ گر کو خیالِ رفو نہیں
کب ہاتھ کو خیالِ جزائے رفو نہیں
کب پارہ پارہ پیرہنِ چارہ جو نہیں

فیض احمد فیض

ہمدم حدیث کوئے ملامت سنائیو
دل کو لہو کریں کہ گریباں رفو کریں
نہ کسی پہ زخم عیاں کوئی، نہ کسی کو فکرِ رفو کی ہے
نہ کرم ہے ہم پہ حبیب کا، نہ نگا ہ ہم پہ عدو کی ہے

مرزا رفیع سودا

ناصح کو جیب سینے سے فرصت کبھو نہ ہو
دلِ یار سے پھٹے تو کسی سے رفو نہ ہو

جون ایلیا

ایک چاک برہنگی ہے وجود
پیرہن ہو تو بے رفو ٹھہرے
یہ سب معجز نمائی کی ہوس ہے
رفوگر آئے ہیں تار رفو بن

قمر جلالوی

گریباں کو تو سی دے گا رفو گر تار داماں سے
مگر چاکِ دلِ مجروح پھر کیونکر رفو ہو گا
بہارِ گل میں نکلے خوب ارماں دشتِ وحشت کے
رفو گر نے کیا دامن کی کلیوں پر رفو برسوں
بہار دیکھ کے کیا کیا ہنسے ہیں دیوانے
کہ پھول چاکِ گریباں نہیں، رفو کرتے
جنوں میں جب ہوش آیا تو ہوش ہی نہ رہا
کہ اپنے چاکِ گریباں کو ہم رفو کرتے

عرفان صدیقی

زندگی، تیری کرامت ہے کہ ہر زخم کے بعد
کوئی حیلہ نکل آتا ہے رفو کی صورت
بدن دریدہ شجر‘ مہربان سوزنِ برگ
مگر یہ زحمت دستِ رفو ہے کتنی دیر
دریدہ پیرہنِ جاں ہے دیکھیے کیا ہو
نفس کے تار سے کرتے تو ہیں رفوِ ہم لوگ

مصطفی زیدی

وہ زخم جس کو کیا نوک آفتاب سے چاک
اسی کو سوزن مہتاب سے رفو کرتے

رئیس فروغؔ

رفوگر چاند نکلا ہے نہ تارے ہیں نہ جگنو ہیں
رفوگر اپنے ہاتھوں کے اجالے میں رفو کرنا

عالم تاب تشنہ

جو رہ گیا نگہ سوزن مشیت سے
قبائے زیست کا وہ چاک بے رفو میں تھا