مرزا غالب

دستِ قدرت ہے مرا خشت بہ دیوارِ فنا
گر فنا بھی نہ میں ہوتا تو فنا ہو جاتا
ہر ایک بات پہ کہتے ہو تم کہ تو کیا ہے
تمہیں کہو کہ یہ اندازِ گفتگو کیا ہے
ہوں سراپا ساز آہنگ شکایت کچھ نہ پوچھ
ہے یہی بہتر کہ لوگوں میں نہ چھیڑے تو مجھے

امام بخش ناسخ

کون سا تن ہے کہ مثل روح اس میں تو نہیں
کون گل ہے جو ترا مسکن برنگ بو نہیں
رات دن ناقوس کہتے ہیں بآواز بلند
دیر سے بہتر ہے کعبہ گر بتوں میں تو نہیں

انشاء اللہ خان انشا

اکڑتا ہے کیا دیکھ دیکھ آئنہ
حسیں گرچہ ہے تو پہ اتنا گھمنڈ

داغ دہلوی

ممکن نہیں کہ تیری محبت کی بو نہ ہو
کافر اگر ہزار برس دل میں تو نہ ہو
زاہد مزا تو جب ہے عذاب و ثواب کا
دوزخ میں بادہ کش نہ ہوں جنت میں تو نہ ہو
رنج کی جب گفتگو ہونے لگی
آپ سے تم تم سے تو ہونے لگی

شیخ ابراہیم ذوق

کہیں تجھ کو نہ پایا گرچہ ہم نے اک جہاں ڈھونڈا
پھر آخر دل ہی میں دیکھا بغل ہی میں سے تو نکلا
قفل صد خانۂ دل آیا جو تو ٹوٹ گئے
جو طلسمات نہ ٹوٹے تھے کبھو ٹوٹ گئے
کہہ بہ تبدیل قوافی غزل اک اور بھی ذوقؔ
دیکھیں بٹھلائے ہے کس طرح سے تو ٹوٹ گئے
بعد رنجش کے گلے ملتے ہوئے رکتا ہے جی
اب مناسب ہے یہی کچھ میں بڑھوں کچھ تو بڑھے

مصحفی غلام ہمدانی

ساقی ہے سرو و گل ہے مطرب ہے اور ترانہ
افسوس اک یہی ہے ایسے میں تو نہیں یاں
آئے تھے ہم چمن میں سن کر تری خبر کو
پھر کیا کریں گے رہ کر ظالم جو تو نہیں یاں

مصطفٰی خان شیفتہ

شکرِ ستم بھی راس نہ آیا ہمیں کہ اب
کہتے ہیں وہ کہ لائقِ الطاف تو نہیں
کچھ اور بے دلی کے سوا آرزو نہیں
اے دل یقین جان کہ ہم ہیں تو تو نہیں
ابرِ سرشک و گلشنِ داغ و نسیمِ آہ
سامانِ عیش سب ہے پر افسوس تو نہیں

مرزا رفیع سودا

اس دل کو دے کے لوں دو جہاں یہ کبھو نہ ہو
سودا تو ہووے تب یہ کہ جب اس میں تو نہ ہو

باقی صدیقی

زیست پر میں ہوں گراں یا تو ہے
تشنۂ شوق ہر اک پہلو ہے

جون ایلیا

خوب ہے شوق کا یہ پہلو بھی
میں بھی برباد ہو گیا تو بھی
یاسمیں اس کی خاص محرمِ راز
یاد آیا کرے گی اب تو بھی
یاد سے اس کی ہے مرا پرہیز
اے صبا اب نہ آئیو تو بھی
میں نہ ٹھہروں نہ جان تو ٹھہرے
کون لمحوں کے روبرو ٹھہرے

جگر مراد آبادی

شرما گئے لجا گئے دامن چھڑا گئے
اے عشق مرحبا وہ یہاں تک تو آ گئے

خواجہ میر درد

غنیمت ہے یہ دید و دید یاراں
جہاں آنکھ مند گئی نہ میں ہوں نہ تو ہے

قمر جلالوی

بڑھے اور پھر بڑھے ، ضد دیکھ لینا حشر میں قاتل
خدا کے سامنے خاموش ہم ہوں گے نہ تو ہو گا
قمر سے انتظامِ روشنی کو پوچھنے والے
چراغوں کی ضرورت کیا ہے جب محفل میں تو ہو گا
وہ آئیں فاتحہ پڑھنے اب اعتبار تو نہیں
کہ رات ہو گئی دیکھا ہوا مزار نہیں
اگر وہ صبح کو آئے تو کس سے گفتگو ہو گی
کہ اے شمعِ فرقت نہ ہم ہونگے نہ تو ہو گی
نہ طے کرتا تو رہتا قصۂ تیغوں گلوں برسوں
خدا رکھے تجھے قاتل رہے دنیا میں تو برسوں

شکیب جلالی

داغِ شکست دوستو‘ دیکھو کسے نصیب ہو
بیٹھے ہوئے ہیں تیز رو‘ سست خرام تو گئے

عرفان صدیقی

آج اس لذتِ یکجائی سے ہولیں سیراب
کل پھر ایجاد کریں گے من و تو کی صورت
مرے زوال کے ساتھی‘ مرے ستارۂ ہجر
افق کے آخری منظر میں تو ہے کتنی دیر
کیا جھلکتاہے یہ جاناں تری خاموشی میں
حرفِ اقرار تو کہتا بھی نہیں تو ہم سے
کہ جیسے میں سرِ دریا گھرا ہوں نیزوں میں
کہ جیسے خیمۂ صحرا سے تو پکارتا ہے

مجید امجد

میرے نصیبِ شوق میں لکھا تھا یہ مقام
ہر سو ترے خیال کی دنیا ہے ، تو نہیں
اتنے کام ہیں، ان مواج صفوں میں خوش خوش پھرتا ہوں
لیکن آج اگر کچھ اپنے بارے میں بھی سوچا تو

مصطفی زیدی

ہاں نمازوں کا اثر دیکھ لیا پچھلی رات
میں ادھر گھر سے گیا تھا کہ ادھر تو آئی

اختر شیرانی

یوں تو کس پھول سے رنگت نہ گئی بو نہ گئی
اے محبت مرے پہلو سے مگر تو نہ گئی

ادا جعفری

دل کے گنجان راستوں پہ کہیں
تیری آواز اور تو ہے ابھی
ابھی تلک جو خواب تھے چراغ تھے گلاب تھے
وہ رہ گزر کوئی نہ تھی کہ جس پہ تو ملا نہیں

اکبر معصوم

سن! ہجر اور وصال کا جادو کہاں گیا
میں تو کہیں نہیں تھا مگر تو کہاں گیا

بشیر بدر

میں نے دن رات خدا سے یہ دعا مانگی تھی
کوئی آہٹ نہ ہو در پر مرے جب تو آئے

بیخود بدایونی

ان حسینوں ہی کو زیبا ہے تلون اے دل
ہاں خبردار جو بھولے سے کبھی تو بدلا

ضیا جالندھری

رنگ باتیں کریں اور باتوں سے خوشبو آئے
درد پھولوں کی طرح مہکے اگر تو آئے

عالم تاب تشنہ

تمام عمر کی دیوانگی کے بعد کھلا
میں تیری ذات میں پنہاں تھا اور تو میں تھا

فارغ بخاری

وہ روز و شب بھی نہیں ہیں وہ رنگ و بو بھی نہیں
وہ بزمِ جام و سبو بھی نہیں وہ تو بھی نہیں

تلوک چند محروم

یہ فخر کم ہے کہ ہم قابلِ خطاب تو ہیں
عزیز اور کے القاب سے ہے تو تیری

جلیل مانک پوری

سو بہاریں جہاں میں آئی گئیں
مایۂ صد بہار تو ہے وہی
مان لیتا ہوں تیرے وعدے کو
بھول جاتا ہوں میں کہ تو ہے وہی
صبر آ جائے اس کی کیا امید
میں وہی، دل وہی ہے ، تو ہے وہی
تجھے ہے اختیار آنا نہ آنا
دلِ مضطر کا کہنا مان تو لے

خاطر غزنوی

آرزوئیں نارسائی روبرو میں اور تو
کیا عجب قربت تھی وہ بھی میں نہ تو میں اور تو

شاد عظیم آبادی

مل گئے خاک میں در پر ترے اتنا بیٹھے
اس ریاضت پہ بھی اب تک نہ ہوا تو اپنا
غم میں پروانۂ مرحوم کے تھمتے نہیں اشک
شمع اے شمع ذرا دیکھ تو منہ تو اپنا
فقط شور دل پر آرزو تھا
نہ اپنے جسم میں ہم تھے نہ تو تھا
ہر اک کے پاؤں پر جھکتے کٹی عمر
نہ سمجھے ہم کہ کس قالب میں تو تھا
میں کیفیت کہوں کیا بزمِ مے کی
کہ مینا ہاتھ میں آنکھوں میں تو تھا
بہت ڈھونڈا کہیں پایا نہ ہم نے
بتا دے یہ کہ کس گوشے میں تو تھا
عدو تھے ساقیا سب مے کدے میں
یہی اک آس تھی پلے پہ تو تھا
سزا لغزش کی پاتے بزم میں ہم
خدا کو خیر کرنا تھا کہ تو تھا
کس پہ قابو جو تجھی پہ نہیں قابو اپنا
کس سے امید ہمیں جب نہ ہوا تو اپنا

شان الحق حقی

رو بھی عکس رو بھی میں
میں بھی میں ہوں تو بھی میں

احمد فراز

اب تو ہمیں بھی ترکِ مراسم کا دکھ نہیں
پر دل یہ چاہتا ہے کہ آغاز تو کرے
اک بوند تھی لہو کی سرِ دار تو گری
یہ بھی بہت ہے خوف کی دیوار تو گری
کچھ مغبچوں کی جرأتِ رندانہ کے نثار
اب کے خطیب شہر کی دستار تو گری
کبھی تو سنگ سے پھوٹے گی آبجو غم کی
کبھی تو ٹوٹ کے روئے گا تو ہماری طرح
سخت تاریک ہے دل کی دنیا
ایسے عالم میں اگر تو چمکے
پھر کیا عجب کہ لوگ بنا لیں کہانیاں
کچھ میں نشے میں چور تھا کچھ تو پیے ہوئے

اقبال ساجد

وہ تیرا دوست جو پھولوں کو پتھرانے کا عادی تھا
کچھ اس سے شعبدہ بازی میں کم تو بھی نہیں نکلا
بتا اس دور میں اقبال ساجدؔ کون نکلے گا
صداقت کا علم لے کر اگر تو بھی نہیں نکلا

ناصر کاظمی

میٹھی بولی میں پپیہے بولے
گنگناتا ہوا جب تو نکلا
مسلسل بے کلی دل کو رہی ہے
مگر جینے کی صورت تو رہی ہے
کوئی اور ہے نہیں تو نہیں مرے روبرو کوئی اور ہے
بڑی دیر میں تجھے دیکھ کر یہ لگا کہ تو کوئی اور ہے