مرزا غالب

پیوں شراب اگر خم بھی دیکھ لوں دو چار
یہ شیشہ و قدح و کوزہ و سبو کیا ہے

حیدر علی آتش

مستی میں مجھ سے بے ادبی ہو گی یار سے
مجھ کو گناہگار نہ جام و سبو کریں
لٹاتے دولتِ دنیا کو میکدے میں ہم
طلائی ساغرِ مے نقرئی سبو کرتے

داغ دہلوی

یہ ٹوٹ کر کبھی نہ بنے گا کسی طرح
زاہد شکست توبہ شکست سبو نہ ہو

شیخ ابراہیم ذوق

مئے عشرت طلب کرتے تھے ناحق آسماں سے ہم
وہ تھا لبریز غم اس خمکدہ سے جو سبو نکلا
یقیں ہے صبح قیامت کو بھی صبوحی کش
اٹھیں گے خواب سے ساقی سبو سبو کرتے
دلِ شکستہ ہی رہا بعد فنا بھی میں تو
کہ مری خاک سے بنتے ہی سبو ٹوٹ گئے

مصحفی غلام ہمدانی

تھا میں شراب دوست بہت، میری خاک کے
کاسے بنانے چاہئیں کچھ، کچھ سبو کریں
اہلِ سخن کا یارب کیوں محتسب ہے دشمن
کلک و دوات ہے کچھ جام و سبو نہیں یاں
شیشہ جو پھوٹ جائے تو پھوٹے ولے نہ ہو
یارب جدا سبو سے قدح اور قدح سے ہم

فیض احمد فیض

یار آشنا نہیں کوئی، ٹکرائیں کس سے جام
کس دل ربا کے نام پہ خالی سبو کریں
صفِ زاہداں ہے تو بے یقیں، صفِ میکشاں ہے تو بے طلب
نہ وہ صبح درود و وضو کی ہے ، نہ وہ شام جام و سبو کی ہے

جون ایلیا

ہے مری بزمِ بے دلی بھی عجیب
دل پہ رکھوں جہاں سبو ٹھہرے
اول شب کا مہتاب بھی جا چکا صحن مے خانہ سے اب افق میں کہیں
آخرِ شب ہے خالی ہیں جام و سبو تم کہاں جاؤ گے ہم کہاں جائیں گے

خواجہ میر درد

ہے اپنی یہ صلاح کہ سب زاہدان شہر
اے دردؔ آ کے بیعتِ دست سبو کریں

قمر جلالوی

قمر سنتے ہیں تو شیخ صاحب آج توڑیں گے
سجے گا میکدہ آرائش جام و سبو ہو گی
لحد میں جا کے بھی ہم مے کی جستجو کرتے
فرشتے پوچھتے کچھ، ہم سبو سبو کرتے

اختر شیرانی

گراں تھا ساقی دوراں پہ ایک ساغر بھی
تو کس امید پہ ہم خواہش سبو کرتے

عالم تاب تشنہ

ختن ختن تھی شلنگ غزال میرے لیے
بدن بدن مرا نشہ سبو سبو میں تھا

علی سردار جعفری

شکست شوق کو تکمیلِ آرزو کہیے
جو تشنگی ہو تو پیمانہ و سبو کہیے

تلوک چند محروم

کسی کی ایک نظر نے بتا دیا مجھ کو
سرور بادۂ بے ساغر و سبو کیا ہے

جلیل مانک پوری

ہو گئی ہے بہار میں کچھ اور
ورنہ ساغر وہی سبو ہے وہی
مے کدہ کا جلیلؔ رنگ نہ پوچھ
رقصِ جام و خم و سبو ہے وہی

شاد عظیم آبادی

غضب میں آ کے تجھ کو توڑتا شیخ
نتیجہ بحث کا کیا اے سبو تھا
نظر میں ہیچ تھا کونین ساقی
لبالبِ جام تھا ہم تھے سبو تھا

احمد فراز

جی نہیں چاہتا مے خانے کو جائیں جب سے
شیخ بھی بزم نشیں اہلِ سبو کا نکلا

محسن احسان

ہمیں پسند نہیں ظرف مے میں قطرۂ مے
ہمارے سامنے خالی خم و سبو کیے جائیں

ناصر کاظمی

کوئی اور شے ہے وہ بے خبر جو شراب سے بھی ہے تیز تر
مرا میکدہ کہیں اور ہے مرا ہم سبو کوئی اور ہے