مرزا غالب

ہمارے ذہن میں اس فکر کا ہے نام وصال
کہ گر نہ ہو تو کہاں جائیں؟ ہو تو کیوں کر ہو
مجھے جنوں نہیں غالب ولے بہ قولِ حضور
’فراقِ یار میں تسکین ہو تو کیوں کر ہو‘
اپنا نہیں وہ شیوہ کہ آرام سے بیٹھیں
اس در پہ نہیں بار تو کعبے ہی کو ہو آئے

حیدر علی آتش

تاثیر دار لوگ ہیں اللہ کے فقیر
سنگ صنم ہوں آبِ جو ہم ذکرِ ہو کریں

مصحفی غلام ہمدانی

حیران ہوں کہ کیجے کس سے سراغ عشرت
ماتم کدہ ہے عالم جز ہائے و ہو نہیں یاں
ہوں بسکہ ہوا دار تری آتشِ غم کا
پھنک جائے جو سینہ تو کبھو ہو نہ کروں میں
مسلماں دیکھ کر اس بت کی صورت کو یہ کہتا ہے
مسلمانی کہاں کی؟ باندھ لے زنار، ہو کافر

فیض احمد فیض

پھر حریف بہار ہو بیٹھے
جانے کس کس کو آج رو بیٹھے
ساری دنیا سے دور ہو جائے
جو ذرا تیرے پاس ہو بیٹھے
کسی طرح تو جمے بزم میکدے والو
نہیں جو بادہ و ساغر تو ہاؤ ہو ہی سہی

مرزا رفیع سودا

کس منہ سے پھر تو آپ کو کہتا ہے عشق باز
اے رو سیاہ تجھ سے تو یہ بھی نہ ہو سکا
دیا اسے دل و دیں اب یہ جان ہے سوداؔ
پھر آگے دیکھیے جو ہو سو ہو ہوا سو ہوا

باقی صدیقی

ہجوم رنج و غم میں کھو گئے ہم
زمانے کے مقابل ہو گئے ہم
چلو اپنوں نے بھی نظریں بدل لیں
وطن میں بھی مسافر ہو گئے ہم

جون ایلیا

محفل رخصت ہمیشہ ہے
آؤ اک حشر ہا و ہو ٹھہرے
دشت میں رقص شوق بہار اب کہاں باد پیمائی دیوانہ وار اب کہاں
بس گزرنے کو ہے موسم ہاؤ ہو تم کہاں جاؤ گے ہم کہاں جائیں گے
کوئی اس شہر کو تاراج کر دے
ہوئی ہے میری وحشت ہا و ہو بن

خواجہ میر درد

مٹ جائیں ایک آن میں کثرت نمائیاں
ہم آئنے کے سامنے جب آ کے ہو کریں

شکیب جلالی

پردہِ شب کی اوٹ میں زہرہ جمال کھو گئے
دل کا کنول بجھا تو شہر‘ تیرہ و تار ہو گئے
اہلِ جنوں کے دل شکیبؔ‘ نرم تھے موم کی طرح
تیشہِ یاس جب چلا‘ تودہِ سنگ ہو گئے

عرفان صدیقی

اب بھی سنیے تو اک آسیبِ صدا باقی ہے
شہر ویران نہیں وادی ہو کی صورت
صدائے شام سر آب جو ہے کتنی دیر
یہ بازگشت بھی اے دشتِ ہو ہے کتنی دیر

مجید امجد

روح کے دربستہ سناٹوں کو لے کر اپنے ساتھ
ہمہماتی محفلوں کی ہا و ہو میں گھومیے
یہ انجانا شہر، پرائے لوگ، اے دل! تم یہاں کہاں
آج اس بھیڑ میں اتنے دنوں کے بعد ملے ہو، کیسے ہو
میٹھے میٹھے بول میں دوہے کا ہنڈول
سن سن اس کو بانورے ہو گئے کیا کیا لوگ

جمال احسانی

جمالؔ اس وقت کوئی مجھ سے بچھڑ رہا تھا
زمین اور آسماں جب ایک ہو رہے تھے

اختر شیرانی

ایاغ بادہ میں آ کر وہ خود چھلک پڑتا
گر اس کے مست ذرا اور ہاؤ ہو کرتے

بشیر بدر

تمہاری راہ میں شاخوں پہ پھول سوکھ گئے
کبھی ہوا کی طرح اس طرف بھی ہو لیتے
اس کے بعد بہت تنہا ہو جیسے جنگل کا رستہ
جو بھی تم سے پیار سے بولے ساتھ اسی کے ہو لینا

بیخود بدایونی

ہم سمجھتے ہیں حضرت بیخودؔ
چوٹ کھا آئے ہو کہیں نہ کہیں

عالم تاب تشنہ

تھا آئنے میں شکست غرور یکتائی
کہ اپنے عکس کے پردے میں ہو بہ ہو میں تھا

تلوک چند محروم

رہی فراق میں بھی شکل روبرو تیری
شبیہ کھینچی تصور نے ہو بہ ہو تیری

جلیل مانک پوری

وہ جاتے ہیں اکیلے میرے گھر سے
نکل کر جان تو ہی ساتھ ہو لے

شاد عظیم آبادی

تھا اجل کا میں اجل کا ہو گیا
بیچ میں چونکا تو تھا پھر سو گیا
لطف تو یہ ہے کہ آپ اپنا نہیں
جو ہوا تیرا وہ تیرا ہو گیا

شان الحق حقی

قائل خود بھی ہوں حقیؔ
شاغل الا ہو بھی میں
یہ نگاہوں کے اندھیرے نہیں چھٹنے پاتے
صبح کا ذکر نہیں صبح تو ہو جاتی ہے

احمد فراز

کسی جانب سے بھی پرچم نہ لہو کا نکلا
اب کے موسم میں بھی عالم وہی ہو کا نکلا
غزل سن کر پریشاں ہو گئے کیا
کسی کے دھیان میں تم کھو گئے کیا
یہ بیگانہ روی پہلی نہیں تھی
کہو تم بھی کسی کے ہو گئے کیا
کسی تازہ رفاقت کی جھلک ہے
پرانے زخم اچھے ہو گئے کیا
فراز اتنا نہو اترا حوصلے پر
اسے بھولے زمانے ہو گئے کیا

اقبال ساجد

ایک دو دکھ ہوں تو پھر ان سے کروں جی بھر کے پیار
سب کو سینے سے لگا لوں یہ تو ہو سکتا نہیں
جس نے سمجھا ہو ہمیشہ دوستی کو کاروبار
دوستو وہ تو کسی کا دوست ہو سکتا نہیں
میں ترے در کا بھکاری تو مرے در کا فقیر
آدمی اس دور میں خوددار ہو سکتا نہیں

امیر مینائی

ہم لوٹتے ہیں، وہ سو رہے ہیں
کیا ناز و نیاز ہو رہے ہیں

شاذ تمکنت

کیا قیامت ہے کہ اک شخص کا ہو بھی نہ سکوں
زندگی کون سی دولت ہے کہ کھو بھی نہ سکوں

محبوب خزاں

جھوٹ سچ دونوں ہی آئینے ہیں
اس طرف کوئی نہ ہو دیکھو مت
ہر کلی ایک بھنور اک بادل
کھیل میں کھیل نہ ہو دیکھو مت

محسن احسان

تھی سارے شہر کو بیماری گراں گوشی
سو چپ وتیرہ کیا ہم نے ہاؤ ہو کر کے
روشنیاں بدن بدن تیرے مرے لہو سے ہیں
لمس کی ساری لذتیں جسم کی ہاؤ ہو سے ہیں

محسن نقوی

میں کل تنہا تھا خلقت سو رہی تھی
مجھے خود سے بھی وحشت ہو رہی تھی
مرا قاتل مرے اندر چھپا تھا
مگر بد نام خلقت ہو رہی تھی

ناصر کاظمی

کچھ کہہ کے خموش ہو گئے ہم
قصہ تھا دراز کھو گئے ہم
تو کون ہے تیرا نام کیا ہے
کیا سچ ہے کہ تیرے ہو گئے ہم
چلے دل سے امیدوں کے مسافر
یہ نگری آج خالی ہو رہی ہے