گیا چمن سے چمن کو جو بے نمو کر کے
محسن احسان
ملا بھی کیا اسے توہین رنگ و بو کر کے
گیا چمن سے چمن کو جو بے نمو کر کے
تھے خوش گماں کہ کسی خوش سخن سے واسطہ ہے
بہت ملال ہوا اس سے گفتگو کر کے
تھی سارے شہر کو بیماری گراں گوشی
سو چپ وتیرہ کیا ہم نے ہاؤ ہو کر کے
ہماری صبحوں کے بیع نامے لکھنے والوں نے
ہمیں سیاہ کیا خود کو سرخ رو کر کے
سگان کوچہ و بازار سے رہو ہشیار
رہائی دیتے ہیں محسنؔ لہو لہو کر کے
مفاعِلن فَعِلاتن مفاعِلن فِعْلن
مجتث مثمن مخبون محذوف مسکن